جامبىل وبلىسى: سارىسۋدا سەلدەن زارداپ شەككەن وتباسىلار جاڭا باسپاناعا يە بولدى
تاراز. KAZINFORM - بيىلعى جىلدىڭ شىلدەسىندە اياق استىنان قۇيعان قاتتى نوسەردەن سارىسۋ اۋدانى اۋماعىندا سەل ءجۇرىپ، 400 اۋلا، 56 ءۇي مەن ءبىر مەكتەپتىڭ جەرتولەسىن سۋ باسقان بولاتىن.
ارتىنشا زالالدى باعالاۋ جونىندەگى 4 ارنايى كوميسسيا قۇرىلىپ، 3 تۇرعىن ءۇي جارامسىز دەپ تانىلدى. ناتيجەسىندە 1 ءۇيدىڭ قۇرىلىسى جۇرگىزىلىپ، ەكى وتباسىعا باسپانا ساتىپ الىندى.
ال، 53 ءۇي جوندەۋدەن ءوتتى.
63 تۇرمىستىق تەحنيكا مەن جيھازدىڭ زاقىمدالعانى انىقتالدى. شىعىن كولەمى 4,8 ميلليون تەڭگەنى قۇرايدى. 600 ءۇي مەن اۋلاسى دەزينفەكسيالاندى. 9 جارىق باعاناسى رەتتەلىپ، جاڭادان بەسەۋى ورناتىلدى.
بۇدان بولەك، بۇلىنگەن جولداردى جوندەۋ جۇمىستارى جۇرگىزىلدى. ءبىرقاتار كوشە ارىق جانە درەناج جۇيەسىمەن جابدىقتالدى.
جاڭا باسپاناعا يە بولعان اق جاۋلىقتى انا ايتكۇل قۇلجاباي قىزى باتاسىن جاۋدىرىپ، ەل مەن جەردىڭ اماندىعىن تىلەدى.
ال، جاڭاتاستىق سماعۇلوۆتار وتباسى «باسىمىزعا ءىس تۇسكەندە قولداۋدى سەزىندىك. ۋادە ەتىلگەن ۋاقىتتا باسپاناعا يە بولىپ وتىرمىز. العىستان باسقا ايتارىمىز جوق» دەپ، جەرگىلىكتى بيلىككە ريزاشىلىعىن ءبىلدىردى.
وسىلايشا سەل ءجۇرۋ كەزىندە زاقىمداعان دۇنيەلەردى قالپىنا كەلتىرۋ جۇمىستارى تولىق اياقتالدى.
اۆتور
ورالحان ءداۋىت
