جەتىم بالالاردى قابىلدايتىن كاسىبي وتباسى ينستيتۋتى ەنگىزىلەدى

ەلىمىزدە جەتىم بالالاردى قابىلداۋشى كاسىبي وتباسى ينستيتۋتى ەنگىزىلەدى. بۇل جايىندا سەنات دەپۋتاتتارىنىڭ ساۋالىنا پرەمەر- ءمينيستردىڭ ورىنباسارى تامارا دۇيسەنوۆانىڭ جاۋابىندا ايتىلعان، دەپ حابارلايدى قازاقپارات ءتىلشىسى.

Отбасы
Фото: Фото: gov.kz

«بالانى قابىلداپ الۋشى اتا- انالاردىڭ بالانى اسىراۋ، تاربيەلەۋ جانە وقىتۋ بويىنشا جۇكتەلگەن مىندەتتەردىڭ ورىندالۋىن باقىلاۋدى قورعانشىلىق جانە قامقورشىلىق ورگاندارى جۇزەگە اسىرادى، سونىمەن بىرگە قابىلداپ الۋشى اتا- انالارعا بالالاردىڭ ءومىرى مەن تاربيەسىنە قاجەتتى قالىپتى جاعداي جاساۋعا كومەك كورسەتەدى. زاڭعا سايكەس، قابىلداپ الۋشى اتا- انالار بالا ون سەگىز جاسقا تولعانعا دەيىن قورعانشىلىق جانە قامقورشىلىق ورگاندارىنا قابىلداپ الىنعان بالانىڭ تۇرمىس جاعدايى، ءبىلىمى، تاربيەسى جانە دەنساۋلىعى تۋرالى ەسەپ بەرۋگە مىندەتتى»، - دەپ اتاپ وتەدى ۇكىمەت باسشىسىنىڭ ورىنباسارى جاۋابىندا.

ونىڭ اتاپ وتۋىنشە، جەتىم بالالاردى وتباسىنا ورنالاستىرۋ ماسەلەلەرى بويىنشا قورعانشىلىق جانە قامقورشىلىق ورگاندارىنىڭ جانە جەتىم بالالارعا ارنالعان ۇيىمداردىڭ قىزمەتىن ۇيلەستىرۋ مەن ءبىرىڭعاي باقىلاۋدى وقۋ- اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى جۇزەگە اسىرادى.

«قازىرگى تاڭدا پارلامەنت ماجىلىسىندە قارالىپ جاتقان «ءبىلىم بەرۋ جانە بالا قۇقىقتارىن قورعاۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى اياسىندا جەتىم بالالاردى وتباسىعا ورنالاستىرۋدىڭ بالامالىق نىسانى رەتىندە قابىلداۋشى كاسىبي وتباسى ينستيتۋتى ەنگىزىلەدى. زاڭ جوباسىنا سايكەس، قابىلداۋشى كاسىبي وتباسىلار پسيحولوگيالىق دايىندىقتان، قورعانشىلىق جانە قامقورشىلىق ورگاندارىنان اككرەديتاتسيادان ءوتىپ، بالالار انىقتالعاننان كەيىن تاۋلىكتىڭ كەز كەلگەن ۋاقىتىندا دەنساۋلىق جاعدايىنا قاراماستان بىردەن قابىلدايدى»، - دەدى تامارا دۇيسەنوۆا.

پرەمەر- مينيستر ورىنباسارىنىڭ پايىمىنشا، قابىلداۋشى كاسىبي وتباسىلاردى ەنگىزۋ بالالاردى قولداۋ ورتالىقتارىنداعى تاربيەلەنۋشىلەر سانىنىڭ تومەندەۋىنە ىقپال ەتىپ، ولاردىڭ قىزمەتى بالالاردى تاربيەلەۋ مەن كۇتىپ باعۋدان كاسىبي وتباسىلاردى سۇيەمەلدەۋگە جانە وسى وتباسىلارعا بەرىلگەن بالالاردى باقىلاۋعا باعىتتالادى.

اۆتور

مارلان جيەمباي

سوڭعى جاڭالىقتار