جولبارىستار ەلدى مەكەندەرگە جاقىنداعان جاعدايدا قانداي شارا قابىلدانادى

ءمينيستردىڭ سوزىنشە، جولبارىستاردى قازاقستان تابيعاتىنا قايتا جەرسىندىرۋ باعدارلاماسى ازىرلەنگەن كەزدە جاقىن ماڭداعى اۋىل تۇرعىندارىنىڭ قاۋىپسىزدىگىنە ەرەكشە نازار اۋدارىلعان. وسى ماقساتتا ارنايى توپ قۇرىلىپ، جىرتقىشتاردىڭ قوزعالىسىن تاۋلىك بويى باقىلاۋ ۇيىمداستىرىلعان.

- حالىقتىڭ قاۋىپسىزدىگى - ءبىز ءۇشىن باستى ماسەلە. سوندىقتان باعدارلامانى دايىنداعان كەزدە بارلىق فاكتوردى، ونىڭ ىشىندە جاقىن ماڭداعى تۇرعىنداردىڭ قاۋىپسىزدىگىن ەسكەردىك. ارنايى توپ قۇرىلدى. ونىڭ ماماندارى رەزەرۆاتتا تاۋلىك بويى جۇمىس ىستەپ جاتىر، — دەدى الىبەك قۋانتىروۆ.

ونىڭ ايتۋىنشا، جولبارىستاردىڭ قوزعالىسىن باقىلاۋ ءۇشىن اۋماق شارتتى تۇردە بىرنەشە ايماققا بولىنگەن. ەگەر جىرتقىش بەلگىلەنگەن جاسىل ايماقتان شىعىپ، سارى ايماققا وتسە، ارنايى توپقا جانە جاقىن ماڭداعى اۋىلعا بەلگى بەرىلەدى.

- ەگەر جولبارىس سارى ايماققا كىرسە، ءتيىستى سيگنال ارنايى توپقا جانە اۋىلعا تۇسەدى. ماماندار قاجەتتى تەحنيكالىق قۇرالداردى پايدالانىپ، جولبارىستى كەرى قايتارۋعا دايىن، - دەپ ءتۇسىندىردى مينيستر.

تابيعاتقا جىبەرىلگەن جولبارىستارعا ارنايى باقىلاۋ قارعىباۋلارى تاعىلعان. بۇل قۇرىلعىلار ولاردىڭ قايدا جۇرگەنىن قاداعالاۋعا مۇمكىندىك بەرەدى.

ءمينيستردىڭ ايتۋىنشا، جولبارىستاردىڭ سانى كوبەيگەن سايىن ولاردى باقىلاۋ تاسىلدەرى دە وزگەرۋى مۇمكىن. دەگەنمەن قاجەت بولعان جاعدايدا كەز كەلگەن جولبارىستى ۇستاپ، وعان باقىلاۋ قۇرىلعىسىن قايتا تاعۋعا بولادى.

ايتا كەتەيىك، بۇعان دەيىن ىلە-بالقاشتا ەكىنشى جولبارىس تابيعاتقا جىبەرىلگەنى حابارلاندى.