جاتىر موينى وبىرىنا قارسى بەس ۆاكسينا بار - دارىگەر

الماتى. KAZINFORM - ەلىمىزدە جاتىر موينى وبىرى ايەلدەردە ونكولوگيالىق اۋرۋلار بويىنشا ەكىنشى ورىندا. دەگەنمەن، دارىگەرلەر دەرتتىڭ الدىن الۋعا بولاتىنىن ايتادى.

الماتى ونكولوگيالىق ورتالىعىنىڭ ونكوگينەكولوگيالىق ءبولىم مەڭگەرۋشىسى رايحان بولاتبەكوۆانىڭ ايتۋىنشا، جاتىر موينى وبىرى ەلدەگى ايەلدەردە ءجيى كەزدەسەتىن قاتەرلى ىسىكتەردىڭ ءبىرى.

«جاتىر موينى وبىرى ايەلدەردە ونكولوگيالىق اۋرۋلار بويىنشا ەكىنشى ورىندا، جىل سايىن وسى قاتەرلى دەرتتىڭ 2000-نان استام جاڭا جاعدايى تىركەلەدى. الماتىدا 2023 -جىلى 223 ايەلدەن اتالعان اۋرۋ انىقتالدى. سوڭعى ونجىلدىقتا اۋرۋ 20-30 جاس ارالىعىنداعى جاس كەلىنشەكتەردە ءجيى كەزدەسەدى»، - دەدى دارىگەر.

ۇلتتىق ونكورەگيستردىڭ دەرەكتەرى بويىنشا الماتىدا جاتىر موينى وبىرىنىڭ %55 - ى ءبىرىنشى كەزەڭدە انىقتالادى. ساراپشىلار اۋرۋدىڭ ەرتە دياگنوستيكاسىنىڭ ءوسۋى ونى ەرتە انىقتاۋعا باعىتتالعان سكرينينگتىك باعدارلامامەن بايلانىستى ەكەنىن اتاپ ءوتتى.

سونداي-اق قاۋىپتى دەرت ادام پاپيللوما ۆيرۋسى ارقىلى پايدا بولاتىندىقتان، ۆاكسينا ارقىلى الدىن الۋعا بولادى.

«بيىل جاڭا وقۋ جىلىنان باستاپ، اتا-اناسىنىڭ كەلىسىمىمەن، 11 جاستان اسقان جاسوسپىرىم قىزدارعا جاتىر موينى وبىرىنا قارسى ۆاكسينا تەگىن سالىنادى. جاتىر موينى وبىرىنا قارسى ۆاكسيناتسيا ءارتۇرلى ەلدەردە وسى اۋرۋدان بولاتىن سىرقاتتانۋشىلىق پەن ءولىمدى %70-97 - عا تومەندەتۋگە مۇمكىندىك بەردى. جاپپاي ۆاكسيناتسيانىڭ نەگىزگى كونتينگەنتى - 9-13 جاس ارالىعىنداعى جاسوسپىرىم قىزدار» ، - دەدى ول.

ايتۋىنشا، ايەلدەرگە جىنىستىق قاتىناس باستالعانعا دەيىن ۆاكسينا الۋ ۇسىنىلادى.

«بۇگىنگى كۇنى جاتىر موينى وبىرىنا قارسى بەس ۆاكسينا بار: ەكەۋى ەكى ۆالەنتتى، ەكەۋى ءتورت ۆالەنتتى جانە بىرەۋى توعىز ۆالەنتتى. بارلىق ۆاكسينالار د د ۇ ماقۇلداعان جانە قاۋىپسىز دەپ سانالادى»، - دەدى سپيكەر.

وسىعان دەيىن ادام پاپيللوماسى ۆيرۋسىنا قارسى ەكپە العان الماتىلىقتاردىڭ انا اتانعانى تۋرالى جازعان ەدىك.

اۆتور

الما مۇقانوۆا