جىل سوڭىنا دەيىن 300 مىڭنان استام ادام گازبەن قامتىلادى - رومان سكليار

استانا. KAZINFORM - وتكەن جىلى حالىقتىڭ 60 پايىزى گازبەن قامتىلعان. ال بيىل گاز جەلىلەرىن جاڭعىرتۋعا 194 ميلليارد تەڭگە ءبولىندى.

بۇل تۋرالى ق ر پرەمەر- ءمينيستردىڭ ءبىرىنشى ورىنباسارى رومان سكليار ءمالىم ەتتى.

«2023 -جىلدىڭ قورىتىندىسى بويىنشا حالىقتىڭ 60 پايىزى گازبەن قامتىلعان. جىل سوڭىنا دەيىن 300 مىڭنان استام ادام گازبەن قامتاماسىز ەتىلىپ، 1 مىڭ 700 شاقىرىمنان استام گاز جەلىلەرى جاڭعىرتىلاتىن بولادى، وعان 194 ميلليارد تەڭگە ءبولىندى. «بەينەۋ -بوزوي - شىمكەنت 2»، «اقتوبە-قوستاناي» جانە «تالدىقورعان - ءۇشارال» گاز قۇبىرلارىن سالۋعا دايىندىق جۇمىستارى جۇرگىزىلۋدە»، - دەدى رومان سكليار ۇكىمەت وتىرىسىندا.

ۇكىمەت باسشىسىنىڭ ءبىرىنشى ورىنباسارى قازىر گاز وڭدەۋ زاۋىتتارى بويىنشا قاشاعاندا قۋاتى 1 جانە 2 جارىم ميلليارد تەكشە مەتر بولاتىن 2 زاۋىت سالىنىپ جاتقانىن ايتتى. ولاردى 2026 جانە 2030 -جىلدارى پايدالانۋعا بەرۋ جوسپارلانعان.

«قاراشىعاناقتا قۋاتى 4 ميلليارد تەكشە مەتر بولاتىن گاز ءوندىرۋ زاۋىتىن 2028 -جىلى ىسكە قوسۋ جوسپارلانىپ وتىر. بۇگىندە الەۋەتتى مەردىگەر انىقتالدى. جاڭاوزەندە گاز وڭدەۋ زاۋىتى بويىنشا جوبا- سمەتالىق قۇجاتتارىن ازىرلەۋ باستالدى، دالا جۇمىستارى جۇرگىزىلۋدە. 2027 -جىلى قولدانىسقا ەنگىزۋ جوسپارلانىپ وتىر»، - دەيدى ول.

اۆتور

داۋلەت ىزتىلەۋ