جىلدار بويى جاۋىر بولعان بيۋروكراتياعا، قاعازباستىلىققا توسقاۋىل قوياتىن ۋاقىت جەتتى - توقايەۆ
استانا. KAZINFORM - پرەزيدەنتتىك جاستار كادر رەزەرۆىنىڭ فورۋمىندا پرەزيدەنت مەملەكەتتىك قىزمەتتى نەعۇرلىم وزىق سالاعا اينالدىرۋ قاجەت ەكەنىن ايتتى.
- جىلدار بويى جاۋىر بولعان بيۋروكراتياعا، قاعازباستىلىققا ءۇزىلدى-كەسىلدى توسقاۋىل قوياتىن ۋاقىت جەتتى. مەملەكەتتىك قىزمەت جۇيەسىندە بارلىق ۇدەرىس اشىق بولۋعا ءتيىس. «مەملەكەت ادام ءۇشىن» قىزمەت ەتۋى كەرەك. ەلىمىزدە ازاماتتاردىڭ مۇددەسىن تولىق قورعايتىن مەملەكەتتىك قىزمەت مودەلىن، ۇلگىسىن قالىپتاستىرۋ قاجەت. سوندىقتان ۋاقىت تالابىنا ساي كەلەتىن جانە قوعام سۇرانىسىنا جاۋاپ بەرەتىن جاڭا جۇمىس تاسىلدەرىن ەنگىزگەن ءجون. مەملەكەتتىك قىزمەتشىلەردىڭ جۇمىسىن شىنايى باعالايتىن ناقتى ولشەمدەر بولۋعا ءتيىس. بۇل - باعالاۋ جۇيەسىن ۇدايى جاڭارتىپ وتىرۋ قاجەت دەگەن ءسوز. مەملەكەتتىك قىزمەتشىنىڭ ءىس جۇزىندە اتقارعان جۇمىسى مىندەتتى تۇردە ەسكەرىلۋى كەرەك. ەڭ باستىسى، ءاربىر قىزمەتشى ەلىمىزدىڭ الدىندا تۇرعان ستراتەگيالىق مىندەتتەرگە سايكەس بارىنشا ءتيىمدى جۇمىس ىستەۋگە دايىن بولۋى قاجەت، - دەدى پرەزيدەنت.
بۇل رەتتە IT- شەشىمدەر ارقىلى مەملەكەتتىك قىزمەت جۇيەسىن وڭتايلاندىرۋ ماڭىزدى.
- جاساندى ينتەللەكت تەحنولوگياسىن جانە اۋقىمدى مالىمەتتەر قورىن، ياعني Big Data-نى ءتيىمدى قولدانۋ كەرەك. زاماناۋي تەحنولوگيالار ارقىلى حالىقپەن ەتەنە بايلانىس ورناتۋدىڭ جولدارىن جاقسارتقان ءجون. سەبەبى بارلىق ماڭىزدى شەشىمدەر ازاماتتاردىڭ پىكىرى نەگىزىندە قابىلدانۋعا ءتيىس، - دەدى قاسىم-جومارت توقايەۆ.
ايتا كەتەيىك، قاسىم-جومارت توقايەۆ بۇگىن پرەزيدەنتتىك جاستار كادر رەزەرۆىنىڭ فورۋمىنا قاتىستى.
جيىن الدىندا مەملەكەت باسشىسىنا پرەزيدەنتتىك جاستار كادر رەزەرۆىنىڭ قاتارىنا ءار جىلدارى وتكەن مامانداردىڭ جەتەكشىلىگىمەن جۇزەگە اسىرىلىپ جاتقان جوبالار تانىستىرىلدى. اتاپ ايتقاندا، پرەزيدەنتكە «ە- قىزمەت» اقپاراتتىق جۇيەسىنىڭ ارتىقشىلىقتارى، Citix كومپانياسى ونىمدەرىنىڭ ەكسپورتتىق الەۋەتى، «Kazakh Invest» ۇلتتىق كومپانياسىنىڭ وڭدەۋشى ونەركاسىپ پەن ەنەرگەتيكا سەكتورىنا ينۆەستور تارتۋ تاجىريبەسى، سونداي-اق بيۋدجەتتىك پروتسەستەردى وڭتايلاندىرۋعا ارنالعان «eAkimat365» اقپاراتتىق جۇيەسى تۋرالى مالىمەت بەرىلدى.
اۆتور
ايدار وسپاناليەۆ
