جاسامپاز ءارى جاڭاشىل ۇلت رەتىندە تۇبەگەيلى جاڭعىرۋ جولىنا بەت بۇردىق - مەملەكەت باسشىسى

استانا. KAZINFORM - ەلىمىز قاسيەتتى تاۋەلسىزدىگىمىزدىڭ مەرەيلى مەجەسىنە حالىقارالىق بەدەلى بيىك جانە دۇنيەجۇزىندە جاپپاي مويىندالعان وزىق مەملەكەت رەتىندە جەتىپ وتىر.

Токаев
Фото: Акорда

بۇل تۋرالى III ستراتەگيالىق سەرىكتەستەر فورۋمىندا مەملەكەت باسشىسى قاسىم- جومارت توقايەۆ ايتتى.

- جەر ءجۇزىنىڭ ەڭ زياتكەر تۇلعالارىن ورتاق مۇددەگە جۇمىلدىرعان بۇل القالى جيىن ەلىمىز ءۇشىن تاريحي ساتتە ءوتىپ جاتىر. بيىل قازاقستاننىڭ دەربەس مەملەكەت بولعانىنا - 35 جىل. ەلىمىز قاسيەتتى تاۋەلسىزدىگىمىزدىڭ مەرەيلى مەجەسىنە حالىقارالىق بەدەلى بيىك، ەكونوميكالىق الەۋەتى زور، بولاشاعى جارقىن ەل، سونداي-اق ايماقتا كوش باستاپ تۇرعان جانە دۇنيەجۇزىندە جاپپاي مويىندالعان وزىق مەملەكەت رەتىندە جەتىپ وتىر. حالقىمىز وسى جىلدار ىشىندە كوپتەگەن بەلەستى تابىستى ەڭسەردى. ءبىرتۇتاس جۇرتىمىزدىڭ بىرلىگى كۇشەيىپ، مەملەكەتتىلىگىمىز نىعايدى. وسىلايشا ۇلى دالاداعى بىرەگەي وركەنيەتىمىز قايتا جاڭعىردى،-دەدى قاسىم-جومارت توقايەۆ.

پرەزيدەنت سوڭعى جەتى جىل ىشىندە قازاقستاندا اۋقىمدى رەفورمالار جۇزەگە اسىرىلدى.

- بۇل دا تاريحىمىزدا بۇرىن-سوڭدى بولماعان وقيعا. اتالعان وزگەرىستەر تۇتاس حالقىمىزدىڭ ومىرىنە، بۇكىل قوعامنىڭ بولمىسىنا وڭ ىقپال ەتۋدە دەسەك، ارتىق بولماس. ەندى الدىمىزدا تۇرعان ماقسات - شىن مانىندە ايبىندى. ءبىز بارشاعا بىردەي مۇمكىندىك بەرەتىن، ادال ەڭبەك پەن ايرىقشا جاۋاپكەرشىلىك قاسيەتتەرىن جوعارى باعالايتىن ادىلەتتى قازاقستاندى قۇرۋعا كىرىستىك. «تازا قازاقستان» جالپى ۇلتتىق قوزعالىسىن قولعا الدىق. سونىڭ ارقاسىندا ازاماتتارىمىزدىڭ بويىندا جاڭا ەتيكا مەن مۇلدە جاڭا سيپاتتاعى ءبىتىم-بولمىس قالىپتاسا باستادى. ءبىز جاسامپاز ءارى جاڭاشىل ۇلت رەتىندە تۇبەگەيلى جاڭعىرۋ جولىنا بەت بۇردىق،- دەدى مەملەكەت باسشىسى.