جاپونيا مەن ا ق ش جويعىش زىمىرانداردى بىرلەسىپ وندىرەدى
استانا. KAZINFORM —- جاپونيا مەن ا ق ش جاپونيا اۋماعىندا اۋە- اۋە ساناتىنداعى جەتىلدىرىلگەن ورتا قاشىقتىقتاعى زىمىرانداردى بىرلەسىپ شىعاراتىن كاسىپورىن قۇرۋعا كەلىستى. بۇل تۋرالى Kazinform اگەنتتىگى Anadolu-عا سىلتەمە جاساپ حابارلادى.
بۇل تۋرالى جاپونيانىڭ قورعانىس ءمينيسترى سينددزيرو كويدزۋمي فيليپپيندە وتكەن باسپا ءسوز ءماسليحاتىندا مالىمدەدى. ول وڭتۇستىك- شىعىس ازيا مەملەكەتتەرى قاۋىمداستىعى (اسەان) ەلدەرىنىڭ قورعانىس مينيسترلەرى مەن سەرىكتەستەرى قاتىسقان كەزدەسۋگە قاتىسىپ جاتىر.
كويدزۋميدىڭ ايتۋىنشا، مۇنداي كەلىسىمگە ا ق ش قورعانىس ءمينيسترى پيت حەگسەتپەن كەلىسسوزدەر بارىسىندا قول جەتكىزىلگەن.
زىمىران ءوندىرىسىن Operation Supercharge بىرلەسكەن باستاماسى اياسىندا ۇيىمداستىرۋ جوسپارلانىپ وتىر.
جاپونيا ءمينيسترى بۇل زىمىرانداردىڭ جاپونيا مەن ا ق ش قارۋلى كۇشتەرىنىڭ قاتارىنداعى بەسىنشى بۋىنعا جاتاتىن F-35 جويعىش ۇشاقتارى ءۇشىن ماڭىزى زور ەكەنىن اتاپ ءوتتى.
— ءبىز جاپونيا مەن ا ق ش اليانسىنىڭ تەجەۋ الەۋەتى مەن ارەكەت ەتۋ مۇمكىندىكتەرىن بۇرىن-سوڭدى بولماعان قارقىنمەن ءارى جەدەل نىعايتۋعا كەلىستىك، — دەدى كويدزۋمي.
ول سونداي-اق تاراپتار حالىقارالىق قۇقىق ۇستەمدىگىنە نەگىزدەلگەن ەركىن ءارى اشىق حالىقارالىق ءتارتىپتى قولدايتىنىن راستاعانىن ايتتى. بۇعان قوسا، كۇش نەمەسە قىسىم كورسەتۋ ارقىلى قالىپتاسقان جاعدايدى ءبىرجاقتى وزگەرتۋ ارەكەتتەرىنە قارسى ەكەنىن جەتكىزدى.
ەسكە سالايىق، بۇعان دەيىن جاپونيا مەن ا ق ش عارىش اپپاراتتارىن ۇشىرۋ ەرەجەلەرىن جەڭىلدەتۋ تۋرالى كەلىسىمگە كەلگەنىن حابارلاعان ەدىك. ەلدەر تەكسەرۋدىڭ ءبىرقاتار ءراسىمىن ستاندارتتاۋدى جوسپارلاپ وتىر. بۇل جاپون كومپانيالارىنا زىمىراندارىن ا ق ش- تاعى عارىش ايلاقتارىنان، ال امەريكالىق وپەراتورلارعا جاپونياداعى عارىش ايلاقتارىنان ۇشىرۋعا مۇمكىندىك بەرەدى.
