جامان ادەتتەرگە قالادا تۇراتىن تابىسى كوپ ادامدار بەيىم كەلەدى
استانا. KAZINFORM - قوعامدىق ساياسات ينستيتۋتى ساۋالناماسىنا جاۋاپ بەرگەن قازاقستاندىقتاردىڭ 52,7 پايىزى قۇتىلعىسى كەلەتىن جامان ادەتتەردىڭ بار ەكەنىن مويىندادى.
ەڭ قىزىعى نە؟
جامان ادەتىن اتاپ وتكەندەردىڭ ىشىندە ەڭ كوپ تاراعانى مىنالار:
ينتەرنەتتى شامادان تىس كوپ پايدالانۋ - 25,2 پايىز
فاست-فۋد جەۋ - 22,9 پايىز
ەنەرگەتيك ءىشۋ - 20,5 پايىز
الەۋمەتتىك جەلىلەر - 19,2 پايىز
كەرەكسىز شوپپينگ - 18,5 پايىز
Statista اگەنتتىگىنىڭ دەرەگىنشە، الەمدە ادامدار كۇنىنە ورتا ەسەپپەن 6 جارىم ساعاتىن ينتەرنەتتە وتكىزەدى، ال قازاقستاندىقتار جەلىدە كۇنىنە ءۇش ساعات وتىرادى.
تەمەكى شەگۋ - ءالى كۇنگە دەيىن ەڭ ءداستۇرلى جامان ادەت سانالادى، ادامداردىڭ 23,9 پايىزى تەمەكىنى تاستاعىسى كەلەدى.
8,3 پايىزى الكوگولگە تاۋەلدىلىكتەن قۇتىلۋعا اسىق.
قازاقستان د د ۇ- نىڭ تەمەكىگە قارسى كۇرەس كونۆەنسياسىنا قول قويعان ەل رەتىندە جىل سايىن تەمەكى ونىمدەرىن ساتۋعا جانە جارنامالاۋعا شەكتەۋ ەنگىزەدى. سوڭعى شارالاردىڭ ءبىرى - ۆەيپ اكەلۋگە، ساتۋعا جانە تاراتۋعا تىيىم سالاتىن زاڭ.
كىم جامان ادەتتەرگە بەيىم؟
قالا تۇرعىندارى (55,8 پايىز) جانە تابىسى جوعارى ادامدار (67,5 پايىزى).
25-35 جاس توبى (60,8 پايىزى) اعا بۋىنعا (32,6 پايىزى) قاراعاندا جامان ادەتتەرگە ءجيى ۇشىرايدى.
نەكەدەگى ادامداردىڭ (50,1 پايىزى) اجىراسقاندارمەن (70,8 پايىزى) سالىستىرعاندا جامان ادەتتەرى از بولادى.
قىزىقتى فاكتىلەر:
- ەر ادامدار تەمەكىنى تاستاعىسى كەلەدى (37,7 پايىزى) جانە ەنەرگەتيكتەن باس تارتقىسى كەلەدى (22,6 پايىزى).
- ايەلدەر فاست-فۋدتان باس تارتۋعا (27,7 پايىزى) جانە ينتەرنەت پايدالانۋ ۋاقىتىن قىسقارتۋعا (27,6 پايىزى) ۇمتىلادى.
ءومىر ساپاسىن جاقسارتۋ ءۇشىن جامان ادەتتەردىڭ تەرىس اسەرىن مويىنداۋ جانە وزگەرىستەرگە ۇمتىلۋ ماڭىزدى.
زەرتتەۋ 2024 -جىلدىڭ شىلدەسىندە جۇرگىزىلدى. ساۋالناماعا 18 جاستان اسقان 2000 قازاقستاندىق قاتىستى.
