جاپونياعا ساياحاتتاۋ ارزاندادى

استانا. قازاقپارات - جاڭا جىل - ساياحات ماۋسىمى. مەرەكە جاقىنداعان سايىن الەمدە تۋريستەر سانى دا كۇرت ارتادى. ءبىر عانا امەريكانىڭ وزىندە دەمالىس قارساڭىندا 119 ميلليونعا جۋىق ادام وزگە ايماقتارعا ساپارلايدى.

ولار بۇل كۇنى ۆەتنام، تايلاند، تايۆاننىڭ جاڭا جىلىن كورۋگە اسىعادى. ال ەۋروپالىقتار مەرەكەدە مۇحيت جاعاسىندا كۇنگە قىزدىرىنۋدى قۇپ كورەدى. ازيا مەن تاياۋ شىعىس تۋريستەرى ساقىرلاعان سارى ايازدى سەزىنۋ ءۇشىن رەسەيدە دەمالۋدى ءجون سانايدى ەكەن.

وسى ءساتتى ءتيىمدى پايدالانعان ءبىراز ەل ساياحاتشىلار ءۇشىن تاڭعاجايىپ مۇمكىندىكتەر ۇسىنادى.

ۆەتنام تۇمسا تابيعاتىمەن ماقتانادى

تۋريستەر ءۇشىن دەمالىسقا قولايلى ايماق - ۆەتنام. ءۇندى- قىتاي تۇبەگىندەگى تروپيكالىق جۇماققا بيىل دا ساياحاتشىلار اعىلىپ جاتىر. اسىرەسە، جاڭا جىل قارساڭىندا ولاردىڭ قاتارى ەسەلەپ ارتادى. Agoda حالىقارالىق ونلاين قوناق ءۇي برونداۋ ۇيىمىنىڭ مالىمەتىنە قاراعاندا، بيىل بۇل ەلدە جاتىن ورىنعا تاپسىرىس بەرۋشىلەر قاتارى 30 پايىز وسكەن. اسىرەسە وڭتۇستىك كورەيا، جاپونيا، تايلاند، تايۆان، ءتىپتى ا ق ش-تان ارنايى ساياحاتتاپ كەلۋشىلەر قاراسى قالىڭ. ولاردىڭ تاڭداۋى حوشيمين شاھارىنا تۇسكەن. مۇنان سوڭ رومانتيكالىق دالات تاۋى مەن ۆۋنگتاۋ جانە نياچانگ جاعاجايى ۇزدىك دەمالىس ايماعى رەتىندە سۇرانىستان تۇسپەي تۇر. جىل باسىنان تاڭعاجايىپ ولكەگە شامامەن 16 ميلليون تۋريست ساياحاتتاپ بارعان. بۇل بىلتىرمەن سالىستىرعاندا 41 پايىز ارتىق.

لام ۆۋ، ۆەتنامداعى اgoda ۇيىمىنىڭ ديرەكتورى:

- جاڭا جىلدى اتاپ ءوتۋ بويىنشا ۆەتنام تۋريستەر اراسىندا ۇلكەن تانىمالدىلىققا يە. بۇل ەلدىڭ تارتىمدى مادەنيەتى، ەلىتىپ اكەتەتىن ەنەرگياسى مەن تابيعي سۇلۋلىعىنىڭ ەرەكشە ۇيلەسىمدىلىگىنە بايلانىستى.

تايلاند تۋريستەر ءۇشىن قوسىمشا اۋە رەيسىن اشتى

تۋريستەر اراسىندا سۇرانىسقا يە ازياداعى تاعى ءبىر ەل - تايلاند. جاڭا جىل قارساڭىندا ايماققا ساياحاتتاپ بارۋشىلار كوبەيەدى. ەسەسىنە تاي بيلىگى مەرەكە كۇندەرى تۋريزمنەن مەملەكەت تايقازانىنا 62 ميلليارد بات، بىزدىڭشە 1 تريلليون تەڭگە تابىس ءتۇسىرۋدى كوزدەپ وتىر. بۇل وتكەن جىلعا قاراعاندا %23 كوپ. ساياحاتشىلاردىڭ ەلدى ەمىن-ەركىن كەزۋى ءۇشىن جان-جاقتى مۇمكىندىك قاراستىرعان. 93 ەلگە ۆيزاسىز رەجيم ەنگىزىپ، قىتاي، وڭتۇستىك كورەيا، تايۆان، ءۇندىستان، سكانديناۆيا مەن فرانسيا سياقتى بىرنەشە مەملەكەتتىڭ تۇرعىندارى ءۇشىن قوسىمشا اۋە رەيستەرىن اشتى. اۋە بيلەتتەرىنە %30 جەڭىلدىك ۇسىنعان.

تاپاني كياتفايبۋل، تايلاند تۋريزم باسقارماسىنىڭ باسشىسى:

- جاڭا جىل قارساڭىندا تۋريستىك سەكتوردىڭ قارقىندى دامۋى ۇزدىكسىز جۇمىستىڭ ناتيجەسى. ودان تۇسەتىن تابىس كولەمى تايلاندتىڭ تارتىمدىلىعى مەن تۋريستىك باعىت بويىنشا ۇلكەن تانىمالدىلىققا يە ەكەنىن اڭعارتادى.

