جاس قازاقستاندىقتارعا نەسيە بەرۋ جەڭىلدەتىلەدى
استانا. KAZINFORM - قارجى نارىعىن رەتتەۋ جانە دامىتۋ اگەنتتىگى 21 جاسقا دەيىنگى جاستارعا نەسيە بەرۋ كەزىندە ەسەپكە الىناتىن كىرىس تۇرلەرى ءتىزىمىن كەڭەيتۋدى جوسپارلاپ وتىر.
ءتيىستى قاۋلى جوباسى «اشىق ن ق ا» پورتالىندا جاريالاندى.
نەسيە راسىمدەۋدەن بۇرىن بانكتەر قارىز الۋشىنىڭ تولەم قابىلەتىن ونىڭ كىرىسىنە سۇيەنە وتىرىپ باعالايدى. بۇعان دەيىن جاس ادامنىڭ كىرىسى رەتىندە ونىڭ جالاقىسى مەن ستيپەندياسى ەسەپكە الىناتىن. ەندى بانكتەرگە دەبەتتىك كارتالارداعى تولىقتىرۋلاردى، ونىڭ ىشىندە تۋىستاردان كەلىپ تۇسەتىن اۋدارىمداردى دا ەسەپكە الۋعا رۇقسات بەرىلەدى.
- بۇل 21 جاسقا تولماعان ازاماتتاردىڭ دەبەتتىك كارتانى تولىقتىرۋ ارقىلى الاتىن كىرىستەرىن ەسەپكە الۋ مۇمكىندىگىن بەرۋ ءۇشىن جاسالىپ جاتىر. بۇل رەتتە بىردەي سومانى قايتالاپ ەسەپتەۋگە جول بەرىلمەيدى، - دەپ جازىلعان تۇسىندىرمەدە.
قۇجات 20 -جەلتوقسانعا دەيىن تالقىلاۋدا بولادى.
بۇعان دەيىن ساراپشىلار قازاقستانداعى قارىزدىق جۇكتەمەنىڭ سالىستىرمالى تۇردە تومەن ەكەنىن، ەلدە قارجىلىق تۇراقسىزدىق قاۋپى جوق ەكەنىن جانە نەسيە الۋدىڭ حالىققا اۋىرتپالىق تۇسىرمەيتىنىن ايتقان بولاتىن.
ايجان سەرىكجان قىزى
