جەتىسۋ وبلىسىندا «جەرۇيىق» تۇرعىن ءۇي باعدارلاماسى ىسكە قوسىلدى

تالدىقورعان. KAZINFORM - اۋىل تۇرعىندارىنا ارنالعان «جەرۇيىق» باعدارلاماسىنا ءوتىنىم قابىلداۋ 10-قىركۇيەكتەن 10-قازانعا دەيىن جالعاسادى. 5 پايىزدىق مولشەرلەمەمەن بەرىلەتىن يپوتەكانى مۇعالىم، دارىگەر، مەملەكەتتىك قىزمەتشىلەر مەن الەۋمەتتىك وسال توپتاعى ازاماتتار راسىمدەي الادى.

باعدارلامانىڭ باستاپقى جارناسى - %10، نەسيە 19 جىلعا بەرىلەدى.

«جەرۇيىق» باعدارلاماسىن جۇزەگە اسىرۋعا وبلىس بيۋدجەتىنەن 1 ميلليارد تەڭگە قاراستىرىلعان. جاڭا جوبا 8 اۋداننىڭ تۇرعىندارىن قامتيدى. باعدارلاماعا قاتىسۋعا وتىنىمدەردى اۋدان اكىمدىكتەرىندەگى تۇرعىن ءۇي-كوممۋنالدىق شارۋاشىلىعى بولىمىندە قابىلدايدى.

«جەرۇيىق» باعدارلاماسىنا ءوتىنىم بەرۋ ءۇشىن كەلەسى تالاپتارعا سايكەس بولۋ قاجەت:

- سوڭعى 5 جىل ىشىندە باعدارلاماعا قاتىسۋشىنىڭ جانە ونىڭ وتباسى مۇشەلەرىنىڭ مەنشىگىندە تۇرعىن ءۇيدىڭ (ونىڭ ىشىندە ساتىپ الۋ قۇقىعىمەن جالعا بەرىلەتىن تۇرعىن ءۇي مەن ۇلەستىڭ) بولماۋى. وتباسى مۇشەلەرىنە: جۇبايى، زايىبى جانە ولاردىڭ كامەلەتكە تولماعان بالالارى جاتادى؛

- سوڭعى جۇمىس ورنىندا مىندەتتى زەينەتاقى جارنالارىمەن راستالعان كەمىندە 6 اي جۇمىس ءوتىلىنىڭ بولۋى.

- جەتىسۋ وبلىسىنىڭ اۋداندارىندا نەمەسە اۋىلدىق وكرۋگتەرىندە تىركەۋدىڭ بولۋى.

«وتباسى» بانك ماماندارىنىڭ ايتۋىنشا ءۇي الۋعا ۇمىتكەرلەر ۇپاي سانىنا بايلانىستى ىرىكتەلەدى.

«ءۇيدى ەڭ كوپ ۇپاي جيناعاندار الادى. ولاردىڭ سانىنا وتباسىلىق جاعداي، بالالاردىڭ بولۋى، وبلىستىق تىركەۋدىڭ ۇزاقتىعى اسەر ەتەدى. «جەتىم بالالار جانە اتا-اناسىنىڭ قامقورلىعىنسىز قالعان بالالار» ساناتى بويىنشا باعدارلاماعا قاتىسۋشىلار، سونداي- اق مۇمكىندىگى شەكتەۋلى ازاماتتار نەمەسە مۇمكىندىگى شەكتەۋلى بالالاردى تاربيەلەپ وتىرعان ازاماتتار قوسىمشا ۇپاي قوسىلادى»، - دەيدى «وتباسى بانك» ا ق جەتىسۋ وبلىستىق فيليالىنىڭ رەسمي وكىلى اسەل دوسانوۆا.

ەسكە سالا كەتەيىك بيىل «وتباسى بانكى» ا ق ءتۇرلى الەۋمەتتىك توپتار ءۇشىن جەڭىلدەتىلگەن شارتپەن بىرنەشە مەملەكەتتىك يپوتەكالىق باعدارلاما ۇسىنعانىن جازعان بولاتىنبىز.

اۆتور

ايبەك قۇتتىبەك