جامبىل وبلىسىنداعى توتەنشە جاعداي بويىنشا سوڭعى مالىمەتتەر
بۇگىن جامبىل وبلىسىندا وڭىرلىك دەڭگەيدەگى توتەنشە جاعداي جاريالاندى. وڭىردە جولدار جابىلىپ، پويىزدار توقتاپ قالدى. وبلىس جولدارىندا 750 دەن استام پوليتسيا قىزمەتكەرى كۇندىز- ءتۇنى كەزەكشىلىك ەتىپ جاتىر، دەپ حابارلايدى Kazinform.
12-جەلتوقساندا كۇن رايىنىڭ كۇرت ناشارلاۋىنا (تەمپەراتۋرانىڭ تومەندەۋى، قارلى بوران) بايلانىستى رەسپۋبليكالىق ماڭىزى بار «باتىس ەۋروپا- باتىس قىتاي» اۆتوبانىنىڭ «تاراز- الماتى» باعىتى بويىنشا جانە وبلىستىق ماڭىزى بار ءبىرقاتار جولدا كولىك قوزعالىسى توقتاتىلعان.
13-جەلتوقسان ساعات 22:10 شاماسىندا جامبىل وبلىسى جامبىل اۋدانىنىڭ قىزىلقاينار، گرودەكوۆو، پولاتقوسشى اۋىلدىق وكرۋگتەرىنە باراتىن ماگيسترالدى 325-تىك قۇبىر جارىلىپ، گاز جەلىسى ىستەن شىققان بولاتىن. گاز شارۋاشىلىعى قىزمەتكەرلەرى ۇزدىكسىز جۇمىس جاساپ، دانەكەرلەۋ جۇمىستارىن اياقتادى.
13-جەلتوقساننان باستاپ جامبىل وبلىسى اكىمىنىڭ تاپسىرماسىمەن جەدەل شتاب قۇرىلىپ، ماسەلەنى باقىلاۋدا ۇستاپ وتىر. قۇتقارۋ جۇمىستارىنا 117 ارنايى تەحنيكا، 103 ادام (ت ج د، اسكەري قىزمەتشىلەر) جۇمىلدىرىلعان. جامبىل وبلىسى اكىمدىگى باسپا ءسوز قىزمەتىنىڭ حابارلاۋىنشا، كۇشتى جەل مەن قار ارالاس جاڭبىر سالدارىنان شۋ اۋدانىندا ەلەكتر جەلىسى ءۇزىلىپ، تىرەۋىشتەر قۇلاعان. وبلىستىڭ 4 اۋدانىنداعى 32 ەلدى مەكەندە 8882 ابونەنت جىلۋسىز قالدى.
14-جەلتوقساندا جامبىل وبلىسىنداعى تاسجولدار بويىندا 500 دەن استام جۇك كولىگى قالىپ قويدى. ىشكى ىستەر مينيسترلىگى باسپا ءسوز قىزمەتىنىڭ مالىمەتىنشە، جامبىلدىق پوليتسەيلەر اۆتوجولدارداعى جاعداي دۇرىستالىپ، قاۋىپ سەيىلگەنشە ازاماتتارعا جان-جاقتى كومەك كورسەتۋگە كىرىستى. ءتارتىپ ساقشىلارى جاۋراعان جولاۋشىلارعا ىستىق شاي مەن نان تاراتىپ، جاعدايدى ءتۇسىندىردى. الىس جولعا شىققان كولىكتەردىڭ مايى قاتىپ، تەحنيكالارى ىستەن شىعىپ، جولدا بۇزىلىپ قالىپ جاتىر. وسىعان بايلانىستى پوليتسيا قىزمەتكەرلەرى جۇرگىزۋشىلەرمەن بىرگە بولىپ، جاعدايدى باقىلاۋدا ۇستايدى.
14-جەلتوقساندا جامبىل وبلىسىندا جولدا قالعان ادامدارعا قىرعىز قۇتقارۋشىلارى كومەككە كەلدى. قىرعىز ت ج م مالىمەتىنشە، جولاۋشىلار مىنگەن 100-150 كولىك العا مەن قورداي اۋىلدارىنىڭ اراسىندا قالىپ، قىرعىزستانعا وتە الماعان. ولاردى قۇتقارۋعا قازاقستان تاراپىنان 99 قۇتقارۋشى مەن 37 اۋىر تەحنيكا جۇمىلدىرىلدى. قىرعىزستاننىڭ توتەنشە جاعدايلار مينيسترلىگى 39 قۇتقارۋشى، 5 اۋىر تەحنيكا، ءبىر جۇك كولىگى جانە 2 قاردا جۇرەتىن كولىك جىبەردى.
