«جوشى ۇلىسى: تاريحى، مۇراسى جانە تاعلىمى»: الماتىدا تاريحشىلار باس قوستى

Алматы
Фото: Досбол Атажан

الماتى. KAZINFORM - اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە جوشى ۇلىسىنىڭ 800 جىلدىعىنا ارنالعان «جوشى ۇلىسى: تاريحى، مۇراسى جانە تاعلىمى» اتتى حالىقارالىق عىلىمي-پراكتيكالىق كونفەرەنتسيا ءوتتى.

حالىقارالىق عىلىمي- تاجىريبەلىك كونفەرەنتسيا جۇمىسىنا قازاقستاننىڭ جانە شەتەلدىڭ بەلگىلى عالىمدارى، الماتى مەن باسقا دا رەسپۋبليكالىق ج و و وقىتۋشىلارى قاتىسىپ، اتالعان ماسەلە بويىنشا ءوز كوزقاراستارى مەن ويلارىن ورتاعا سالدى. شەتەلدىك بايانداماشىلار قاتارىندا دجيۋ-يۋپ لي (كانادا)، حيرويۋكي ناگامينە (جاپونيا)، نۇرلان كەنجەاحمەت (گەرمانيا)، ابدۋللاح گيۋندوگدۋ (تۇركيا) بولدى.

- «جوشى ۇلىسى: تاريحى، مۇراسى جانە تاعلىمى» اتتى حالىقارالىق عىلىمي كونفەرەنسياعا قوش كەلدىڭىزدەر. بۇگىنگى جيىن الەمگە التىن وردا اتىمەن تانىمال بولعان ⅩⅢعاسىرداعى شىڭعىس حان يمپەرياسىنىڭ 4 ءبولىنىسىنىڭ ىشىندەگى ەڭ ۇزاق ءومىر سۇرگەن مەملەكەت - جوشى ۇلىسىنا ارنالىپ وتىر. ول - التاي تاۋلارىنان دۋناي وزەنىنە دەيىنگى جەرلەردى الىپ جاتقان ءتىلى، ءدىنى، تۇرمىسى، مادەنيەتى بولەك ونداعان حالىقتاردى بىرىكتىرگەن الىپ يمپەريا، ەرەكشە وركەنيەت. جوشى ۇلىسى ءومىر سۇرگەن ءداۋىر - قازاق جەرىندەگى مەملەكەتتىلىك ءداستۇردىڭ دامۋىنداعى ماڭىزدى كەزەڭدەردىڭ ءبىرى. مەملەكەت باسشىسى قاسىم-جومارت توقايەۆتىڭ ۇلتتىق قۇرىلتايدىڭ ءۇشىنشى وتىرىسىندا ايتقان ءسوزى دە بۇل ويىمىزدى قۋاتتاي تۇسەدى، - دەدى اباي اتىنداعى قازۇپۋ باسقارما مۇشەسى - زەرتتەۋ قىزمەتى جونىندەگى پرورەكتورى ەرتاي سۇلتان.

كونفەرەنتسيا بارىسىندا جوشى ۇلىسىنىڭ تاريحناماسى مەن دەرەككوزدەرى، تاريحي گەوگرافياسى، ىرگەلەس كورشى مەملەكەتتەرمەن ديپلوماتيالىق بايلانىستارى، ەۋرازياداعى حالىقارالىق قاتىناستارداعى التىن وردا حاندارىنىڭ ءرولى جانە وزگە دە تاقىرىپتار تالقىلاندى.

اۆتور

ابىلايحان جۇماشيەۆ

سوڭعى جاڭالىقتار