جۇمىستارىنىڭ عىلىمي دالەلى جوق - سۋ ءمينيسترى التاي اينابەكتىڭ ۇندەۋىنە جاۋاپ بەردى
استانا. KAZINFORM - سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ەل ىشىندە ارالدى سۋعا تولتىرعان «جاڭبىر ادام» رەتىندە تانىلىپ كەتكەن التاي اينابەكتىڭ وڭتۇستىك وڭىرلەردى قۋاڭشىلىق بولاتىنى تۋرالى دابىلىنا جاۋاپ بەردى.
الەۋمەتتىك جەلىدە التاي اينابەكتىڭ ءبىر توپ اداممەن بىرگە ۇكىمەتكە جولداعان ۇندەۋى تاراپ ءجۇر. ۆيدەودا ءبىر توپ ازامات ۇكىمەتتەن التاي اينابەكتىڭ وڭتۇستىك وڭىرلەردى جازدا بولۋى مۇمكىن قۋاڭشىلىقتان قۇتقارۋىنا قولداۋ كورسەتىپ، قولدان جاڭبىر جاۋعىزاتىن تەحنولوگياسىن ىسكە اسىرۋعا اتسالىسۋىن سۇرايدى.
استانادا ءوتىپ جاتقان قازاقستاننىڭ سۋ سەكتورىن دامىتۋ جونىندەگى ۇيلەستىرۋ كەڭەسى وتىرىسى كەزىندە جۋرناليست مينيسترگە وسى مالىمدەمە تۋرالى سۇراق قويدى.
- ول ازاماتتىڭ تاراپىنان ىستەلىپ جاتقان جۇمىستاردىڭ ەشقانداي عىلىمي دالەلى جوق. ءبىزدىڭ تاراپىمىزدان ۇسىنىس بولعان. ءوزىمىزدىڭ تاراز قالاسىندا ورنالاسقان عىلىمي-زەرتتەۋ ينستيتۋتىنىڭ ماماندارىمەن بىرگە ءجۇرىپ، عىلىمي تۇردە دالەلدەۋ ماسەلەسىن قويعانبىز. ءبىراق بۇگىندە ول شەشىمىن تاپقان جوق، - دەيدى مينيستر.
مينيسترلىكتىڭ ۇسىنىسى
نۇرجان نۇرجىگىتوۆ التاي اينابەك باستاعان ازاماتتاردىڭ ەلدىڭ وڭتۇستىك وڭىرلەرىندە بيىل جازدا قۋاڭشىلىق بولادى دەگەن دابىلىنا دا جاۋاپ بەردى.
- وڭتۇستىك وڭىرلەرمەن ىرگەلەس جاتقان ەلدەردىڭ دە دەرەگىن زەرتتەپ وتىرمىز. ورتاق بولجام بويىنشا نورمانىڭ 87 پايىزى كولەمىندە سۋ بولادى. بىلتىر 89 پايىز بولعان. سوندا بىلتىرعىدان 2 پايىز عانا تومەن دەگەن ءسوز. بۇل - «قازگيدرومەتتىڭ»، «ۋزگيدرومەتتىڭ» «قىرعىزگيدرومەتتىڭ» بولجامدارىنا نەگىزدەلگەن بولجام. ءبىز ۆەگەتاتسيالىق كەزەڭگە جوسپارلاعان مولشەردە سۋ جيناقتاي الدىق. 1 -ساۋىردەگى جاعداي بويىنشا، سۋ قويمالارىندا جينالعان ىلعالدىڭ كولەمى بىلتىرعىمەن سالىستىرعاندا 1 ميلليارد 388 ميلليون تەكشە مەتر ارتىق. مۇنى ءبىزدىڭ رەزەرۆ دەۋگە بولادى. وسى فاكتورلاردىڭ ءبارىن ەسكەرە وتىرىپ، ۆەگەتاتسيا بىلتىرعى دەڭگەيدە وتەدى دەپ بولجاپ وتىرمىز، - دەدى ۆەدومستۆو باسشىسى.
ەسكە سالساق، بىلتىر دا التاي اينابەكتىڭ بۇلتتى يونداۋ ارقىلى جاڭبىر جاۋعىزۋ جوباسىنىڭ اياسىندا قىزۋ پىكىرتالاس بولعان ەدى.
اۆتور
ەسىمجان ناقتىباي
