جۇمىس بەرۋشىنىڭ كىناسى: كوستەنكو شاحتاسىنداعى اپاتتى تەرگەۋ كوميسسياسى جۇمىسىن اياقتادى

سەنبى كۇنى، 9-جەلتوقساندا قاراعاندى وبلىسىنداعى كوستەنكو اتىنداعى شاحتاداعى جارىلىسقا ۇلاسقان ءورتتىڭ سەبەپتەرىن تەكسەرۋ جونىندەگى ۇكىمەت كوميسسياسىنىڭ قورىتىندى وتىرىسى ءوتتى.

بۇل تۋرالى Kazinform ق ر توتەنشە جاعدايلار مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

قازاقستاننىڭ، قيىر جانە تاياۋ شەتەلدەردىڭ عىلىمي- زەرتتەۋ جانە ساراپتامالىق ۇيىمدارىن تارتا وتىرىپ، تەحنيكالىق قۇجاتتامانى، ايعاقتاردى جانە باسقا ماتەريالداردى زەردەلەۋ بويىنشا ەگجەي- تەگجەيلى جۇمىستار جۇرگىزىلدى.

ناتيجەسىندە، ءورت جانە مەتان- اۋا قوسپاسىنىڭ ودان ءارى جارىلۋى قىرعىش كونۆەيەر ەلەمەنتتەرىنىڭ سوققىسى مەن ۇيكەلىسىنەن پايدا بولعان مەحانيكالىق ۇشقىننان گاز (مەتاننىڭ) تۇتانعانى انىقتالدى. گازدىڭ ءوزى استىڭعى توسەمەدەن بولىنگەن.

كوميسسيا ونەركاسىپتىك قاۋىپسىزدىك تالاپتارىنىڭ بۇزىلعانىن دا انىقتادى. اتاپ ايتقاندا، جۇمىستىڭ تولىققاندى ۇيىمداستىرىلماۋى جانە قاۋىپتى وندىرىستىك فاكتورلارعا قاجەتتى وندىرىستىك باقىلاۋدىڭ جوقتىعى اتالدى. ولاردىڭ قاتارىنا تۇراقتى شاحتالاردا شاڭ مەن جارىلىسقا قارسى شارالاردى ورىنداۋ دا جاتادى.

كوميسسيا جۇمىسىنىڭ قورىتىندىسى بويىنشا جۇمىس بەرۋشىنىڭ كىناسى % 100 انىقتالىپ، جۇمىستى قاۋىپسىز ورىنداۋ تالاپتارىن بۇزعان 19 جاۋاپتى تۇلعا انىقتالدى.

ەڭبەك زاڭناماسىنا سايكەس تەرگەۋ ماتەريالدارى قۇقىق قورعاۋ ورگاندارىنا بەرىلدى.

اۆتور

ايدار وسپاناليەۆ