جەكە كاسىپكەرلەردىڭ 70 پايىزعا جۋىعى تابىسىن جاسىرىپ وتىر - ەرجان ءبىرجانوۆ
استانا. KAZINFORM – ق ر قارجى ۆيتسە-ءمينيسترى ەرجان ءبىرجانوۆ ەلىمىزدە سالىق تولەمەي جۇرگەن كاسىپكەرلەر مەن موبيلدى اۋدارىمدارعا قاتىستى تۇسىنىك بەردى.
«قازىرگى كەزدە كوپ سالىق تولەۋشى تىركەۋدە تۇر. ءبىراق ولاردىڭ ءبىرازى سالىق نىساناسىندا نولدىك كورسەتكىش كورسەتىپ وتىر. 2023-جىلعى ءبىرىنشى جارتىجىلدىعىنىڭ قورىتىندىسى بويىنشا 1,4 ميلليون جەكە كاسىپكەردىڭ ىشىندە نولدىك كورسەتكىشتى 944 مىڭ سالىق تولەۋشى كورسەتتى. بۇل ءوز كەزەگىندە 67 پايىزعا تەڭ»، - دەدى ك. ءبىرجانوۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
بۇل تۇرعىدا ول 30 پايىزى زاڭدى تۇردە سالىق تولەپ جاتقانىن ايتتى.
«قالعان 67 پايىزى سالىق تولەمەيدى، نولدىك كورسەتكىش كورسەتەدى. ۇلتتىق بانكتىڭ دەرەگىنە جۇگىنسەك، بارلىق تولەم بانك كارتوچكاسى ارقىلى وتكەن. ماسەلەن، ءبارىڭىز دۇكەننەن تاۋار ساتىپ الاسىزدار. ولاردىڭ اينالىمى ءبىر جىلدىڭ ىشىندە 55 تريلليون تەڭگە بولدى. ال ءموبيلدى اۋدارىمداردىڭ سوماسى 80 تريلليون تەڭگەنى قۇراعان. تۇسىنەسىز بە؟ بۇل رەتتە، تولەمدەردىڭ ءبىر بولىگى سالىق الاڭىندا بولماعانىن، تولەنبەگەنىن بايقاتىپ وتىر. بۇل ءوز كەزەگىندە جەرگىلىكتى جەردەگى بيۋدجەت شىعىنى سانالادى. قازىرگى كەزدە الەۋمەتتىك سالانىڭ دامۋىنا ۇلەس قوسۋ ءۇشىن وسى تولەملەردى تولەۋ كەرەك»، - دەدى ۆيتسە-مينيستر.
ونىڭ پايىمىنشا، ەلدى مەكەندەردەگى الەۋمەتتىك نىسانداردى تولىقتاي قامتاماسىز ەتۋ ءۇشىن سالىقتان جالتارۋعا جول بەرمەۋ كەرەك.
«بالالار جارىق ءارى جىلى مەكتەپتە وقۋى ءتيىس. حالىق جاقسى ەم الۋى كەرەك. ەگەر جەكە كاسىپكەرلەر وسى 80 تريلليون تەڭگەدەن سالىق تولەمەسە، ولاردىڭ جاعدايى قيىن بولادى. سوندىقتان وسى اقپاراتتى دۇرىس جەتكىزۋدى سۇرايمىن»، - دەدى ەرجان ءبىرجانوۆ.
اۆتور
رۋسلان عابباسوۆ
