جۇكتى شامادان ارتىق تيەگەن اۋىر كولىكتەردى باقىلاۋ كۇشەيتىلدى - مينيسترلىك

استانا. KAZINFORM – ق ر كولىك مينيسترلىگى اۆتوموبيل كولىگى جانە كولىكتىك باقىلاۋ كوميتەتىنىڭ ءتوراعاسى التاي ءالى شامادان ارتىق جۇك تيەگەن اۋىر كولىكتەردى جولداردا تىركەۋ جۇيەسىنە قاتىستى تۇسىنىك بەردى.

«بيىل ەلىمىزدە اۆتوموبيل جولدارىن جوندەۋ جانە سالۋ بويىنشا جۇمىستاردىڭ رەكوردتىق سانى ءجۇرىپ جاتىر، بۇل شامامەن 12 مىڭ شاقىرىم. جول قۇرىلىسىمەن قاتار، ونىڭ ساقتالۋىن قامتاماسىز ەتۋ مىندەتى تۇر. جولداردىڭ بۇزىلۋىنا ىقپال ەتەتىن نەگىزگى فاكتورلاردىڭ ءبىرى - رۇقسات ەتىلگەن سالماقتان اسىرا تيەپ، اۋىر جۇك اۆتوكولىكتەرىن جولعا شىعارۋ. 95 مىڭ ك م جولداعى كولىكتىك باقىلاۋ 47 جىلجىمالى بەكەت كۇشىمەن جۇزەگە اسىرىلادى، ياعني 1 بەكەتكە 2 مىڭ ك م- عا دەيىن كەلەدى. سوندىقتان بارلىق جولدى باقىلاۋمەن، تەك جىلجىمالى بەكەتتەردىڭ كۇشىمەن تولىق قامتۋ ءىس جۇزىندە مۇمكىن ەمەس. وسىعان بايلانىستى كولىكتىك باقىلاۋ سالاسىندا سيفرلاندىرۋ ەنگىزىلىپ جاتىر، وندا تەكسەرۋ پروتسەسىندە ادامي فاكتور الىنىپ تاستالادى»، - دەدى التاي ءالى ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ ايتۋىنشا، ءتيىستى زاڭ اياسىندا رەسپۋبليكالىق ماڭىزى بار اۆتوجولداردا اۆتوماتتاندىرىلعان ولشەۋ ستانسيالارىن (ا ءو س) ورناتۋ قۇزىرەتى «قازاۆتوجول» ۇ ق» ا ق- عا، ال جەرگىلىكتى اۆتوجولداردا جەرگىلىكتى اتقارۋشى ورگادارعا جاتقىزىلعان. بۇل تۇرعىدا جەرگىلىكتى اتقارۋشى ورگاندار 150 ا ءو س ورناتۋعا دايىن.

«قازاۆتوجول» ۇ ق» ا ق رەسپۋبليكالىق جولداردا شامامەن 70 ا ءو س ورناتۋدى جوسپارلاپ وتىر.

«اتاپ ايتقاندا، «سەرگەك» قاعيداتى بويىنشا ايىپپۇلدى ادامنىڭ قاتىسۋىنسىز رەسىمدەۋ ءۇشىن كولىك مينيسترلىگى مەن باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ اقپاراتتىق جۇيەلەرىن ينتەگراتسيالاۋ بويىنشا جۇمىستار اتقارىلىپ جاتىر. بىلتىر استانا قالاسى اكىمدىگىنىڭ قولداۋىمەن قالاعا اۆتوكولىك كىرەتىن نەگىزگى 7 ورىندا ا ءو س ورناتۋ بويىنشا جۇمىس باستالدى. ا ءو س جوق جەرلەردە جۇك كولىكتەرىنىڭ جۇرۋىنە تىيىم سالاتىن بەلگىلەر ورناتىلادى جانە بۇل جولدار «سەرگەك» كامەرالارى ارقىلى باقىلانادى»، - دەدى كوميتەت باسشىسى.

ونىڭ سوزىنە قاراعاندا، بيىلعى 1-قىركۇيەكتەن باستاپ استانادا جۇك اۆتوكولىكتەرىن باقىلاۋدى ا ءو س جۇيەسى قامتاماسىز ەتە باستادى. بۇل رەتتە، 100 ك م راديۋستا ورنالاسقان 29 كارەردەن قالاعا ينەرتتى ماتەريالداردى تاسىمالدايتىن 6305 جۇك كولىگى قامتىلىپ وتىر.

«قازىر ەلىمىزدىڭ جولدارىندا 5 ميلليون-عا جۋىق اۆتوكولىك ءجۇر، ونىڭ ىشىندە 55 مىڭعا جۋىق جۇك كولىگى جولدىڭ بۇزىلۋىنا اسەر ەتىپ جاتىر. مەملەكەت جىل سايىن اۆتوجولداردى سالۋ مەن جوندەۋگە ميللياردتاعان قاراجات ءبولىپ كەلەدى. سوندىقتان ءبىزدىڭ مىندەتىمىز - جول ينفراقۇرىلىمىنىڭ ساقتالۋىن بارىنشا قامتاماسىز. سونىمەن بىرگە سالماق پارامەترلەرىن بۇزعانى ءۇشىن جاۋاپكەرشىلىك جۇك جونەلتۋشىگە دە جۇكتەلەدى. بۇل تۇرعىدا جۇكتى ارتىق تيەمەۋ ءۇشىن كارەرلەرمەن، سونداي-اق بەتون زاۋىتتارىمەن ءتيىستى جۇمىستى اتقارىپ جاتىرمىز. بۇل تالاپتاردى بۇزعانى ءۇشىن جۇك جونەلتۋشىلەرگە 30-100 ا ە ك مولشەرىندە اكىمشىلىك ايىپپۇل قاراستىرىلعان. قازىرگى كەزدە استانا قالاسىندا 53 بەتون زاۋىتى مەن 1137 ميكسەر (بەتون تاسىمالدايتىن كولىك) بار»، - دەدى التاي ءالى.

اۆتور

رۋسلان عابباسوۆ