جاپون اسكەرى 79 جىلدان كەيىن كەشىرىم سۇراۋ ءۇشىن قىتايعا كەلدى
استانا. KAZINFORM - قىتايعا شاپقىنشىلىق جاساعان جاپون قارۋلى كۇشتەرىنىڭ 731- ارنايى ءبولىمىنىڭ مۇشەسى بولعان حيدەو شيميزۋ 79 جىلدان كەيىن حاربين قالاسىنا كەلدى.
شينحۋا اگەنتتىگىنىڭ حابارلاۋىنشا، حيدەو شيميزۋ 13 -تامىز كۇنى حاربين قالاسىنداعى جاپون باسقىنشى ارمياسىنىڭ 731- بولىمشەسىنىڭ ەسكى ورنىندا ورنالاسقان مۇراجايعا بارىپ، باسقىنشى ارميانىڭ قىلمىسىن اشكەرەلەپ، كەشىرىم سۇراماقشى.
حيدەو شيميزۋ بيىل 94 جاستا. ول 1945 -جىلى ناۋرىز ايىندا حاربين قالاسىنا 731- ارنايى ءبولىمىنىڭ سوڭعى جاساعى رەتىندە كەلىپ، 4 اي اسكەري قىزمەت اتقارعان. 1945 -جىلى 14 -تامىزدا ول جاپون اسكەرلەرىمەن بىرگە ەلىنە قايتا قاشادى.
حاربين قالاسى جاپونيا ەكىنشى دۇنيەجۇزىلىك سوعىس كەزىندە ميكروب قارۋىن زەرتتەيتىن بازالىق لاگەر بولدى. 731- ارنايى اسكەري ءبولىم وسىندا پاتوگەندىك باكتەريالاردى ءوسىرۋ، ۆيۆيزاتسيا جۇرگىزۋ جانە ادامعا تاجىريبە جۇرگىزۋ سىندى زاڭسىز زەرتتەۋلەر جۇرگىزگەن.
2016 -جىلى حيدەو شيميزۋ كوپشىلىك الدىندا ءسوز سويلەپ، سۇحبات بەرىپ، جاپون باسقىنشىلارى جاساعان قىلمىسىن اشكەرەلەپ، تاريحي شىندىقتى جاريالادى.
ايتا كەتەرلىگى، حيدەو شيميزۋ 731- ارنايى ءبولىمىنىڭ بىردەن-ءبىر ءتىرى مۇشەسى.
اۆتور
مۇحتار قاليموللا ۇلى
