جولبارىستاردىڭ وزدىگىنەن كوبەيۋى ءۇشىن ولاردىڭ سانى 50 گە جەتۋى كەرەك
استانا. KAZINFORM - قازاقستاندا جولبارىستاردىڭ ادامنىڭ ارالاسۋىنسىز وزدىگىنەن كوبەيىپ، تۇراقتى پوپۋلياتسيا قالىپتاستىرۋى ءۇشىن ولاردىڭ سانى شامامەن 50-گە جەتۋى قاجەت. بۇل تۋرالى ەكولوگيا جانە تابيعي رەسۋرستار ءمينيسترى الىبەك قۋانتىروۆ ايتتى.
ءمينيستردىڭ ايتۋىنشا، جولبارىستاردى قازاقستان تابيعاتىنا قايتا جەرسىندىرۋ باعدارلاماسى بىرنەشە كەزەڭنەن تۇرادى. العاشقى كەزەڭدە جىرتقىشتاردى جابايى تابيعاتقا جىبەرۋ كوزدەلسە، كەلەسى ماقسات — ولاردىڭ تابيعي جولمەن كوبەيۋىنە جاعداي جاساۋ.
— ءبىزدىڭ جوسپارىمىز بويىنشا 2033 -جىلعا دەيىن جابايى تابيعاتقا شامامەن 10 نەمەسە ودان دا كوپ جولبارىس جىبەرىلەدى. ءبىراق بۇل كورسەتكىش باعدارلامانىڭ ناتيجەسىنە قاراي وزگەرۋى مۇمكىن. ال جولبارىستاردىڭ ادامنىڭ ارالاسۋىنسىز تابيعي ورتادا وزدىگىنەن كوبەيۋى ءۇشىن ولاردىڭ سانى شامامەن 50-گە جەتۋى كەرەك. ءبىز وسىعان ۇمتىلامىز، — دەدى الىبەك قۋانتىروۆ.
ونىڭ سوزىنشە، الداعى ۋاقىتتا قازاقستان رەسەيدەگى سەرىكتەستەرىمەن بىرلەسكەن جۇمىستى جالعاستىرۋدى جوسپارلاپ وتىر. سونىمەن قاتار ەلىمىزدە بۇرىننان ارنايى قورشاۋدا ۇستالىپ وتىرعان جولبارىستار دا بار.
— بىزدە زووباقتاردان بۇرىن اكەلىنگەن جانۋارلار بار. ولار جابايى تابيعاتقا جىبەرىلمەيدى. بۇل جولبارىستار بىزگە وسىندا جاڭا ۇرپاق الۋ ءۇشىن قاجەت. كەيىن ولاردىڭ ءتولى تابيعي ورتاعا جىبەرۋگە دايىندالادى، — دەدى مينيستر.
مينيستر 2033 -جىلعا دەيىنگى جوسپاردىڭ باعدارلامانىڭ جۇزەگە اسۋ بارىسىنا قاراي قايتا قارالۋى مۇمكىن ەكەنىن اتاپ ءوتتى.
ايتا كەتەيىك، بۇعان دەيىن «ىلە-بالقاش» مەملەكەتتىك تابيعي رەزەرۆاتىنا جىبەرىلگەن ەكى جولبارىستىڭ اراقاشىقتىعى قازىر 20-25 شاقىرىمدى قۇرايتىنى حابارلاندى.
