جاساندى جۇرەك سالدىرتقان شىمكەنتتىكتەر كولىك تىزگىندەپ، توي تويلاپ ءجۇر

استانا. قازاقپارات- جاساندى جۇرەك سالدىرعان شىمكەنتتىكتەر تاكسي ايداپ، تويعا بارىپ ءجۇر. دارىگەرلەر جاڭا تەحنولوگيانى مەڭگەرىپ، ءبىراز ادامنىڭ ءومىرىن ساقتاپ قالدى.

مۇنداي وپەراتسيالار الەۋمەتتىك مەديتسينالىق ساقتاندىرۋ قورى ەسەبىنەن جاسالىپ جاتىر. جاڭا تەحنولوگيا 36 جاستاعى مۇحاممەد تاجيددينوۆكە دە ءۇمىت سىيلادى. ول ءۇش كلينيكالىق ولىمنەن امان قالعان. جاساندى جۇرەك يمپلانتاتسياسىنان كەيىن ونىڭ ءومىرى تۇبەگەيلى وزگەردى.

مۇحاممەد تاجيددينوۆ، تۇركىستان وبلىسىنىڭ تۇرعىنى:

- بارلىعى ايتتى. مەن 2-3 ادامعا ىستەتپەيمىن دەدىم. ماما دا، جاڭا كەلگەن اپكەم، ولارعا دا ايتتىم مەن، ىستەتپەيمىن دەدىم. قانشا ءومىر سۇرەمىن، سوعان دەيىن جۇرەمىن دەدىم. جوق ىستەت دەدى. سونى ىستەتتىم، جاقسى شىقتى.

جاساندى جۇرەكتىڭ بارلىق بولشەكتەرى كەۋدە قۋىسىنىڭ ىشىنە ورنالاستىرىلادى. ال ەلەكتر قۋاتىنا ارنالعان قۇرىلعى سىرتقا شىعارىلىپ، ارنايى باتارەياعا قوسىلادى. ونى مۇحاممەد كىشكەنە سومكەگە سالىپ، ءارقاشان وزىمەن بىرگە الىپ جۇرەدى.

ەران باعداۋلەت، «شىمكەنت جۇرەك ورتالىعى» ك ە ا ق ۇيلەستىرۋشىسى:

- جۇرەك تابىلعانشا بۇل اپپاراتپەن ءومىر سۇرۋگە بولادى. تويعا بارۋ، شەتەلگە قىدىرۋ، كادىمگىدەي ءومىر سالتىمەن جۇمىس جاساپ جۇرە بەرەدى. ءبىزدىڭ ناۋقاستارىمىز بار، تاكسي بولىپ جۇرەدى. بولەك جۇمىس جاسايتىندارى بار. شەتەلگە باراتىندارى بار. ول اپپاراتتى قويعان جاعدايدا ادام مۇگەدەك بولىپ، ۇيىنەن شىقپاي قالمايدى. قايتا ءومىرىن ساقتاپ تۇرادى ول اپپارات.

جاساندى جۇرەك يمپلانتاتسياسى الەۋمەتتىك مەديتسينالىق ساقتاندىرۋ قورىنىڭ قاراجاتى ەسەبىنەن جاسالادى. بۇل ءومىرى قىل ۇستىندە تۇرعان جانداردىڭ قارجىلىق شىعىندارسىز كومەك الۋىنا مۇمكىندىك بەرەدى.

ءسابيت قۇرالبەك، «مىندەتتى الەۋمەتتىك مەديتسينالىق ساقتاندىرۋ قورى» ك ە ا ق شىمكەنت قالاسى بويىنشا فيليالىنىڭ ديرەكتورى:

- جاساندى جۇرەك قارىنشالارىن جاساۋ ەكەۋىنە بىردەي جاساعاندا بىرەۋىنىڭ قۇنى 77 ميلليون تەڭگە تۇرادى. مىندەتتى الەۋمەتتىك ميديتسينالىق ساقتاندىرۋ جۇيەسى ەنگەلى قوسىمشا قارجى بولدى دا، قازىرگى تاڭدا بىزدە ونداي قىزمەت كورسەتۋدىڭ ونعا تاياۋ مەكەمە بار. شىمكەنتتە وسىنداي 13 كۇردەلى وپەراتسيا جاسالدى. قازىر تاعى 2 ناۋقاستىڭ جۇرەگىن اۋىستىرۋعا دايىندىق ءجۇرىپ جاتىر.

24.kz