14-جەلتوقسان كۇنى ساعات 23.00 دەگى جاعداي بويىنشا قۇتقارۋ بولىمشەلەرى 1279 ادامدى قۇتقارىپ، ەۆاكۋاتسيالادى. ولار قورداي اۋدانىنداعى 6 جىلىتۋ پۋنكتىنە ورنالاستىرىلدى. ءالى دە قار قۇرساۋىندا قالىپ وتىرعان كولىكتەردىڭ سانى ناقتىلانىپ جاتىر.
15-جەلتوقساندا وبلىستا وڭىرلىك اۋقىمداعى توتەنشە جاعداي جاريالاندى.
15-جەلتوقساندا شۋ-وتار اۋماعىندا 11 جولاۋشىلار جانە 12 جۇك پويىزى توقتاپ قالدى.
ءوڭىر تەمىرجولشىلارى تاۋلىك بويى قارمەن كۇرەسىپ جاتىر. ق ت ج باسپا ءسوز قىزمەتىنىڭ مالىمەتى بويىنشا 13-15-جەلتوقسان ارالىعىندا 11 مىڭ تەكشە مەتردەن استام قار كۇرەلدى. جولداردى تازارتۋ ءۇشىن ارنايى تەحنيكا جۇمىلدىرىلعان.
وبلىس اۋماعىندا تۇرىپ قالعان پويىزدار قايتا جولعا شىقتى.
15-جەلتوقساندا تاراعان اقپارات بويىنشا وبلىس جولدارىندا 1000 نان استام كولىك كەپتەلىستە تۇر. «باتىس ەۋروپا- باتىس قىتاي» اۆتوجولىنىڭ 163 تەن 230-شاقىرىمىنا دەيىنگى ۋچاسكەسى (جاڭا قورداي اسۋى) ، «مەركى- شۋ- بۋرىلبايتال» اۆتوجولىنىڭ استانا قالاسى باعىتىنداعى 125-شاقىرىمى، تۇركىستان وبلىسىمەن شەكارادا شاقپاق اۋىلى ماڭىنداعى كۇيىك اسۋى جابىلدى.
«اۋا رايى جاقسارعانعا دەيىن اتالعان اۋماقتار سىزدەردىڭ قاۋىپسىزدىكتەرىڭىز ءۇشىن جابىلادى. شەكتەۋ شارالارىنا تۇسىنىستىكپەن قاراۋدى سۇرايمىن. ساعات سايىن بىزگە بۇزىلىپ قالعان ماشينالار تۋرالى حابارلامالار ءتۇسىپ جاتىر. تاسجولداردا 1000 نان استام اۆتوكولىك كەپتەلىپ تۇر. پوليتسيانىڭ 750 دەن استام قىزمەتكەرى ولارعا كومەكتەسىپ، تاۋلىك بويى كەزەكشىلىك ەتەدى. ءبىز كۇشەيتىلگەن رەجيمدە جۇمىس ىستەپ جاتىرمىز»، - دەپ اتاپ ءوتتى وبلىستىق پوليتسيا دەپارتامەنتىنىڭ باستىعى، پوليتسيا گەنەرال-مايورى ارمانبەك بايمۋرزين.
15-جەلتوقساندا «جولاۋشىلار تاسىمالى» ا ق جامبىل وبلىسىنىڭ قورداي جانە شۋ اۋداندارىنداعى توتەنشە جاعداي 5 جولاۋشىلار پويىزىنىڭ توقتاۋىنا سەبەپ بولعانىن مالىمدەدى. ولار: №10-نۇر-سۇلتان 1 - الماتى 2؛ №9 الماتى 2 - نۇر-سۇلتان 1؛ №29/30 اتىراۋ - الماتى 1؛ №3-الماتى 2 - نۇر-سۇلتان؛ №505/506 الماتى 2 - جەزقازعان.
اۆتور
داۋلەت ىزتىلەۋ
