جانىبەك ءالىمحان ۇلى «كانەلومەن» بىرىكتىرۋشى جەكپە-جەك وتكىزەتىن ۋاقىتىن اتادى
استانا. kazinform - قازاقستاندىق بوكسشى جانىبەك ءالىمحان ۇلى (17-0, 12 KO) ەكىنشى ورتا سالماقتاعى چەمپيوندىق بەلبەۋلەردى بىرىكتىرۋ جەكپە-جەگىن 2027 -جىلعى مامىردا وتكىزگىسى كەلەتىنىن مالىمدەدى، دەپ حابارلايدى Sports.kz.
جانىبەك ءالىمحان ۇلى x الەۋمەتتىك جەلىسىندەگى پاراقشاسىندا ساۋل «كانەلو» الۆارەس پەن كريستيان مبيللي اراسىنداعى جەكپە-جەكتىڭ پوستەرىن جاريالاپ، وسى كەزدەسۋدىڭ جەڭىمپازىمەن جۇدىرىقتاسۋعا نيەتتى ەكەنىن ءبىلدىردى.
— قاڭتاردا مەن ەكىنشى ورتا سالماقتا چەمپيوندىق بەلبەۋدىڭ يەگەرى بولامىن. مامىردا وسى جەكپە- جەكتىڭ جەڭىمپازىمەن كەزدەسىپ، تيتۋلداردى بىرىكتىرگىم كەلەدى، — دەپ جازدى جانىبەك ءالىمحان ۇلى.
مەكسيكالىق الۆارەس پەن مبيللي اراسىنداعى كەزدەسۋ 31- قازاندا ساۋد ارابياسىنىڭ ەر-رياد قالاسىندا وتەدى دەپ جوسپارلانعان. بۇل جەكپە-جەكتە ەكىنشى ورتا سالماقتاعى WBC چەمپيوندىق بەلبەۋى ساراپقا سالىنادى.
ال ءالىمحان ۇلى 2027 -جىلى 23 -قاڭتاردا دانيانىڭ حورسەنس قالاسىندا جەرگىلىكتى بوكسشى ياكوب بانكپەن كەزدەسەدى. ولار ەكىنشى ورتا سالماقتاعى بوس تۇرعان WBO الەم چەمپيونى اتاعىن ساراپقا سالادى.
ەسكە سالايىق، 2025 -جىلدىڭ سوڭىندا جانىبەك ءالىمحان ۇلىنىڭ دوپينگ-سىناماسىنان تىيىم سالىنعان مەلدوني انىقتالىپ، سونىڭ سالدارىنان ەريسلاندي لارامەن جوسپارلانعان چەمپيوندىق بەلبەۋلەردى بىرىكتىرۋ جەكپە-جەگى وتپەي قالعان ەدى. 2026 -جىلعى اقپاندا WBO قازاقستاندىق بوكسشىنى 2025 -جىلعى 2 -جەلتوقساننان باستاپ ءبىر جىلعا شەتتەتتى. ال ناۋرىزدا IBF بەلگىلەنگەن مەرزىمدە مىندەتتى جەكپە-جەگىن وتكىزە المايتىن بولعاندىقتان، ودان چەمپيوندىق بەلبەۋىن تارتىپ الدى. كەيىن بوكسشى قويىلعان تالاپتاردى ورىنداعان سوڭ، WBO شەتتەتۋ مەرزىمىن مەرزىمىنەن بۇرىن توقتاتىپ، جانىبەك ءالىمحان ۇلىنا 2026 -جىلعى 10 -شىلدەدەن باستاپ شارشى الاڭعا ورالۋعا مۇمكىندىك بەردى.
سونداي-اق ءالىمحان ۇلى ورتا سالماقتان (72,6 كەلىگە دەيىن) ەكىنشى ورتا سالماققا (76,2 كەلىگە دەيىن) اۋىسۋ تۋرالى شەشىم قابىلدادى. جاڭا سالماق دارەجەسىندە ونەر كورسەتۋ ءۇشىن ول وزىندە قالعان WBO چەمپيوندىق بەلبەۋىنەن ءوز ەركىمەن باس تارتتى. ياكوب بانكپەن وتەتىن جەكپە-جەك جانىبەكتىڭ ەكىنشى ورتا سالماقتاعى العاشقى كەزدەسۋى ءارى وسى سالماقتا الەم چەمپيونى اتانۋعا بەرىلگەن مۇمكىندىك بولماق.
بۇعان دەيىن قازاقستاندىق كاسىپقوي بوكسشى نيۋ-يوركتەگى ايگىلى Gleason’s Gym بوكس زالىنا باردى. امەريكالىق باپكەر دون سەكسبي جانىبەك ءالىمحان ۇلىنا جوعارى باعا بەرىپ، ونىڭ قاراپايىمدىلىعىنا ءتانتى بولعان ەدى.