جاپونياعا ساياحاتتاۋ ارزاندادى

جاپونيانىڭ كەلگەن جاندى باۋراپ الاتىن بايىرعى ءداستۇرى مەن تۇمسا تابيعاتى بيىل دا ەلدىڭ تۋريستىك سەكتورىن تارتىمدى ەتە ءتۇستى. كۇنشىعىس ەلى كەيىنگى 11 ايدا 33 ميلليون تۋريست قابىلداپ، رەكورد ورناتتى. ساياحاتشىلاردىڭ كۇرت اعىنىن ساراپشىلار جاپون يەنىنىڭ قۇلدىراۋىمەن بايلانىستىرادى. بۇل ولاردىڭ ەلدى ەركىن كەزۋىن قولجەتىمدى ەتە ءتۇستى. سونداي-اق قىزمەت تۇرلەرىن ارزانداتىپ، ساۋدا جاساۋدى جەڭىلدەتتى. ستاتيستيكاعا سۇيەنسەك، سولتۇستىك امەريكا، ەۋروپا مەن ازيا جۇرتى جاپونياعا ءجيى ات باسىن بۇرادى. ولاردىڭ قاتارى بىلتىرعا قاراعاندا %30- عا ارتقان.

ماسكەۋ قىسى: ەكستريم مەن شىتىرمان

قىستىگۇنى اياز بەن سۋىقتان قاجىعان جۇرت جاڭا جىلدا جىلى جاققا قاراي دەمالىسقا اتتانسا، اراب ەلدەرى مەن تاياۋ شىعىستاعى مەيماندار ماسكەۋگە ساياحاتتاۋدى ءجون كورەدى. ساراپشىلار مۇزدى شاھاردىڭ تۋريستەر اراسىندا تانىمال بولۋىن اۋە رەيستەرىنىڭ قولجەتىمدىلىگىمەن بايلانىستىرىپ وتىر. سونىمەن قاتار سانكت-پەتەربۋرگ تە قىسقى ساپار ءۇشىن قولايلى بولىپ تۇر. ويتكەنى كەلۋشىلەر قىستىڭ كوركى اپپاق قاردا سەيىل قۇرىپ، حاسكيمەن سەرۋەندەگەندى، ەكستريم مەن شىتىرماندى كوزبەن كورىپ، مۇز ۇستىندە سىرعاناۋدى قۇپ كورەدى.

مۇنىمەن قوسا، رەسەيلىك تۋريزم سەكتورى كەلۋشىلەرگە ورمان ىشىندە تانكىمەن ءجۇرۋ، مۇز ۇستىندە كرۋيز ۇيىمداستىرۋ سياقتى دەمالىستىڭ ءتۇر-ءتۇرىن ۇسىنىپ وتىر. اسىرەسە بۇل مەزگىلدە كۋۆەيت، ساۋد ارابياسى، باحرەين، ومان، يران، ءۇندىستان، گەرمانيا تۇرعىندارى رەسەيگە ءجيى ساياحاتتاپ كەلەدى.

امەريكا مەرەكەدە كەپتەلىستەن كوز اشپاۋى مۇمكىن

نيۋ-يورك جاڭا جىلدا تۋريستەردى قابىلداۋعا ساقاداي ساي. قاربالاسقا تولى كەزەڭدە امەريكادا قالاارالىق ساياحاتتان بولەك، شەكارا اسىپ، ەل كەزەتىندەر كوبەيەدى. سىرتتان كەلۋشى مەيماندار دا ەسەلەپ ارتادى. جەرگىلىكتى اۆتوموبيل قاۋىمداستىعىنىڭ مالىمەتىنە قاراعاندا، شامامەن 119 ميلليون ادام جاڭا جىلدا ساياحاتتايدى. «بۇل ەل ىشىندە كەپتەلىس بولىپ اۋە، كولىك قوزعالىسىنىڭ كەيىنگە شەگەرىلۋىنە اكەلۋى مۇمكىن»، - دەيدى بيلىك وكىلدەرى.

ساياحاتشىلار ءۇشىن قولجەتىمدى ايماق –سەربيا

ال كارى قۇرلىقتا سەربياعا ساياحاتتاۋ قالتاعا سالماق سالمايدى. جيھاز، توسەك ورنىمەن جابدىقتالعان پاتەرگە ءبىر تاۋلىك تۇنەۋ بار بولعانى 17 ەۋرو، بىزدىڭشە 9 مىڭ تەڭگە. ال شاھاردى ارالاپ، مادەني ورىندارعا ساياحاتتاۋ قاراجات قاجەت ەتپەيدى. ءبىراز تاريحي-مادەني ورىندار مەيمانداردى اقىسىز قابىلدايدى. بەلگراد پەن سكادارليا ساياحاتشىلار ءۇشىن قولايلى ءارى قولجەتىمدى. ال قازاقستاندىق تۋريستەر قىسقى ماۋسىمدا بۋراباي مەن شىمبۇلاقتىڭ سامال اۋاسىمەن تىنىستاپ، شاڭعى-شانامەن سەرۋەندەگەندى جاقسى كورەدى. قالتالىلار ستامبۇل، دۋباي، تايلاند، ۆەتنام سياقتى كليماتى جىلى ايماقتارعا ءجيى ساياحاتتايدى.

24.kz