جايىق وزەنىندەگى سۋ دەڭگەيى ورالدا ءبىر تاۋلىكتە 13 سانتيمەترگە كوتەرىلدى
ورال. KAZINFORM - باتىس قازاقستان وبلىسىندا جايىق وزەنىندەگى سۋ دەڭگەيى كوتەرىلىپ كەلەدى. «قازگيدرومەت» ر م ك ب ق و فيليالىنىڭ 15-ءساۋىر كۇنگى تاڭعى ساعات 08.00-دەگى مالىمەتى بويىنشا وزەن دەڭگەيى ورال قالاسى تۇسىندا ءبىر تاۋلىكتە 13 سانتيمەترگە جوعارىلاپ، 768 سانتيمەترگە (قاۋىپتى شەگى - 850 س م) جەتتى.
بايتەرەك اۋدانى يانۆارسيەۆ گيدروبەكەتىندە 1 سانتيمەترگە (802 س م) تۇسكەنىمەن، قاۋىپ سەيىلگەن جوق. ەسەسىنە كوشىم اۋىلىندا 751 (+12)، تايپاقتا 459 (+11) سانتيمەتردى كورسەتتى.
كوشىم كانالىندا سۋ دەڭگەيى 820 سانتيمەترگە (+13) جەتىپ، قاۋىپتى شەكتەن 20 سانتيمەترگە اسىپ كەتتى.
ب ق و اكىمىنىڭ ورىنباسارى قاليار ايتمۇحامبەتوۆتىڭ ايتۋىنشا، ورىنبوردان كەلە جاتقان ۇلكەن سۋدىڭ الدىڭعى لەگى بۇگىن كەشكە نە تۇندە وبلىس شەكاراسىنا، ءبورلى اۋدانى جارسۋات اۋىلى تۇسىنا جەتەدى.
«تاسقىن جايىق وزەنى بويىندا ورنالاسقان 84 ەلدى مەكەن مەن ورال قالاسىندا بوگەتتەردى بەكىتۋ جۇمىستارى بىتە كەلدى. قازىرگى كەزدە بوگەتتەردىڭ ەنى ۇلعايتىلىپ، بيىكتىگى كوتەرىلۋدە»، دەدى ق. ايتمۇحامبەتوۆ.
ەسكە سالا كەتەيىك، بۇدان بۇرىن سۋ تاسقىنىنا بايلانىستى ورال قالاسىنىڭ بارلىق مەكتەپتەرى ونلاين وقىتۋعا كوشەتىنىن جازعان بولاتىنبىز.
اۆتور
اسحات رايقۇل
