جايىق-كاسپي كانالىن تەرەڭدەتۋ جۇمىستارى باستالادى
كەلەر جىلى جايىق- كاسپي كانالىن تەرەڭدەتۋگە قاتىستى اۋقىمدى جۇمىس باستالادى، دەپ حابارلايدى Kazinform.
بۇگىن ءماجىلىستىڭ جالپى وتىرىسىندا دەپۋتات دۇيسەنباي تۇرعانوۆ ەلىمىزدەگى ترانسشەكارالىق وزەندەردىڭ ەداۋىر تايازدىعىنا بايلانىستى كەمە قاتىناسىندا ءبىراز قيىندىقتار بولعانىن ايتتى.
«جايىق وزەنىندە دە وسىنداي پروبلەما بار. سۋدىڭ دەڭگەيى تومەندەگەندىكتەن، جايىق- كاسپي كانالىنداعى تەرەڭدىك 30-40 س م شاماسىندا. سونىڭ سالدارىنان كانال ارقىلى جۇك تاسىمالى شەكتەلگەن. اسىرەسە، بالىقشىلار زارداپ شەگىپ جاتىر. بۇل رەتتە، جايىق- كاسپي كانالىن تەرەڭدەتۋ مەن ءتۇبىن تازارتۋ جۇمىستارى قانداي كەزەڭدە؟»، - دەپ سۇرادى د. تۇرعانوۆ.
ءوز كەزەگىندە كولىك ءمينيسترى مارات قارابايەۆ جايىق-كاسپي كانالىن تەرەڭدەتۋ جۇمىستارىنا قاراجات ءبولۋدى پارلامەنت قولداعانىن ەسكە سالدى.
«2024-2025 -جىلدارعا ارنالعان بيۋدجەتتە 12 ميلليارد تەڭگە قاراجات قاراستىرىلعان. ونداعى جۇمىس كەلەر جىلى باستالادى. ءبىز ول جاقتا 1 ميلليون 140 مىڭ تەكشە مەتر قۇمدى شىعارىپ، سول ارنانىڭ تەرەڭدىگىن 2,5 مەترگە جەتكىزەمىز. بۇل جۇمىس 2025 -جىلى اياقتالادى جانە سول جىلى وسى ارنا ترانسكاسپي حالىقارالىق كولىك دالىزىنە قوسىلادى»، - دەدى مينيستر.
م. قارابايەۆتىڭ سوزىنە قاراعاندا، بۇل جوبا KPI جانە ت ش و سياقتى كومپانيالاردىڭ ەكسپورتتىق مۇمكىندىكتەرىن كەڭەيتەدى. تاسىمالدىڭ بولجامدى كولەمى شامامەن 1 ميلليون توننا بولماق. كەلەشەكتە كەمە ءجۇرۋ پارامەترلەرىن ءتيىستى دەڭگەيدە ۇستاۋ ءۇشىن تەرەڭدەتكىش تەحنيكا ساتىپ الۋ جوسپارلانىپ وتىر.
اۆتور
رۋسلان عابباسوۆ
