جول جىلى: شىعىس قازاقستاندا بيىل 600 شاقىرىمعا جۋىق جول جوندەلەدى
وسكەمەن. KAZINFORM - شىعىس قازاقستان وبلىسىندا 2024 -جىلى جول ساپاسىن جاقسارتۋعا باسا نازار اۋدارىلىپ وتىر. ايماق باسشىسى ەرمەك كوشەربايەۆ وسى جىلدى «جول جىلى» دەپ تە جاريالاعان.
بۇل ماقالادا وڭىردە جىل كولەمىندە قاي جولداردىڭ جوندەلەتىنىن، پرەزيدەنت قاسىم- جومارت توقايەۆتىڭ تاپسىرماسىمەن سالىنىپ جاتقان بۇقتىرما سۋ قويماسى ارقىلى وتەتىن كوپىر قۇرىلىسىنىڭ جاي-كۇيىن ءسوز ەتپەكپىز.
ش ق و جولاۋشى كولىگى جانە اۆتوموبيل جولدارى باسقارماسى باسشىسىنىڭ مىندەتىن اتقارۋشى نۇربەك تۇراروۆتىڭ ايتۋىنشا، وسى جولى قالباتاۋ-مايقاپشاعاي، تالدىقورعان-وسكەمەن، وسينوۆ اسۋى رەسپۋبليكالىق جولدارىن قايتا جاڭارتۋ جالعاسادى.
«قازاۆتوجول ۇ ك» ا ق رەسپۋبليكالىق ماڭىزى بار 200 شاقىرىمعا جۋىق جولدى، ونىڭ ىشىندە وسكەمەننەن شەمونايحا، ريددەر، التاي، سەمەي قالالارى باعىتتارى بويىنشا جولدى جوندەۋ ماسەلەسىن قاراستىرۋدا. بيىل شەمونايحا قالاسىندا ۇبە وزەنى ارقىلى وتەتىن كوپىردى قايتا جاڭعىرتۋدى باستاۋ جوسپارلانىپ وتىر. كوپىر 1962 -جىلى سالىنعان. ساراپشىلاردىڭ قورىتىندىسى بويىنشا كوپىر اپاتتى دەپ تانىلعان، كولىكتىڭ جالپى سالماعى بويىنشا شەكتەۋ ەنگىزىلگەن، كەرى قوزعالىس ۇيىمداستىرىلعان. قازىرگى ۋاقىتتا جوبالاۋشىنى انىقتاۋ بويىنشا كونكۋرس وتكىزىلۋدە»، - دەدى ول.
وسكەمەن قالاسىندا ساتبايەۆ پەن جىبەك جولى داڭعىلدارىنىڭ قيىلىسىندا كولىك ايرىعىنىڭ، پەرميتين مەن سلاۆسكيي كوشەلەرىنىڭ قيىلىسىنىڭ قۇرىلىسى جالعاسادى. الماتى قالاسىنا شىعاتىن جىبەك جولى كوشەسىن، بازوۆايا كوشەسىن قايتا جاڭارتۋ جوبالارى اياقتالماق. ءساۋىر- مامىر ايلارىندا «ءۇ م ز» اق اۋدانىنداعى ءۇلبى وزەنى ارقىلى وتەتىن شنايدەر كوپىرىن قالپىنا كەلتىرۋ كوزدەلۋدە.
ەلدى مەكەندەردىڭ جولدارى مەن كوشەلەرىن ورتاشا جوندەۋگە 28,5 ميلليارد تەڭگە بولىنەدى. سونىڭ شەڭبەرىندە شامامەن 600 شاقىرىم جول جوندەلەدى دەپ كۇتىلۋدە. اتاپ ايتقاندا،
- وبلىستىق ماڭىزى بار 222 شاقىرىم جول،
- اۋداندىق ماڭىزى بار 153 شاقىرىم جول،
- ەلدى مەكەندەردىڭ 108 شاقىرىم كوشەلەرى،
- «اۋىل - ەل بەسىگى» اياسىندا اۋداندىق ماڭىزى بار 88 شاقىرىم كوشەلەر مەن جولدار،
- اۋدانداردىڭ ءوز قاراجاتى ەسەبىنەن 29 شاقىرىم جولدار مەن كوشەلەر جوندەلۋى ءتيىس.
