جاساندى ينتەللەكت: فيلم تۇسىرەتىن قوسىمشا شىقتى

استانا. قازاقپارات - جاساندى ينتەللەكتتى ايتقاندا، كوپشىلىگىمىز ونىڭ تاياۋ ارادا ومىرىمىزگە ەنىپ كەتەنىنە سەنبەگەنىمىز راس. الايدا ايتىپ اۋىز جيعانشا، نەيرو جەلىنىڭ جەمىسىن قازىردىڭ وزىندە تام-تۇمداپ كورىپ جاتىرمىز.

кино
Фото: pixabay.com

الەۋمەتتىك جەلىدە جاساندى ينتەللەكتىنىڭ كومەگىمەن جاسالعان سۋرەتتەردەن كوز سۇرىنەدى. شىن-وتىرىگى قايسى، اجىراتۋ وتە قيىن. سۋرەت بىلاي تۇرسىن، جاساندى ينللەكتىمەن ءبۇتىن ءبىر فيلم تۇسىرۋگە دە بولادى ەكەن. سوندا سان جىل وقىپ-توقىعان وپەراتور، رەجيسسەر، ءتىپتى اكتەرلەر دە كەرەك بولماي قالۋى مۇمكىن، - دەيدى ماماندار. قىزىق، ءيا؟!

كوپ ۇزاماي، مىناداي كۇردەلى فيلمدەردەردى ءبىر ادام عانا تۇسىرە الاتىنداي مۇمكىندىك تۋادى. سەبەبى جاساندى ينتەللەكتى كوپ ادامنىڭ جۇمىسىن ءبىر ءوزى اتقارا الادى. قولىڭىزداعى دايىن سسەناري كوركەم تەلەتۋىندىعا اينالۋى ءاپ-ساتتە.

نەيروجەلىنىڭ مۇمكىندىكتەرىن ءجىتى زەرتتەپ جۇرگەندەردىڭ ءبىرى ەرزات دۋلات. ول ءاپ-ساتتە ءماتىندى بەينەگە اينالدىراتىن قوسىمشا ويلاپ تاپتى. جاس ونەرتاپقىش بۇل جوبانى 1 جىل ىشىندە جاساپ شىققان. قازىر ەرزاتتىڭ بۇل تۋىندىسىنا شەتەلدىڭ ازۋىن ايعا بىلەگەن ايتي كومپانيالارى قىزىعىپ وتىر. جاس جىگىت جاساندى ينتەلەكتىنىڭ كومەگىمەن الەمدىك كينو سالاسىن ءدۇر سىلكىندىرۋدى قالايدى.

ەرزات دۋلات، ونەرتاپقىش:

- ءبىز ماشينالىق وقىتۋعا نەگىزدەلگەن مودەلدەر قۇراستىرامىز. بۇل اۋقىمدى نەيروجەلىلەر ءماتىن مازمۇنىنا ساي بەينە جاسايدى. ماسەلەن، ەگەر ءسىز مۋلتفيلم، فيلم نەمەسە بەينەبايان تۇسىرگىڭىز كەلسە، پروداكشن قۇرىپ، ول ءۇشىن وپەراتور، رەجيسسەر سىندى ارنايى مامانداردى جالداۋدىڭ قاجەتى جوق. ونىڭ ورنىنا ءبىز ويلاپ تاپقان «رەال مەدجيك» اتتى قوسىمشانى قولدانساڭىز بولادى. ول قولىڭىزداعى سسەناريگە ساي سىزگە كەرەك كونتەنتتى جاساپ بەرەدى.

ايتي سالاعا قىزىعۋشىلىعى ەرتە ويانعان ەرزاتتىڭ قادامى نىق. ول كوپ جىلعى ىزدەنىسىن وزگەلەرمەن ءبولىسىپ، ءوزى سەكىلدى وزىق ويلى جاستاردىڭ شوعىرىن قالىپتاستىردى. قازىر ول قۇرعان كومپانيادا جيىرمادان استام ءبىلىمدى ءھام بىلىكتى مامان جۇمىس ىستەيدى. دەنى - حالىقارالىق فيزيكا جانە ماتەماتيكا وليمپيادالارىنىڭ جەڭىمپازدارى. ەلىمىزدىڭ ءار وڭىرىنەن جيىلعان قيالى ۇشقىر جاستار بۇعان دەيىن دە ۇيالى تەلەفونعا ارنالعان قوسىمشالار ويلاپ تاپقان. ولارعا شەتەلدەن 16 ميلليون ا ق ش دوللارى شاماسىندا ينۆەستيتسيا تارتتى.

الەن بايەۆ، ونەرتاپقىش:

- جاساندى ينتەللەكتىنىڭ كومەگىمەن بەينەكورىنىستەر جاساپ، ەشكىمدى تاڭقالدىرا المايسىز، ءبىزدى تولعاندىرعان ماسەلە: بۇل شىنايى تۇسىرىلىمدەردى الماستىرا الا ما؟ مەنىڭ ويىمشا ءبىز بۇل سۇراققا 2025 -جىلدىڭ اياعىندا ناقتى جاۋاپ الا الامىز.

دەسە دە وسى سالاداعى ساراپشىلار الداعى 3 جىلدا كوگىلدىر ەكراننان كورسەتىلەتىن بەينەكورىنىستەردىڭ باسىم بولىگى جاساندى ينتەلەكتىنىڭ جەمىسى بولادى دەپ نىق سەنىممەن ايتىپ وتىر. قازاقستاندىق ونەراپتقىشتاردى اتتاي قالاپ، قىرۋار قارجى تولەۋگە قۇلىقتى كاسىپكەرلەر از ەمەس. الايدا، بۇل جىگىتتەر شەتەل اسۋدى ەمەس، قازاقستاندا ەڭبەك ەتۋدى تاڭداعان.

ەرزات دۋلات، ونەرتاپقىش:

- ءبىز نەيروندىق جەلىمەن جۇمىس ىستەۋ ءۇشىن وتە كۇردەلى ينفراقۇرىلىم جاساقتادىق. ول ءۇشىن ماشينالىق وقىتۋ سالاسىندا تەرەڭ ىزدەنىس پەن كوپتەگەن زەرتتەۋلەر كەرەك. الەمدە مۇنداي كۇردەلى وپەراتسيالاردى اتقارىپ وتىرعان كومپانيالار ساناۋلى. دەنى امەريكاداعى مايكروسوفت، گۋگل، وپەن اي سەكىلدى الپاۋىتتار. ال ءبىز قازاقستاندا ءدال وسىنداي بىرەگەي تەحنولوگيالىق يننوۆاتسيالار الاڭىن قۇردىق.

قازىرگى ۋاقىتتا كومپانيانىڭ ونىمدەرىن قولدانۋشىلار سانى كۇن ساناپ ارتۋدا. تاباندى ەڭبەك پەن بولاشاققا دەگەن سەنىمنىڭ ارقاسىندا ۇيىم قىسقا ۋاقىت ىشىندە الەمدىك رەيتينگتىڭ توپ-25- ءىن باعىندىرىپ ۇلگەردى.

نازەركە توقجان، مارات ديحانبايەۆ

24.kz

سوڭعى جاڭالىقتار