جولاۋشىلارعا پاراشيۋت نەلىكتەن بەرىلمەيدى؟
استانا. قازاقپارات - الەمدە كۇنىگە 10 ميلليون جولاۋشى ۇشاقپەن قاتىنايدى. بۇل جىلىنا 4 ميلليارد ادام دىتتەگەن جەرىنە تەز جەتەدى دەگەن ءسوز. ءبىراق جىلىنا 100-دەن استام ۇشاق اپاتقا ۇشىرايدى.

كەيىنگى 10 جىل ىشىندە قايعىلى وقيعالاردىڭ 21 پايىزى ۇشۋ، 71 پايىزى قونۋ كەزىندە بولعان. بۇل حالىقارالىق ازاماتتىق اۆياتسيا ۇيىمىنىڭ دەرەگى. جالپى، الەمدە ەڭ قاۋىپسىز سانالاتىن كولىك ءتۇرى نەلىكتەن قاۋىپ پەن قاتەرگە تولى؟
ۇيىم وكىلدەرى ۇشاق اپاتتارىنىڭ 15 پايىزى تەحنيكالىق اقاۋ، قالعانى ادام فاكتورى ەكەنىن ايتادى. الەمدەگى ەڭ ءىرى ۇشاق اپاتتارى الىستى جاقىن قىلعان، ەڭ قاۋىپسىز كولىك اتانسا دا، اۋە كەڭىستىگىندە ۇشاقتار ءتۇرلى سەبەپپەن اپاتقا ۇشىرايدى.
ادامزات تاريحىنداعى ەڭ ءىرى ۇشاق اپاتى يسپانياداعى لوس- رودەوس اۋەجايىندا بولدى. ۇشۋ- قونۋ جولاعىندا ەكى بىردەي Boeing 747 ۇشاعىنىڭ سوقتىعىسۋىنان 583 ادام كوز جۇمدى. ۇشاق اپاتىنا ەكيپاج مۇشەلەرى مەن ديسپەتچەرلەر اراسىنداعى تۇسىنىسپەۋشىلىك سەبەپ بولعان. يسپان ديسپەتچەرلەرىنىڭ اعىلشىنشا اكسەنتى بولعان، ونىڭ ۇستىنە ۇشقىشتار ءبىر-ءبىرىنىڭ ءسوزىن ءبولىپ، دۇرىس قارىم-قاتىناس جاساماعان. ناتيجەسىندە ەكى ۇشاق تا تۇماننىڭ اسەرىنەن ءبىرىن-ءبىرى كورمەگەندىكتەن بۇرىلىپ ۇلگەرمەي، بەتپە-بەت سوقتىعىسادى.
تاعى ءبىر تراگەديا نيۋ- يوركتەگى دۇنيەجۇزىلىك ساۋدا ورتالىعىنىڭ وڭتۇستىك مۇناراسىنا جاسالعان لاڭكەستىك شابۋىل كەزىندە بولدى. سالدارىنان بورتتاعى 65 جولاۋشى، مەن عيمارات ماڭىنداعى 900 ادام قازا تاپتى.
ۇشاق اپاتى كەزىندە جولاۋشىلاردى قالاي امان قالىپ بولۋعا بولادى دەپ اۆياتسيا سالاسىنداعى ماماندار باس قاتىرىپ كەلەدى. جوبالار دا ۇسىنىلدى. وسىدان 9 جىل بۇرىن جولاۋشىنى اپاتتان امان الىپ قالاتىن ۇشاقتىڭ نوبايى قۇراستىرىلدى. بۇل قازىر جەلى قولدانۋشىلارىنىڭ اراسىندا ءجيى تالقىعا ءتۇسىپ ءجۇر. بۇل ۋكراينالىق ينجەنەردىڭ ويلاپ تاپقان جوباسى. ۇشاقتىڭ جولاۋشىلار وتىرعان بولىگىنىڭ ۇستىنە پاراشيۋت ورناتىلعان. استىڭعى جاعىنا پانتوندار بەكىتىلگەن. پاراشيۋت اۋەدەن جەرگە امان-ەسەن قونۋعا كومەكتەسسە، پانتون سۋعا قونعان جاعدايدا باتىپ كەتپەۋىن قاماتاماسىز ەتەدى.
دەگەنمەن، بۇل جوباعا تاعىلعان ءتۇرلى سىن-پىكىر كوپ. بارىنەن بۇرىن، بۇل اجىراتىلاتىن بولىك ۇشاقتىڭ باستاپقى كۇيىن بۇزادى. ءارى پيلوتتاردىڭ قاۋىپسىزدىگى قاراستىرىلماعان. ەندى كوپ تالقىلانعان بۇل جوبانىڭ ىسكە اسۋى-اسپاۋى ەكىتالاي.
ۇشاقتا جولاۋشىلارعا پاراشيۋت بەرىلمەيدى
جولاۋشىلار ۇشاعىندا قاۋىپسىزدىك ماقساتىندا پاراشيۋت بەرىلمەيدى. مۇنىڭ حالىقارالىق ازاماتتىق اۆياتسيا ۇيىمى بەكىتكەن ءوز سەبەپتەرى بار. بىرىنشىدەن، ۇشاق كولىكپەن سالىستىرعاندا اپاتقا از ۇشىرايدى. ۇشۋ كەزىندە 11 ميلليون جاعدايدىڭ بىرىندە عانا ۇشاق اپاتقا ۇشىرايدى، ال جەردەگى كولىك 5 مىڭ جاعدايدىڭ بىرىندە اپاتقا ۇشىراپ جاتادى.
ەكىنشىدەن، ۇشاق شامامەن 10-12 ك م بيىكتىكتە 800-1000 ك م/ساع جىلدامدىقپەن ۇشادى. بۇل پاراشيۋت مۇلدەم پايداسىز دەگەن ءسوز. سەبەبى بورتتىڭ سىرتىنداعى تەمپەراتۋرا مينۋس 40 گرادۋستان مينۋس 60-قا دەيىن جەتەدى. ءارى وتتەگى سيرەك بولادى. مۇنداي بيىكتىكتەن پاراشيۋتپەن سەكىرگەن ادام جەرگە جەتپەي كوز جۇمادى.
سونداي- اق 100-500 پاراشيۋتتى الىپ ءجۇرۋ وتە قيىن. ۇشاققا ونى تيەۋ ءتيىمسىز. جولاۋشىلاردىڭ جۇگىن ورنالاستىرۋعا ورىن قالمايدى. ءارى بۇل اۋە بيلەتتەرىنىڭ قىمباتتاۋىنا اسەر ەتەدى، ويتكەنى پاراشيۋت قىمبات.
ءسويتىپ، ازىرگە جوبالار بار، اقىل ايتۋشىلار كوپ بولعانمەن الەم ۇشاق پەن ونداعى جولاۋشىلاردىڭ قاۋىپسىزدىگى ءۇشىن وڭتايلى ەشتەڭە ويلاپ تاپقان جوق.
24.kz