جەكە كاسىپكەرلەر كينو وندىرىسىنە جىل سايىن 20 ميلليارد تەڭگەدەن استام قاراجات سالادى - ارمان قىرىقبايەۆ

 قۇرىلتاي وتىرىسىندا دەپۋتات شولپان كارينوۆا 2027- 2029 -جىلدارعا ارنالعان رەسپۋبليكالىق بيۋدجەت جوباسىندا كرەاتيۆتى ەكونوميكانى دامىتۋعا بولىنەتىن قاراجاتتىڭ جەتكىلىكتىلىگىنە قاتىستى ماسەلە كوتەردى. ونىڭ ايتۋىنشا، الداعى ءۇش جىلدا كرەاتيۆتى يندۋستريانىڭ جالپى ىشكى ونىمدەگى ۇلەسىن %3- عا جەتكىزۋ، وڭىرلىك حابتاردىڭ ينفراقۇرىلىمىن دامىتۋ جانە اۆتورلىق قۇقىقتى قورعاۋدىڭ تسيفرلىق پلاتفورمالارىن جەتىلدىرۋ مىندەتتەرى تۇر.

ارمان قىرىقبايەۆتىڭ ايتۋىنشا، بيۋدجەت شىعىستارىن وڭتايلاندىرۋ اياسىندا كرەاتيۆتى يندۋسترياعا بولىنەتىن مەملەكەتتىك قارجى دا قىسقارىپ وتىر.

— بيىل بۇل سالاعا 1 ميلليارد 380 ميلليون تەڭگە ءبولىندى. كەلەسى جىلى 1 ميلليارد 200 ميلليون تەڭگەدەن استام، ال ودان كەيىنگى جىلى 1 ميلليارد تەڭگەگە جۋىق قارجى قاراستىرىلادى، — دەدى مينيستر.

سونىمەن قاتار ول مەملەكەتتىك بيۋدجەت كرەاتيۆتى يندۋستريانى قارجىلاندىرۋدىڭ جالعىز كوزى ەمەس ەكەنىن اتاپ ءوتتى. لوتەرەيا تۋرالى زاڭعا سايكەس، ۇلتتىق لوتەرەيا اينالىمىنىڭ %3- ى جىل سايىن وسى سالاعا باعىتتالادى. بۇل شامامەن 1-1,5 ميلليارد تەڭگە.

ونىڭ تۇسىندىرۋىنشە، مەملەكەت قولداۋى قالىپتاسقان بيزنەسكە عانا ەمەس، جاستارعا، ستارتاپتارعا جانە كرەاتيۆتى يندۋستريادا جۇمىس ىستەيتىن ماماندارعا باعىتتالادى. قاراجات وقىتۋعا، يننوۆاتسيالىق جوبالاردى قولداۋعا، سونداي-اق تاجىريبە الماسۋعا مۇمكىندىك جاساۋعا جۇمسالادى.

— بۇگىندە كرەاتيۆتى يندۋستريانىڭ ەكونوميكاعا قوسىپ وتىرعان ۇلەسى 2,7 تريلليون تەڭگەگە جەتتى. بۇل سالا قازىردىڭ وزىندە مەملەكەت قازىناسىنا جىل سايىن 200 ميلليارد تەڭگەدەن استام سالىق تولەپ وتىر، — دەدى ارمان قىرىقبايەۆ.

مينيستر كينويندۋستريانى مىسالعا كەلتىردى. ونىڭ ايتۋىنشا، مەملەكەت بۇل سالاعا جىل سايىن 5 ميلليارد تەڭگە بولەدى. ال كينو نارىعىنىڭ جالپى كولەمى مامانداردىڭ باعالاۋىنشا، 45- 50 ميلليارد تەڭگەدەن اسادى. جەكە كاسىپكەرلەر دە كينو وندىرىسىنە جىل سايىن 20 ميلليارد تەڭگەدەن استام قاراجات سالادى.

بۇعان دەيىن قارجى ءمينيسترى رەسپۋبليكالىق بيۋدجەتتىڭ نەگىزگى كورسەتكىشتەرىن اتاعان ەدى.