جاس مامانداردى جۇمىسقا ورنالاستىرۋعا ەرەكشە نازار اۋدارۋ كەرەك - پرەمەر- مينيستر
استانا. KAZINFORM - تەحنيكالىق جانە كاسىپتىك وقۋ ورىندارىن بىتىرگەن تۇلەكتەرىنىڭ 25 پايىزى ءوز ماماندىعى بويىنشا جۇمىس ىستەمەيدى. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ايتتى.
«جاس مامانداردى جۇمىسقا ورنالاستىرۋعا ەرەكشە نازار اۋدارۋ كەرەك. تالداۋ كورسەتكەندەي، تەحنيكالىق جانە كاسىپتىك وقۋ ورىندارىن بىتىرگەن تۇلەكتەرىنىڭ 25 پايىزى ءوز ماماندىعى بويىنشا جۇمىس ىستەمەيدى. سوندىقتان ولاردى ەڭبەكپەن قامتۋ ءۇشىن جۇمىس بەرۋشىلەرمەن، اسىرەسە ءىرى كاسىپورىندارمەن تىعىز ءوزارا ءىس-قيمىل ورناتۋ قاجەت»، - دەدى ولجاس بەكتەنوۆ.
پرەمەر- ءمينيستردىڭ ايتۋىنشا، جاڭا جۇمىس كۇشىن قاجەت ەتەتىن بارلىق جوبانى قاداعالاۋ ءۇشىن ەڭبەك مينيسترلىگى تاراپىنان جۇمىسپەن قامتۋدى مونيتورينگتەۋدىڭ ناقتى جۇيەسى كەرەك.
«وسىعان بايلانىستى سيفرلىق دامۋ مينيسترلىگى جىل سوڭىنا دەيىن ەڭبەك، قارجى، ەكونوميكا، ونەركاسىپ مينيسترلىكتەرىنىڭ جانە باسقا دا مۇددەلى مەملەكەتتىك ورگانداردىڭ اقپاراتتىق جۇيەلەرىن ينتەگراتسيالاۋعا ءتيىس. سونداي-اق بارلىق مۇددەلى مەملەكەتتىك ورگاندار مەن اكىمدىكتەرگە جوبالاردى ىسكە اسىرىپ جاتقان مەردىگەر ۇيىمداردىڭ جۇمىس ورىندارىن قۇرۋ جونىندەگى مىندەتتەمەلەرىن باقىلاۋدى تاپسىرامىن»، - دەدى ۇكىمەت باسشىسى.
اۆتور
مارلان جيەمباي
