جىلدىڭ ءتورت مەزگىلىن سەزىنۋگە بولادى - قازاقستانعا كەلەتىن اراب تۋريستەرى كوبەيىپ كەلەدى
استانا. KAZINFORM - قازاقستان تاياۋ شىعىس ساياحاتشىلارى ءۇشىن تارتىمدى باعىتقا اينالىپ كەلەدى. ورنالاستىرۋ ورىندارى بويىنشا دەرەكتەرگە سۇيەنسەك، وتكەن جىلى پارسى شىعاناعى ەلدەرىنەن كەلگەن تۋريستەر قاتارى %53 كوبەيدى، دەپ حابارلايدى Kazakh Tourism ۇلتتىق كومپانياسى.
بۇل پروتسەستى قولداۋ جانە قىزىعۋشىلىقتى ارتتىرۋ ماقساتىندا ءوڭىردىڭ ءىرى تۋروپەراتورلارىمەن ىنتىماقتاستىق كۇشەيتىلىپ جاتىر.
بىرىككەن اراب امىرلىكتەرىنىڭ ءىرى تۋروپەراتورلارى الماتى قالاسى مەن الماتى وبلىسىنىڭ تابيعي جانە مادەني مۇراسىمەن تانىسىپ، ەتنواۋىل، Oi Qaragai جانە شىمبۇلاق تاۋ كۋرورتتارىن، «شارىن» جانە «كولساي كولدەرى» ۇلتتىق پاركتەرىن ارالادى.
مەيماندار جازدا جايلى دەمالىس ىزدەيتىن ب ا ءا تۋريستەرى ءۇشىن قازاقستاننىڭ اۋا رايى مەن تابيعاتى ەرەكشە تارتىمدى ەكەنىن اتاپ ءوتتى.
- مەن ءبىر ساپاردىڭ وزىندە جىلدىڭ ءتورت مەزگىلىن سەزىندىم. قالادا - جاز بەن ىستىق، تاۋدا - قار، ال وبلىستا - جاڭبىر مەن كوكتەمگى كوڭىل-كۇي. بۇل - ناعىز سيقىر بولدى، - دەپ ءوز اسەرىمەن ءبولىستى مانسي شارما داتتا.
ب ا ءا- دەن كەلگەن تۋروپەراتورلار قازاقتىڭ ۇلتتىق تاعامدارى مەن قوناقجايلىعىنا جوعارى باعا بەردى. ولار ەلىمىزدەگى بەلسەندى دەمالىس، ەكوتۋريزم جانە وتباسىلىق باعىتتاردى دامىتۋ مۇمكىندىكتەرىنە باسا نازار اۋدارىپ وتىر.
ساپار سوڭىندا الماتى قالاسىندا B2B كەزدەسۋلەر ءوتىپ، 20 دان استام قازاقستاندىق تۋروپەراتورلار اراب ارىپتەستەرىمەن تۋريستىك ونىمدەردى ىلگەرىلەتۋ جانە ۇزاقمەرزىمدى ىنتىماقتاستىق مۇمكىندىكتەرىن تالقىلادى. بۇل قازاقستاننىڭ ب ا ءا مەن پارسى شىعاناعى ەلدەرىنەن كەلەتىن ساياحاتشىلار ءۇشىن تارتىمدىلىعىن ارتتىرادى.
قازاقستانعا ساپار ناتيجەسىندە ب ا اء تۋروپەراتورلارى ءوز كليەنتتەرىنە ۇسىناتىن تۋرپاكەتتەردى كەڭەيتە الادى.
بۇعان دەيىن پرەمەر-مينيستر ولجاس بەكتەنوۆ الماتىعا جۇمىس ساپارى بارىسىندا شىمبۇلاق، وي-قاراعاي، پيونەر، قيماسار جانە بۋتاكوۆكاعا كىرەتىن ورتالىق ايماقتى دامىتۋ جوسپارىمەن تانىسقان ەدى.
