جەردى سالقىنداتۋ ءۇشىن عالىمدار عارىشقا الىپ كۇنقاعار ورنالاستىرۋدى ۇسىندى

تۇجىرىمداماعا سايكەس، جەر مەن كۇننىڭ اراسىنا مىڭداعان شاعىلىستىرعىش سپۋتنيك نەمەسە بولشەكتەردەن تۇراتىن بۇلت ورنالاستىرۋ كوزدەلگەن. ولار كۇن ساۋلەسىنىڭ از عانا بولىگىن بوگەپ، پلانەتانىڭ قىزۋىن باسەڭدەتۋى ءتيىس.

كوممەرسيالىق ەمەس Planetary Sunshade Institute ۇيىمىنىڭ جاڭا ەسەبىندە مۇنداي جۇيەنىڭ قۇرىلىسى اۋىر زىمىرانداردى جاساۋ تەحنولوگياسى دامىعان جاعدايدا الداعى 20-40 جىلدا باستالۋى مۇمكىن ەكەنى ايتىلعان.

جاھاندىق تەمپەراتۋرانىڭ كوتەرىلۋىنە بايلانىستى بۇل يدەياعا قىزىعۋشىلىق ارتىپ كەلەدى. تامىز ايىندا SpaceX كومپانياسىنىڭ باسشىسى يلون ماسك تا الەۋمەتتىك جەلىدە سپۋتنيكتەردىڭ كومەگىمەن جەرگە تۇسەتىن كۇن ساۋلەسىن ازايتىپ، جاھاندىق جىلىنۋ ماسەلەسىن شەشۋگە بولاتىنىن جازعان.

الايدا عالىمدار بۇل تەحنولوگيانىڭ قانشالىقتى ءتيىمدى ءارى جۇزەگە اسىرۋعا قولايلى ەكەنىنە قاتىستى ورتاق پىكىرگە كەلگەن جوق.

ۇلى بريتانيانىڭ Advanced Research and Invention Agency اگەنتتىگىنىڭ 400 مىڭ فۋنت ستەرلينگ گرانتى ەسەبىنەن ازىرلەنگەن ەسەپتە عارىشتىق كۇنقاعاردىڭ التى ىقتيمال ۇلگىسى قاراستىرىلعان. زەرتتەۋ اۆتورلارى جەرگە تۇسەتىن كۇن ساۋلەسىنىڭ شامامەن 1 پايىزىن بوگەگەن جاعدايدا پلانەتانىڭ ورتاشا تەمپەراتۋراسى 1 گرادۋسقا تومەندەۋى مۇمكىن دەپ ەسەپتەيدى.

ۇسىنىستاردىڭ ءبىرى - ديامەترى شامامەن 40 شاقىرىم بولاتىن 5 مىڭعا جۋىق الىپ اينالمالى سپۋتنيك ورنالاستىرۋ. مۇنداي جۇيەنى جاساۋ ءۇشىن شامامەن 70 ميلليون توننا ماتەريال قاجەت. بۇل - وسى ۋاقىتقا دەيىن عارىشقا ۇشىرىلعان بارلىق نىساننىڭ جيىنتىق ماسساسىنان شامامەن 1500 ەسە كوپ.

جۇيەنى قۇراستىرۋ ءۇشىن سپۋتنيك بولشەكتەرىن جەردەن عارىشقا جەتكىزىپ، سول جەردە بىرىكتىرۋ قاجەت بولادى. ەسەپ اۆتورلارى تاسىمالداۋ شىعىندارىن ازايتۋ ءۇشىن ايدان وندىرىلگەن ماتەريالداردى پايدالانۋدى ۇسىنادى.

تاعى ءبىر نۇسقا - جەر مەن كۇننىڭ اراسىنا شاعىلىستىرعىش شاڭ نەمەسە ارنايى بولشەكتەردەن تۇراتىن بۇلت ورنالاستىرۋ. بۇل ءتاسىل سپۋتنيكتەر جۇيەسىمەن سالىستىرعاندا جۇزدەگەن ەسە از ماتەريالدى قاجەت ەتۋى مۇمكىن. دەگەنمەن زەرتتەۋشىلەر ونى ازىرگە بولجامدى ءارى تاجىريبەلىك نەگىزى از تۇجىرىمداما دەپ سانايدى.

ەكى جۇيەنى دە جەردەن شامامەن 2 ميلليون شاقىرىم قاشىقتىقتا ورنالاستىرۋ ۇسىنىلعان. بۇل نۇكتەدە ولار كۇن ساۋلەسىنىڭ پلانەتاعا جەتۋىنە كەدەرگى كەلتىرە الادى.

سونىمەن قاتار تەحنولوگياعا قاتىستى ءبىرقاتار قاۋىپ بار. مىڭداعان زىمىران ۇشىرۋ قورشاعان ورتانىڭ لاستانۋىنا اكەلۋى مۇمكىن. ال عارىشتىق كۇنقاعارلاردىڭ ۇزاق مەرزىمدى اسەرى ازىرگە بەلگىسىز. سىنشىلار مۇنداي جوبالارعا باسىمدىق بەرۋ ۇكىمەتتەردىڭ جاھاندىق جىلىنۋدىڭ نەگىزگى سەبەبى سانالاتىن پارنيكتىك گازدار شىعارىندىلارىن قىسقارتۋ جونىندەگى جۇمىستارىنان نازارىن اۋدارۋى مۇمكىن ەكەنىن ەسكەرتەدى.

جوبانىڭ قۇنى دا ۇلكەن كەدەرگى بولىپ وتىر. ەسەپتە ناقتى شىعىندى باعالاۋعا جەتكىلىكتى دەرەك جوق ەكەنى ايتىلعان. ال نوتتينگەم ۋنيۆەرسيتەتىنىڭ ينجەنەرى شانتال كاپپەللەتتي مۇنداي پلانەتالىق كۇنقاعاردىڭ قۇنى ونداعان تريلليون دوللارعا جەتۋى مۇمكىن دەپ بولجايدى.

ايتا كەتەيىك، بۇعان دەيىن قىتايدىڭ ايعا ادام قوندىرۋ جوسپارىن تانىستىرعانىن جازدىق.