جولداۋ: ۇلتتىق قوردان جوعارى تەحنولوگيالىق سەكتورعا 1 ميلليارد دوللار ينۆەستيتسيا قۇيىلادى
استانا. KAZINFORM - ۇلتتىق قوردان ەكونوميكانىڭ جوعارى تەحنولوگيالىق سەكتورلارىنا 1 ميلليارد ا ق ش دوللارىنا دەيىن ينۆەستيتسيا قۇيىلادى. بۇل تۋرالى ۇكىمەت وتىرىسىندا پرەمەر- ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ايتتى.
- ينۆەستيتسيالىق ساياسات جانە قارجى سەكتورىن دامىتۋ بلوگى بويىنشا پەرسپەكتيۆالىق سالالاردى جانە ەڭبەك ونىمدىلىگىنىڭ الەۋەتىن ەسكەرە وتىرىپ، ينۆەستيتسيالاردى تارتۋ جۇيەسىن جاڭارتۋ جونىندەگى ءىس-قيمىل جوسپارى ازىرلەنەتىن بولادى. ينۆەستورلاردىڭ قۇقىقتارىن قورعاۋ ماقساتىندا باس پروكۋراتۋرانىڭ اكتيۆتەردى قايتارۋ كوميتەتى ينۆەستورلاردىڭ قۇقىقتارىن قورعاۋ كوميتەتى رەتىندە قايتا قۇرىلادى. «بانكتەر تۋرالى» زاڭ قابىلدانادى. ونىڭ نەگىزگى مىندەتى - نارىققا جاڭا قاتىسۋشىلاردى تارتۋ جانە بانكتەردىڭ ەركىن وتىمدىلىگىن اينالىمعا، اتاپ ايتقاندا، ەكونوميكانىڭ ناقتى سەكتورىنا باعىتتاۋدى قامتاماسىز ەتۋ، - دەدى ۆيتسە-پرەمەر.
ونىڭ اتاپ وتۋىنشە، ەكونوميكانىڭ جوعارى تەحنولوگيالىق سەكتورلارىنا ۇلتتىق قوردان 1 ميلليارد ا ق ش دوللارىنا دەيىن ينۆەستيتسيا قۇيىلادى. ول ءۇشىن ۇلتتىق بانك ءتيىستى باعدارلامانى ازىرلەيدى.
- «الاتاۋ قالاسىنىڭ ەرەكشە مارتەبەسى تۋرالى» زاڭ اياسىندا باسقارۋدىڭ ەرەكشە رەجيمى ارقىلى Alatau city-دە جاڭا ىسكەرلىك بەلسەندىلىك پەن يننوۆاتسيالار ورتالىعى قۇرىلادى. اتالعان قالانىڭ بىرەگەي قارجىلىق مودەلى بولادى. بۇل كريپتواكتيۆتەردى پايدالانا وتىرىپ، تولەم جۇرگىزۋ مۇمكىندىگى بار كريپتو-فيات ارنالارىن ەنگىزۋ ارقىلى جۇزەگە اسىرىلادى، - دەدى سەرىك جۇمانعارين.
اۆتور
مارلان جيەمباي