«جول جوندەۋ ساپاسىن ۇلتتىق ساپا ورتالىعىنىڭ ماماندارى تەكسەرەتىن بولادى. اۋىر جۇك كولىكتەرىنىڭ باقىلاۋسىز قوزعالىسى سالدارىنان جولداردىڭ زاقىمدالماۋىن قامتاماسىز ەتۋ ماقساتىندا وبلىستىق ماڭىزى بار جولداردا سالماقتىق باقىلاۋ جۇيەلەرىن ورناتۋ ماسەلەسى پىسىقتالۋدا. قازىرگى ۋاقىتتا جولداردى جوندەۋ بويىنشا تەحنيكالىق قۇجاتتامانى دايىنداۋمەن قاتار، مەملەكەتتىك ساتىپ الۋ تۋرالى زاڭناما شەڭبەرىندە كونكۋرستىق راسىمدەر باستالدى»، - دەدى نۇربەك تۇراروۆ.
پرەزيدەنت قاسىم-جومارت توقايەۆتىڭ تاپسىرماسىمەن شىعىس قازاقستان وبلىسىنداعى كۇرشىم مەن سامار اۋداندارىن جالعايتىن « قىزىل تۋ» وتكەلىنە كوپىر سالىنىپ جاتقانى بەلگىلى. ەلىمىزدەگى ەڭ ۇزىن كوپىر بيىل قولدانىسقا بەرىلەدى دەپ كۇتىلۋدە.
«بۇقتىرما سۋ قويماسى ارقىلى وتەتىن كوپىر جوباسىنىڭ باعاسى - 61,4 ميلليارد تەڭگە. بۇگىندە ونىڭ 27,4 ميلليارد تەڭگەسى يگەرىلدى. ۇزىندىعى 1153 مەتردى قۇرايتىن تەحنولوگيالىق كوپىر سالىندى. ەكى جولاقتى نەگىزگى اۆتوموبيل كوپىرىنىڭ ۇزىندىعى 1316 مەتر، ەنى 12,2 مەتر بولادى. قازىرگى ۋاقىتتا 21 كوپىر تىرەگىنىڭ 13- ءى ورناتىلدى. 8 تىرەك بويىنشا جۇمىستار جالعاسۋدا. ارالىقتاردىڭ 20 مەتال كونسترۋكتسياسى دايىندالىپ، ۋچاسكەگە جەتكىزىلدى. قۇرىلىس جۇمىستارى كەستەگە سايكەس ءجۇرىپ جاتىر»، - دەيدى ش ق و جولاۋشىلار كولىگى جانە اۆتوموبيل جولدارى باسقارماسى باسشىسىنىڭ مىندەتىن اتقارۋشى.
تاعى ءبىر ماڭىزدى جوبا - 2018 -جىلى باستالعان وسكەمەن- التاي باعىتىنداعى وسينوۆ اسۋىنان توتە جولدىڭ قۇرىلىسى. التاي اۋدانىنداعى بۇقتىرما سۋ قويماسىنا جانە كاتونقاراعاي اۋدانىنا تۋريستەر تەك وسى جول ارقىلى جەتەدى. جول سالۋشىلار بايقاۋسىزدا ورمان شارۋاشىلىعىنىڭ جەرىنە كىرىپ كەتكەندىكتەن توقتاپ قالعان قۇرىلىس جۇمىستارى 2023 -جىلى قايتا جالعاسقان ەدى.
«بۇگىنگى تاڭدا 56-دان 72 شاقىرىمعا دەيىنگى ۋچاسكەگە بايلانىستى جوباعا تۇزەتۋلەر ەنگىزىلگەن. كونكۋرس وتكىزىلىپ، مەردىگەر كومپانيا انىقتالدى. ول - «Kurylys Group RK» ج ش س. وتكەن جىلى قازان ايىندا كەلىسىم جاسالدى. بيىل 3,9 ميلليارد تەڭگە ءبولىنىپ، ونىڭ 2,9 ميلليارد تەڭگەسى يگەرىلدى. 52-دەن 53 شاقىرىمعا دەيىنگى اۋماقتا جەر قازۋ جۇمىستارى جۇرگىزىلىپ جاتىر. 72-دەن 88 شاقىرىمعا دەيىنگى ۋچاسكەگە قاتىستى جوباعا تۇزەتۋ ەنگىزىلۋدە. جالپى قۇرىلىس جۇمىستارى 2025 -جىلى اياقتالادى دەپ كۇتىلۋدە. سەبەبى جولدا بيىك تىرەكتەرى بار ۇلكەن جانە كۇردەلى كوپىر سالىنۋى ءتيىس»، - دەدى ن. تۇراروۆ.
اۆتور
تالعاتجان مۇحامەتبەك ۇلى
