جوعارى وقۋ ورىندارىن باسقارۋدىڭ جاڭا مودەلى ازىرلەنىپ جاتىر

استانا. KAZINFORM - جوعارى وقۋ ورىندارىن باسقارۋدىڭ جاڭا مودەلى ازىرلەنىپ جاتىر. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى تامارا دۇيسەنوۆانىڭ جاۋابىندا ايتىلعان.

«جوعارى وقۋ ورىندارىنداعى ساپالى كورپوراتيۆتىك باسقارۋ ماسەلەسى ولارعا بەرىلگەن اكادەميالىق جانە باسقارۋشىلىق دەربەستىكتى تولىققاندى جۇزەگە اسىرۋ، جوعارى جانە جوعارى وقۋ ورنىنان كەيىنگى ساپالى ءبىلىمدى قامتاماسىز ەتۋ ءۇشىن وتە ماڭىزدى. وسىعان وراي، بيىل 14-اقپاندا وتكەن عىلىم جانە جوعارى ءبىلىم، وقۋ-اعارتۋ مينيسترلىكتەرىنىڭ القا ماجىلىسىندە اتالعان ماسەلە «بارلىعىنا قولجەتىمدى، ساپالى ءبىلىم» ۇلتتىق بايانداماسىن تالقىلاۋ اياسىندا تاۋەلسىز ساراپشىلىق قوعامداستىقتىڭ قاتىسۋىمەن قارالدى. قازىرگى ۋاقىتتا عىلىم جانە جوعارى ءبىلىم مينيسترلىگىنىڭ جانىندا ج و و- لاردى باسقارۋدىڭ جاڭا مودەلىن ازىرلەۋ جونىندەگى جۇمىس توبى جۇمىس ىستەيدى»، - دەدى ۆيتسە-پرەمەر.

ونىڭ اتاپ وتۋىنشە، جۇمىس توبىنىڭ قۇرامىندا كورپوراتيۆتىك سەكتوردىڭ، تاۋەلسىز ديرەكتورلار قاۋىمداستىعىنىڭ، «اتامەكەن» ۇ ك پ- نىڭ، عىلىم جانە جوعارى ءبىلىم ماسەلەلەرى جونىندەگى قوعامدىق كەڭەستىڭ، ج و و- لاردىڭ وكىلدەرى بار.

«جۇمىس توبى جوعارى وقۋ ورىندارى ديرەكتورلار كەڭەسىنىڭ تاۋەلسىزدىگى مەن جۇمىس تيىمدىلىگىنە جان-جاقتى ساراپتاما جۇرگىزەتىن بولادى. سونىمەن قاتار ستۋدەنتتەر مەن وقىتۋشىلاردىڭ قۇقىعىن قورعاۋ جونىندەگى ۋاكىلدىڭ، جەمقورلىققا قارسى كوملايەنس- قىزمەتتىڭ جانە باسقالارىنىڭ ءتيىمدى جۇمىسى قاراستىرىلدى. بارلىق ج و و- لاردا كورپوراتيۆتىك باسقارۋ كودەكسىن جەتىلدىرۋ بويىنشا ناقتى ۇسىنىستار ازىرلەندى»، - دەدى تامارا دۇيسەنوۆا.

اۆتور

مارلان جيەمباي