جەتىسۋدا بايقاۋلاردا توپ جارعان باتاگوي قاريا بار
جەتىسۋ وبلىسىنىڭ كەربۇلاق اۋدانىنداعى باسشي اۋىلىندا جاسى توقسانعا تاياپ قالعان جاقىپبەك ومىربەك ەسىمدى باتاگوي قاريا تۇرادى.

ول اۋداندىق، وبلىستىق باتا بەرۋشىلەر بايقاۋىندا كوزگە ءتۇسىپ، اتىراۋدا وتكەن رەسپۋبليكالىق باتاگويلەر جارىسىندا باس جۇلدە الىپ قايتقان. اتالعان بايقاۋعا ەلىمىزدىڭ تۇكپىر- تۇكپىرىنەن جينالعان 20 شاقتى قازىنا كەۋدە قاريا قاتىسقان. جاقىپبەك ومىربەك اقساقال ءوزى تۇراتىن باسشي اۋىلىنىڭ حالقى ءۇشىن «قاجى اتا» اتانىپ كەتكەن.
جاقىپبەك ومىربەك، باسشي اۋىلدىق اقساقالدار كەڭەسىنىڭ ءتوراعاسى:
- سول اسىل ەلگە، جۇرتقا، جاستارعا پايداسى تيەتىندەي باتالاردى جيناپ، سونى ويىما قوندىرىپ الىپ، جاتقا ايتامىن. سونىڭ ءبىرىن ايتىپ جىبەرسەم قالاي بولادى؟
- ايتىپ جىبەرىڭىز.
- جاراتقان يەم، اللا تاعالا،
مىنا كەڭ بايتاق جەرىمىزدىڭ جان- جاعىن جارىق قىلا كور،
باستاعان ءىسىمىزدىڭ باس- اياعىن انىق قىلا كور.
جان- جاعىمىزعا جاۋ كەلتىرە كورمە،
باستاعان ءىسىمىزدىڭ باس- اياعىنا داۋ كەلتىرە كورمە.
ونەگەلەرىڭ ازباسىن، ونەرلەرىڭ توزباسىن!
وسى ءبىر بەرگەن باتامدى، ءبىر اللا ءوزى قولداسىن! ءاۋمين!
www.24.kz