جەمقورلىق تۋرالى حابارلاعان الماتىلىقتارعا 1,2 ميلليون تەڭگە سىياقى بەرىلدى
الماتى. KAZINFORM - الماتىدا جەمقورلىق تۋرالى حابارلاعان ەكى ادامعا 1,2 ميلليون تەڭگە سىياقى بەرىلدى.
الماتى قالاسى بويىنشا سىبايلاس جەمقورلىققا قارسى ءىس-قيمىل اگەنتتىگى دەپارتامەنتىنىڭ باسشىسى ارمان راحيموۆتىڭ ايتۋىنشا، جىل باسىنان بەرى جەمقورلىقپەن كۇرەسكە باعىتتالعان 66 ءىس-شارا ءوتتى. وعان 5 مىڭنان استام ادام قاتىستى.
- سىبايلاس جەمقورلىققا قارسى مادەنيەتتى قالىپتاستىرۋ - بىزدەگى باستى باسىمدىقتىڭ ءبىرى. ءبىز الدىن الۋ، اعارتۋ جانە ازاماتتىق جاۋاپكەرشىلىككە ەرەكشە ءمان بەرەمىز، - دەدى ول وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سپيكەردىڭ سوزىنشە، «سىبايلاس جەمقورلىققا قارسى ۆولونتەرلىك» جوباسى اياسىندا الماتىدا 262 ەرىكتى جۇمىس ىستەيدى.
— بۇل جوبا جاستار اراسىندا اشىقتىق پەن ادىلەتتىلىك قاعيداتتارىن ناسيحاتتايتىن ءتيىمدى الاڭعا اينالدى، — دەپ اتاپ ءوتتى ول.
سونىمەن قاتار، ول بيىل سىبايلاس جەمقورلىق فاكتىلەرى تۋرالى حابارلاعان ەكى ادام 1,2 ميلليون تەڭگە سىياقى العانىن تىلگە تيەك ەتتى.
— 2024 -جىلى بارلىعى 9 ازامات ماراپاتتالىپ، ولاردىڭ التاۋى 5,2 ميلليون تەڭگە كولەمىندە اقشالاي سىياقى الدى، — دەدى دەپارتامەنت باسشىسى.
ەسكە سالايىق، قازاقستاندىقتار جەمقورلىق تۋرالى حابارلاعانى ءۇشىن 15,7 ميلليون تەڭگەگە دەيىن سىياقى الا الادى.
