جامبىلدا مەكەمە باسشىلارى مەملەكەتتىڭ كولىكتەرىن ساتىپ جىبەرگەن

قاراتاۋ. KAZINFORM - جامبىل وبلىسى تالاس اۋدانىنىڭ پروكۋراتۋراسى «تازا-تالاس» كوممۋنالدىق مەملەكەتتىك مەكەمەسىنىڭ تەڭگەرىمىندە تۇرعان اۆتوكولىكتەردى جىمقىرۋ فاكتىسىن انىقتادى.

مەكەمە باسشىلىعى جالعان قۇجاتتار نەگىزىندە، ساتىلىمعا شىعارۋسىز 4 اۆتوكولىكتى ءۇشىنشى تۇلعالارعا ساتقان.

مەملەكەتكە كەلگەن زالال مولشەرى - 22 ميلليون تەڭگە.

اتالعان دەرەك نەگىزىندە تالاس اۋدانىنىڭ پروكۋراتۋراسى ق ك 189-بابى 4-بولىگى 2-تارماعىمەن سوتقا دەيىنگى تەرگەپ تەكسەرۋ باستاعان.

قىلمىستىق ءىستى وبلىس پروكۋراتۋراسىنىڭ سوتقا دەيىنگى تەرگەپ- تەكسەرۋ باسقارماسى تەرگەدى.

ءىس شەڭبەرىندە پروكۋراتۋرا قۇنى 10 ميلليون تەڭگەنى قۇرايتىن 2 اۆتوكولىكتى قايتارىپ، 7 ميلليون تەڭگە مەملەكەت پايداسىنا ءوندىرىلدى.

تالاس اۋداندىق سوتىنىڭ 13 -ماۋسىمداعى ۇكىمىمەن «تازا- تالاس» مەكەمەسىنىڭ ديرەكتورى جانە ونىڭ ورىنباسارى مەملەكەتتىك قىزمەتتە لاۋازىم اتقارۋعا ءومىر بويىنا تىيىم سالا وتىرىپ، 7 جىل مەرزىمگە باس بوستاندىعىنان ايىرىلدى.

سوت ۇكىمى زاڭدى كۇشىنە ەنگەن جوق.