جەمقورلاردى شەتەلگە شىعارماۋ تۋرالى نورمانى ەنگىزۋ مۇمكىندىگى بار - ايدوس سارىم
استانا. KAZINFORM - ءماجىلىس دەپۋتاتى ايدوس سارىم جازاسىن وتەپ شىققان جەمقورلاردىڭ وزىنە شەتەلگە شىعۋعا تىيىم سالۋ ۇسىنىسىنا پىكىر ايتتى.

- بۇل پىكىر كوپتەن بەرى ايتىلىپ ءجۇر. نەگىزى، ونى قاراۋعا بولادى. بىزدە كونستيتۋتسيالىق سوت جۇمىس ىستەپ جاتىر. سوندىقتان بۇل نورما ەنگىزىلسە، «ازاماتتاردىڭ قۇقىعى تاپتالدى» دەگەن اڭگىمەدەن عانا قورقىپ وتىرمىز. وسىعان دەيىن وسى ۇسىنىستى بىرنەشە رەت تالقىلادىق. مەنىڭ ويىمشا، بەيرەسمي تۇردە كونستيتۋتسيالىق سوت، جوعارعى سوت جانە ساراپشىلارمەن تاعى ءبىر اقىلداسىپ كورەمىز. وسى ورايدا زاڭعا قايشى كەلمەۋى ماسەلەسى قارالادى، - دەدى ا. سارىم ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
وسى ورايدا دەپۋتات قازىر سالىق نەمەسە ايىپپۇلدى تولەمەگەندەرگە شەتەلگە شىعۋىنا شەكتەۋ بار ەكەنىن ەسكە سالدى.
- وسى نورمانى دا سولاردىڭ قاتارىنا جاتقىزسا، ءوتىپ كەتۋى مۇمكىن، - دەپ ءتۇسىندىردى ايدوس سارىم.
ايتا كەتەيىك، ءماجىلىس دەپۋتاتى ازات پەرۋاشيەۆ سىبايلاس جەمقورلىقپەن كۇرەستى جەتىلدىرۋگە ارنالعان زاڭ جوباسىن تالقىلاۋ كەزىندە حالىقتىڭ قارجىسىن جىمقىرعانداردى شەتەلگە شىعارماۋدى ۇسىندى.
بۇعان دەيىن حابارلانعانداي، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سىبايلاس جەمقورلىققا قارسى ءىس- قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى مەن ىلەسپە قۇجات ءبىرىنشى وقىلىمدا ماقۇلداندى.
اۆتور
رۋسلان عابباسوۆ