جاركەنتتە قايتىس بولعان كاپيتان دارحان نۇرلان ۇلىنىڭ ولىمىنە قاتىستى 4 ادام قاماۋعا الىندى
تالدىقورعان. KAZINFORM - جەتىسۋ وبىلىسىنداعى 74261 اسكەري بولىمىندە قايتىس بولعان كاپيتان دارحان نۇرلان ۇلى بۇگىن جەر قوينىنا تاپسىرىلدى. قىزمەت ورنىندا كوز جۇمعان اسكەريدىڭ ءولىمىن تۋىستارى قاساقانا جاسالعان ءىس دەپ وتىر.
جەرلەۋ راسىمىنە كەلگەن قۇرلىق اسكەرى قولباسشىسىنىڭ ورىنباسارى قىلمىستىق ىسكە قاتىستى 4 ادامنىڭ ۇستالعانىن مالىمدەدى.
قاراشا ايىنىڭ 13- ءى كۇنى تۇنگى كەزەكشىلىككە كەتكەن دارحان شاڭىراعىنا تابىتپەن ورالعان. تۋىستارىنىڭ ايتۋىنشا ول تۇنگى ساعات 1-لەر شاماسىندا كوز جۇمعان. ال، قارالى حاباردى اسكەريلەر تاڭعى ساعات 7 دە ءبىراق ايتقان. مارقۇمدى جۋىندىرعان اعاسى ونى كوگالا قويداي قىلىپ ۇرعانىن، قولى مەن اياعىندا ءجىپتىڭ ىزدەرى بارىن جانە باس سۇيەگى جارىلعانىن ايتتى.
«ءبىز بىرىنشىدەن ءىس جۇرگىزەتىن ورگانداردان تالاپ ەتەتىنىمىز ءىستىڭ تەك ءادىل بولۋى. دارحان باۋىرىمنىڭ ىسىنە قاتىستى ادامدار، ولتىرگەن ادامدار زاڭ الدىندا جاۋاپ بەرۋىن سۇرايمىز جانە تالاپ ەتەمىز. بۇگىن جەرلەۋ راسىمىنە جوعارى شەندى گەنەرال مەن ورىنباسارلارى كەلدى. كەشىرىم سۇرادى. ءىستىڭ ءادىل بولۋىنا، وعان قاتىسى بار ادامداردىڭ جازاسىن التىنىنا گەنەرال سەرت بەردى. ءبىراق ءىستىڭ قانداي باپپەن قوزعالىپ جاتقانىن بىلمەيمىز» - دەدى اعاسى ەرمەك مۇسا ۇلى.
مارقۇمنىڭ اۋىلداستارى دارحان كىشكەنتايىنان سپورتقا قۇمار بولعانىن ايتادى.
«ءبىر اۋلەتتىڭ تۇڭعىشى. اتاسىنىڭ قۇدايدان سۇراپ العان نەمەرەسىنىڭ الدى. مەكتەپتە وقىپ جۇرگەندە سپورتقا مىقتى بولدى. گرەك-ريم كۇرەسىنە قاتىسقان. ماقتانىشىمىز دەپ مەكتەپتە سۋرەتتەرى ءىلۋلى تۇر. ادىلدىك بولسا دەيمىز. جازىقسىز ساربازدار ۇستالىپ كەتىپ، ناقتى قىلمىسكەر جازاسىز قالماسا ەكەن. اناسى دا مۇعالىم. تولىق قاندى وتباسىدان شىققان بالا. ناعىز پاتريوت. كىشكەنتايىنان اسكەردە ءجۇر. كوپ ءۇمىت كۇتكەن بالا ەدى. وسى اۋلەتتەگى شاڭىراقتى ويرانداپ كەتتى عوي. بۇكىل اۋىل كۇڭىرەنىپ جاتىر» - دەدى اۋىلداسى شىنار ءجۇنىسوۆا.
كۇنى كەشە قۇرلىق اسكەرلەرىنىڭ باسپا ءسوز قىزمەتى وفيتسەردىڭ جوسپاردان تىس ديۆەرسياعا قارسى ساباق كەزىندە جاراقات الىپ قايتىس بولعانىن جاريالاعان ەدى. الايدا دارحاننىڭ تۋىستارى مۇنىمەن كەلىسپەيدى. ولار ۇلدارىنىڭ جاتتىعۋ (ساباق) كەزىندە كوز جۇمعانىنا كۇمانمەن قارايدى. قارالى جيىنعا قاتىسقان قورعانىس مينيسترلىگىنىڭ وكىلدەرى سول كۇنى اسكەري بولىمدە جوسپاردان تىس ساباقتىڭ وتكەنىن راستاعانىمەن وقيعانىڭ ءمان- جايىن اشىپ ايتپادى.
«وقيعا بويىنشا قورعانىس ءمينيسترىنىڭ بۇيرىعىمەن اسكەري بولىمگە كوميسسيا جىبەرىلدى. جاعداي بويىنشا ءىس قوزعالدى. ىشكى ىستەر مينيسترلىگىمەن تەرگەۋ جۇرگىزىلىپ جاتىر. وقيعا اسكەري ءبولىمنىڭ ىشىندە بولعان. كۇدىكتى ادامدار ۇستالدى، قاماۋدا 4 ادام. سول كۇنى جەكە جوسپار بويىنشا وقۋ-جاتتىعۋدىڭ بولعانىن راستايمىن. باۋىرىمىزدى سوڭعى ساپارىنا شىعارىپ سالدىق. اتا- انالارى، جاقىن تۋىستارىنا، قورعانىس ءمينيسترىنىڭ، بارلىق قۇرلىق اسكەرىنىڭ اتىنان كوڭىل ايتامىز» - دەدى قۇرلىق اسكەرى قولباسشىسىنىڭ ورىنباسارى، پولكوۆنيك ارىنعالي اكيشيەۆ.
داۋلەت دارحان نۇرلان ۇلى- 1998 -جىلى تۋعان. پانفيلوۆ اۋدانىنىڭ تۋماسى. مەكتەپتە جاقسى وقىعان. 9-سىنىپتان كەيىن ب. مومىش ۇلى اتىنداعى اسكەري مەكتەپتە وقىعان. ساعادات نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتىن قىزىل ديپلومعا بىتىرگەن. قىزمەت جولىن وتار اسكەري گارنيزونىنان باستاپ، 5 جىلدان سوڭ جاركەنت قالاسىنداعى 74261 اسكەري بولىمىندە ينجەنەرلىك قىزمەت باستىعى لاۋازىمىندا بولعان. ۇيلەنبەگەن. تۋعان جەرىندە 2 ايعا جۋىق قىزمەت ەتكەن كاپيتان دارحان نۇرلان ۇلى نەبارى 26 جاسىندا باقيلىق بولدى. قايتىس بولارىنان ءبىر كۇن بۇرىن اكەسىنە جاقسى جاڭالىعىنىڭ بارىن ايتقان ەكەن.
ەسكە سالا كەتەيىك، بۇعان دەيىن جاركەنت گارنيزونىندا وفيتسەر جاراقات الىپ، كوز جۇمعانىن جازعان بولاتىنبىز.
«اسكەردەگى الىمجەتتىك قاشان جويىلادى؟» اتتى ساراپتامالىق ماقالانى وقي وتىرىڭىز.
اۆتور
ايبەك قۇتتىبەك
