جاپونيا مەن قازاقستان ەكونوميكا، بيزنەس جانە ەكولوگيا سالاسىندا ايتارلىقتاي ىلگەرىلەۋگە قول جەتكىزدى - ەلشى
استانا. KAZINFORM - استانادا جاپونيانىڭ 126- ۇلى مارتەبەلى يمپەراتورى نارۋحيتونىڭ 64 جاسقا تولعان تۋعان كۇنى اتالىپ ءوتىلدى. قازاقستانداعى جاپونيا ەلشىلىگى ۇيىمداستىرعان سالتاناتتى شاراعا ديپلوماتتار، ءماجىلىس دەپۋتاتتارى مەن باسقا دا قۇرمەتتى قوناقتار قاتىستى.
«بيىل 23-اقپاندا 64 جاسقا تولعان جاپونيانىڭ 126- ۇلى مارتەبەلى يمپەراتورى نارۋحيتونىڭ تۋعان كۇنىن سىزدەرمەن بىرگە اتاپ ءوتۋ مەن ءۇشىن ۇلكەن مارتەبە. ءبىزدىڭ ورتاق تىلەگىمىز قانداي دا ءبىر جولمەن استانادان توكيوداعى مارتەبەلى يمپەراتور سارايىنا جەتەدى دەپ شىن جۇرەكتەن ۇمىتتەنەمىن. ءبىزدىڭ ۇلتتىق كۇنگە ارنالعان قابىلداۋدى قازاقستاندا ءۇشىنشى رەت وتكىزىپ وتىرمىن. جاپونيادا 3 ناۋرىزدا تويلاناتىن قىزدار مەرەكەسىنە وراي «حينا- نينگيە» قۋىرشاقتارىن بىلتىرعىداي كىرەبەرىسكە قويدىق. جاپونيادا دا، قازاقستاندا دا ايەلدەردىڭ قوعامداعى الەۋەتىن ودان ءارى تەرەڭىرەك ءتۇيسىنۋدى جالعاستىرۋدامىز. جاقىندا پرەزيدەنت قاسىم-جومارت توقايەۆتىڭ وتە ماڭىزدى ءۇردىستى ۇلتتى تۇتاستاي العاندا بولاشاققا ىلگەرىلەتۋدەگى زور الەۋەتىنىڭ قاينار كوزى رەتىندە اتاپ وتكەنى ەسىمدە»، - دەدى جاپونيانىڭ قازاقستان رەسپۋبليكاسىنداعى ەلشىسى دجۋن يامادا سالتاناتتى شارانىڭ اشىلۋىندا.
سونداي-اق، ەلشى قازاقستاندى گەندەرلىك ساياساتتا كوشباسشى ەلدەردىڭ ءبىرى ەكەندىگىن ايتتى.
«پرەمەر-ءمينيستردىڭ ورىنباسارى تامارا دۇيسەنوۆا، مادەنيەت جانە اقپارات ءمينيسترى ايدا بالايەۆا، دەنساۋلىق ساقتاۋ ءمينيسترى اقمارال ءالنازاروۆا، قازاقستان رەسپۋبليكاسى پارلامەنتى ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى ايگۇل قۇسپان، كونستيتۋتسيالىق سوت ءتوراعاسى ەلۆيرا ءازىموۆا، قازاقستان رەسپۋبليكاسىنىڭ پرەزيدەنتىنىڭ كەڭەسشىسى - پرەزيدەنتتىڭ حالىقارالىق ەكولوگيالىق ىنتىماقتاستىق جونىندەگى ارناۋلى وكىلى ءزۇلفيا سۇلەيمەنوۆا سەكىلدى بەدەلدى حانىمدارى بار قازاقستان وسى سالاداعى الەمدىك كوشباسشىلاردىڭ ءبىرى»، - دەيدى ول.
ودان ءارى دجۋن يامادا مىرزا قازاقستان مەن جاپونيا اراسىنداعى قارىم-قاتىناسقا توقتالدى.
