جەمقورلاردان تاركىلەنگەن قاراجات ءالى دە مەكتەپ سالۋعا جەتەدى

جەمقورلاردان تاركىلەنگەن قاراجات جيناقتالاتىن قوردان مەكتەپ سالۋعا قارجى بولۋگە ءالى مۇمكىندىك بار. بۇل تۋرالى پرەمەر-ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ ايتتى، دەپ حابارلايدى Kazinform.

«150 ميلليارد تەڭگەدەن اسا قاراجات ارنايى شوتقا (جەمقورلاردان تاركىلەنگەن قاراجات جيناقتالاتىن قور) ءتۇستى. بۇل ارنايى شوتتان 62 مەكتەپكە قاراجات ءبولىندى. قازاقستاننىڭ ءار اۋماعىنان بەرىلگەن ۇسىنىسقا سايكەس قاراجات بەرىلدى. ءبىراق، ءبارى جۇمسالعان جوق، 90 ميلليارد تەڭگەگە جۋىق قاراجات بولىنگەن بولاتىن. سوندىقتان 60 ميلليارد تەڭگەگە جۋىق قاراجات ءالى بار. ەگەر الداعى ۋاقىتتا اپاتتى جاعدايداعى نەمەسە ءۇش اۋىسىمدى مەكتەپتەر بولسا، وندا سولاردى جوندەۋ ءۇشىن ءوتىنىم كەلىپ تۇسسە، قاراستىرامىز. قاراجات رەسپۋبليكالىق بيۋدجەتتىك كوميسسيا شەشىمىمەن بولىنەدى»، - دەدى ەرۇلان جاماۋبايەۆ ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا وراي.
ايتا كەتەيىك، قوردىڭ قىزمەتى مەكتەپتەردى، قوسالقى عيماراتتاردى جانە ينتەرناتتاردى سالۋ جانە قايتا جاڭعىرتۋ ارقىلى ءۇش اۋىسىمدىق مەكتەپتەر مەن اپاتتى وقۋ ورىندارىنىڭ ماسەلەلەرىن شەشۋگە جانە جالپى ءبىلىم بەرۋ مەكەمەلەرىندەگى ورىن تاپشىلىعىن جويۋعا باعىتتالعان.
اۆتور
مارلان جيەمباي