جاپونيادا جۇمىستان شىعۋ وڭاي شارۋا ەمەس

استانا. قازاقپارات - ستاتيستيكالىق دەرەكتەرگە سۇيەنەر بولساق، ون ەلدىڭ سەگىزىندە قىزمەتكەرلەرگە ەڭبەك شارتتارىن جاقسارتۋ تۋرالى ۇجىمدىق كەلىسسوزدەر جۇرگىزۋگە رۇقسات ەتىلمەيدى ەكەن، دەپ حابارلايدى 24kz.

ا ق ش-تا جۇمىستان شىعارۋ كەزىندە جاردەماقى تولەۋ تۋرالى زاڭ جوق. ءبارى كومپانيا باسشىلىعى مەن قىزمەتكەر اراسىنداعى جەكە كەلىسىمشارت نەگىزىندە شەشىلەدى. ال يتاليا ەڭبەك زاڭدارى قاتاڭ ساقتالاتىن ەلدەردىڭ قاتارىنا كىرەدى. مىسالى، ايەلدىڭ تۇرمىس قۇرعانىنا ءبىر جىلدان از ۋاقىت وتسە، ونى جۇمىستان شىعارۋعا بولمايدى. برازيليادا كومپانيا باسشىسى شتاتتاعى ادامدى قىزمەتىنەن بوساتاتىن بولسا، ءبىر ايلىعىن، دەمالىس بويىنشا تولەمدەرى مەن ايىپپۇل تولەۋگە مىندەتتى. ايىپپۇل مولشەرى قىزمەتكەردىڭ ەڭبەك وتىلىمىنە بايلانىستى.

ال جاپونيادا قازىر قىزمەتكەرلەردىڭ جۇمىستان شىعۋىنا جاردەمدەسەتىن ساراپشىلاردىڭ قىزمەتىنە سۇرانىس ارتىپ كەلەدى. مۇندا ادامدار ءبىر مەكەمەدە جىلداپ جۇمىس ىستەيدى. كەيبىرەۋلەرى تاۋلىگىنە 12 ساعات ەڭبەك ەتۋگە ءماجبۇر. ۇيگە ەرتە قايتۋ نە دەمالىس الۋ جاعى وڭاي شارۋا ەمەس. ال جۇمىستان شىعۋ ودان دا قيىن. ويتكەنى بۇل باسشىلىقتى قۇرمەتتەمەۋ دەپ سانالادى. سوندىقتان جەرگىلىكتى جۇرت ماسەلەنى زاڭدى تۇردە شەشىپ بەرەتىن فيرمالاردىڭ كومەگىنە ءجيى جۇگىنەتىن بولعان.

ال كاسىپوداقتاردىڭ پارمەنى قانداي؟ جاھاندىق يندەكس قۇرۋدا 151 ەلدەگى جاعداي سارالانعان. سولاردىڭ ىشىندە ەڭبەك ەتۋشى قۇقىقتارىنىڭ ساقتالۋى بويىنشا ەڭ قيىن احۋال تاياۋ شىعىس پەن سولتۇستىك افريكادا. اتالعان وڭىرلەردەگى ەلدەردىڭ كوبىندە ۇجىمدىق كەلىسسوزدەر جۇرگىزۋ، كاسىپوداقتى تىركەۋ نە ونىڭ قۇرامىنا كىرۋ قۇقىقتارى بۇزىلعان.

بيىل جۇمىسشىلار ءۇشىن ەڭ قولايسىز مەملەكەتتەردىڭ وندىعىنا بانگلادەش، بەلارۋس، ەكۆادور، ەگيپەت، ەسۆاتيني، گۆاتەمالا، ميانما، فيليپپين، تۋنيس پەن تۇركيا كىرگەن. ال ۇزدىكتەر قاتارىندا اۆستريا، دانيا، نورۆەگيا، گەرمانيا سەكىلدى ەۋروپا ەلدەرى تۇر.

يندەكسكە 151 مەملەكەت كىرسە، سونىڭ 131-ىندە ەرەۋىلدەرگە قاتىسۋعا قاتىستى زاڭبۇزۋشىلىقتار تىركەلگەن. مىسالى، فرانتسيادا زەينەت جاسى تۋرالى رەفورماعا قارسى نارازىلىق اكسيالارىنان كەيىن ەڭبەك كونفەدەراتسياسىنداعى مىڭنان اسا ادام سوتقا تارتىلعان. دەسە دە، ماماندار «وڭ بەتبۇرىس تا جوق ەمەس»، دەيدى. ولار ا ق ش- تى مىسالعا كەلتىرەدى. مۇندا جۇمىسشىلار مەن كاسىپوداقتار جاقسى ناتيجەگە قول جەتكىزدى. دەترويتتاعى اۆتوموبيل قۇراستىرۋشىلار كاسىپوداعىنىڭ ۇيىمداستىرعان نارازىلىق شاراسىنىڭ ناتيجەسىندە قىزمەتكەرلەردىڭ جالاقىسى كوتەرىلگەن. گولليۆۋدتاعى ەرەۋىلدەر كەزىندە سسەناريشىلەر مەن اكتەرلەر ءوز جۇمىستارىندا جاساندى ينتەللەكتىنىڭ قولدانىلۋىن شەكتەۋ تۋرالى تالاپتارىن ورىنداتا الدى. سونىمەن قوسا، جالاقىسىن كوتەرۋ بويىنشا دا كەلىسىمگە كەلە الدى.