جامبىلداعى جارىلىسقا جاۋاپتى 4 ادام 23 ميلليارد تەڭگە وتەماقى تولەيدى

شىمكەنت. Kazinform - شىمكەنت قالاسىنىڭ ازاماتتىق ىستەر جونىندەگى اۋدانارالىق سوتى قورعانىس مينيسترلىگىنىڭ ءتورت جاۋاپكەردەن 25093038236 تەڭگە ماتەريالدىق زالالدى مەملەكەت پايداسىنا ءوندىرۋ تۋرالى ارىزى بويىنشا ءىستى قارادى.

ەسكە سالا كەتەيىك، 2021 -جىلى 26-تامىز ساعات 18:40 شاماسىندا جامبىل وبلىسى بايزاق اۋدانى قاينار جول تورابىندا ورنالاسقان قورعانىس مينيسترلىگىنىڭ № 28349- اسكەري ءبولىمىنىڭ ينجەنەرلىك وق-ءدارى قويماسىنىڭ بىرىنەن ءورت شىعىپ، ونىڭ سوڭى جارىلىسقا ۇلاسقان ەدى.

سالدارىنان 18 ادام قازا تاۋىپ، 100 شاقتىسى جاراقات الدى. بۇكىل قازاقستاندا ازا تۇتۋ كۇنى جاريالاندى.

سونداي-اق مەملەكەت پەن جەكە تۇلعالارعا اسا ءىرى مولشەردە زالال كەلگەن.

جاۋاپكەرلەردىڭ كىناسى شىمكەنت گارنيزونىنىڭ اسكەري سوتىنىڭ 2023 -جىلعى 20-قازانداعى جانە اسكەري سوتتىڭ قىلمىستىق ىستەر جونىندەگى سوت القاسىنىڭ 2024 -جىلعى 13-ناۋرىزداعى زاڭدى كۇشىنە ەنگەن اپەللياتسيالىق سوت اكتىلەرىمەن دالەلدەنگەن.

جاۋاپكەرلەر اسكەري ءبولىمنىڭ تەحنيكالىق اۋماعىندا № 14- ينجەنەرلىك وق-ءدارى ساقتاۋ قويماسىندا ءورت شىعۋىنا جول بەرگەنى، ياعني ولاردىڭ ءىس-ارەكەتىنەن اسا ءىرى مولشەردە شىعىن كەلگەنىن سوت انىقتاعان.

سوندىقتان كەلگەن ماتەريالدىق زالالدى ورتاقتاسقان تۇردە 23764530881 تەڭگە كولەمىندە مەملەكەت پايداسىنا ءوندىرۋ جونىندە شەشىم قابىلداندى.

تالاپتىڭ 1328507355 تەڭگە ءوندىرۋ تۋرالى بولىگى دالەلدەر بولماۋىنا بايلانىستى قاناعاتتاندىرۋسىز قالدىرىلدى.

شەشىم زاڭدى كۇشىنە جوق.