جۇمىستا ءجۇرىپ مۇگەدەك بوپ قالعان اقتوبەلىك 12 جىلدان سوڭ وتەماقى ءوندىرىپ الدى

اقتوبە. KAZINFORM - اقتوبە قالاسىنىڭ №3-سوتىندا قۇرىلىستا ءجۇرىپ، مۇگەدەك بولىپ قالعان جۇمىسشىنىڭ ارىزى قارالدى. ول جۇمىس بەرۋشىدەن 6 ميلليون تەڭگە ءوندىرىپ الدى.

اقتوبە قالاسىنىڭ تۇرعىنى وندىرىستىك جاراقات الىپ، مورالدىق شىعىندى وتەۋ جونىندە شاعىم ءتۇسىردى. ءىس اقتوبە قالاسىنىڭ №3-سوتىندا قارالدى. ءىس ماتەريالىنا سۇيەنسەك، تالاپ قويۋشى قۇرىلىس جۇمىستارىن جۇرگىزۋ كەزىندە بيىكتەن قۇلاپ، ءۇشىنشى توپتىڭ مۇگەدەگى بولىپ قالعان. ءوز كەزەگىندە جاۋاپكەر تالاپ ارىزبەن كەلىسپەي، تالاپ قويۋ مەرزىمىن قايتا قاراۋدى سۇرادى. سەبەبى وقيعا 2012 -جىلى بولىپ، قالا تۇرعىنى ارادا 12 جىل وتكەندە عانا شاعىم ءتۇسىرىپ تۇر.

- سوت وتىرىسىندا ساراپتاما تاعايىندالىپ، ونىڭ دەنساۋلىعىنا اۋىر تۇردە زيان كەلگەنى دالەلدەندى. سوت انىقتالعان ءمان-جايلاردى قورىتىندىلاي كەلە، تالاپ زاڭدى نەگىزدى دەپ ەسەپتەدى. ازاماتتىق كودەكستىڭ 187-بابىنىڭ 1-بولىگىنە سايكەس ازاماتتىڭ دەنساۋلىعىنا كەلتىرىلگەن زياننىڭ ورنىن تولتىرۋ تۋرالى تالاپتارعا مەرزىم قولدانىلمايدى. سوندىقتان جاۋاپكەردىڭ تالاپ قويۋ مەرزىمىن قولدانۋ تۋرالى ءوتىنىشى قاناعاتتاندىرۋسىز قالدىردى. سوت شەشىمىمەن تالاپ قويۋشىنىڭ پايداسىنا 6 ميلليون تەڭگە مولشەرىندە مورالدىق زيان ءوندىرىلدى، - دەپ حابارلادى اقتوبە قالاسى №3-سوتىنىڭ باسپا ءسوز قىزمەتى.

شەشىم زاڭدى كۇشىنە ەندى.

اۆتور
التىناي ساعىندىقوۆا