«الەمدەگى تۇراقسىز گەوساياسي جاعدايعا قاراماستان جاپونيا مەن قازاقستان وتكەن جىلى وتە جەمىستى جانە تابىستى دامۋعا قول جەتكىزدى. بىلتىر شىلدە ايىندا جاپونيا-قازاقستان پارلامەنتتىك دوستىق ليگاسىنىڭ ءتوراعاسى ەندو مىرزا استاناعا كەلىپ، ءبىرقاتار ماڭىزدى كەزدەسۋ وتكىزدى. سونىڭ ىشىندە ءماجىلىس ءتوراعاسى ەرلان قوشانوۆ جانە سەنات ءتوراعاسى ماۋلەن اشىمبايەۆ مىرزامەن كەزدەسىپ، سونداي-اق پرەزيدەنت ق. توقايەۆ مىرزامەن ىزەتتىلىك جۇزدەسۋ وتكىزدى»، - دەيدى جاپون ەلشىسى.
ودان بولەك، ەلشى جاپونيانىڭ قارجى مينيسترلىگىنىڭ حالىقارالىق ىستەر جونىندەگى ۆيتسە-ءمينيسترى كاندانىڭ قازاقستانعا ساپارى، سول كەزدەگى ق ر پرەمەر-ءمينيستردىڭ ورىنباسارى-قارجى ءمينيسترى ەرۇلان جاماۋبايەۆتىڭ جاپونياعا ساپارى، جاپونيانىڭ بۇرىن پارلامەنتتىك سىرتقى ىستەر ءمينيسترى شيكاۆانىڭ، جاپونيانىڭ ەكونوميكا ساۋدا جانە يندۋستريا ءمينيسترى كودزۋكي مىرزانىڭ ەلىمىزگە ساپارى تۋرالى ايتتى.
«جاپونيا مەن قازاقستان ەكونوميكا، بيزنەس جانە ەكولوگيا سالاسىندا ىنتىماقتاستىق ايتارلىقتاي ىلگەرىلەۋگە قول جەتكىزدى. اسىرەسە، وتكەن جىلى قازاندا «بىرلەسكەن نەسيەلىك مەحانيزم» بويىنشا ىنتىماقتاستىق تۋرالى مەموراندۋمنىڭ جاسالعانىن اتاپ وتۋگە بولادى. بۇل ءساتتى كەلىسىم بولدى، مەموراندۋمعا توكيودا وتكەن ەكونوميكالىق ىنتىماقتاستىق جونىندەگى قازاقستان مەن جاپونيانىڭ ۇكىمەتتىك جانە جەكە سەكتورلارىنىڭ بىرلەسكەن كوميسسياسىنىڭ وتىرىسى قارساڭىندا قول قويىلدى. بۇل وقيعا COVID-19 پاندەمياسىنا جانە باسقا دا فاكتورلارعا بايلانىستى 5 جىلدىق ۇزىلىستەن كەيىن ورىن الدى»، - دەيدى د. يامادا.
ونىڭ ايتۋىنشا، بيىل قاڭتاردا جاپونيانىڭ ەكونوميكا، ساۋدا جانە يندۋستريا ءمينيسترى سايتو مەن قازاقستان رەسپۋبليكاسىنىڭ ەنەرگەتيكا ءمينيسترى الماسادام ساتقالييەۆ جاسىل ەنەرگەتيكاعا كوشۋدى جۇزەگە اسىرۋ بويىنشا ىنتىماقتاستىق مەموراندۋمعا قول قويعان.
«ارادا ءۇش كۇن وتكەننەن كەيىن استانادا جاپون-قازاق بيزنەس فورۋمى ءساتتى ءوتتى. مەملەكەتتىك مينيستر كودزۋكيدىڭ جوعارى اتاپ وتكەن ساپارىنىڭ ماقساتى - ءىشىنارا، ەكىجاقتى ەكونوميكالىق قارىم-قاتىناستاعى وسى ماڭىزدى وقيعالارعا بايلانىستى بولعان ەدى»، - دەيدى ول.
اۆتور
داۋلەت ىزتىلەۋ
