جالعىزدىقتان تەز قۇتىلۋدىڭ جولدارى

استانا. قازاقپارات - جالعىزدىقتا ءومىر ءسۇرۋ قيىن، الايدا قىسقا مەرزىمدە جاقىن دوس تاۋىپ، ماحابباتىڭدى كەزدەستىرۋ وڭاي ەمەس.ەگەر باسىڭىزدا وسىعان ۇقساس ماسەلە بولسا، مۇڭايا بەرمەڭىز، كىشكەنە كۇش سالساڭىز جاعدايدى تەز وزگەرتە الاسىز.

مىنەزىڭىزدى سارالاڭىز

سىزگە جاڭا ادامدارمەن تانىسۋعا نە كەدەرگى؟ كەيدە بۇعان مىنەزدەگى ۇيالشاقتىق، ال كەيدە ءتۇرلى كومپلەكستەردەن شىققان ءوز-وزىڭە سەنىمسىزدىك كەدەرگى بولادى.

سىرتقى كەلبەتىڭىزدى جاقسارتۋعا تىرىسىڭىز، شاشتارازعا بارىپ، جاڭا شاش ۇلگىسىن جاساتىڭىز، نەمەسە سۇلۋلىق سالونىنا بارىپ، بەت-الپەتىڭىزدى تازارتىڭىز. سپورت جاتتىعۋلارىن جاساپ دەنەڭىزدى رەتكە كەلتىرىڭىز. بۇل سىزگە ادامدارمەن قارىم-قاتىناس جاساۋدا سەنىمدىلىك بەرەدى.

مۇرنىڭىزدى كوككە كوتەرمەڭىز. ءوزىڭىز جايلى تىم جوعارى پىكىردە بولىپ، ءمىنسىز ادامدى كۇتپەڭىز. قاراپايىم جانە اشىق جارقىن بولساڭىز ادامدار وزدەرى-اق سىزگە تارتىلادى.

بۇكپەسىز ءومىر ءسۇرىڭىز. تۋىستارىڭىز، دوستارىڭىزدان مىڭداعان شاقىرىم شالعايدا بولساڭىز دا ولارعا ءاردايىم حابارلاسىپ، جىلى قارىم-قاتىناس جاساۋعا تىرىسىڭىز. دوسىڭىزعا، نە قۇربىڭىزعا قوڭىراۋ شالىپ، حالىن بىلۋگە كۇنىنە بىرنەشە مينۋت جەتكىلىكتى. وسىلايشا جالعىزدىق سەزىمىنەن ارىلاسىز جانە ادامدار سىزبەن دوستىعىڭىزدى قادىر تۇتاتىن بولادى.

جان-جاعىڭىزعا قاراي ءجۇرىڭىز. كەز كەلگەن جەردە جاڭا تانىستىق ورناتۋعا بولادى: كۇندەلىكتى ازىق-تۇلىك الىپ جۇرگەن دۇكەندە، اۆتوبۋستا، ساياباقتا، ءتىپتى كوشەدە دە. انىقتاپ قاراساڭىز، قاراما-قارسى جىنىستىڭ كوزىندە سىزگە دەگەن قىزىعۋشىلىقتى بايقاۋعا بولادى. كوز قىسۋ، جىميۋ نەمەسە بۇرىلىپ قاراۋ سىندى بەلگى بەرسەڭىز جەتكىلىكتى، ءوتىپ بارا جاتقان ادام ءوزى-اق تانىسۋعا تالپىنىس جاسايدى.

ىسكە كىرىسىڭىز

بۇعان دەيىن ءسىزدىڭ قىزىعۋشىلىعىڭىزدى وياتقان، تانىسقىڭىز كەلگەن، ءبىراق قانداي دا ءبىر جاعدايلارعا بايلانىستى تانىسا الماي جۇرگەن بىرەۋ بار ما، ويلانىپ كورىڭىز. بۇل دوستارىڭىزبەن ورتاق تانىسىڭىز، نەمەسە ارىپتەسىڭىز، پاراللەل كۋرستا وقىعان ستۋدەنت بولۋى مۇمكىن.

ەڭ قيىنى العاشقى قادام جاساۋ. الايدا، بارلىق ادام ماحاببات پەن دوستىقتى قالايتىنىن ۇمىتپاڭىز. تانىستىعىڭىز جاڭا دەڭگەيگە كوتەرىلمەسە دە جاقسى دوس بولىپ قالۋىڭىز ابدەن مۇمكىن.

تانىسۋعا قولايلى ورىندارعا بارىڭىز. قىزدار اشىق كۇندە ساياباققا نەمەسە جاعالاۋعا سەرۋەندەۋگە بارسا، ءوتىپ بارا جاتقان جىگىتتەر بايقاپ قالۋى مۇمكىن. ال، جىگىتتەر كولىگى بولسا سۇلۋ قىزداردى جەتكىزىپ سالۋ ارقىلى تانىستىق ورناتسا بولادى. كولىگى بولماعان جاعدايدا اۆتوبۋستا ۇناتقان ارۋدىڭ ايالداماسىندا ءتۇسىپ قالىپ، تانىسۋعا تالپىنىس جاساعانى يگى.

ەگەر شىنايى ومىردە تانىسۋعا ءتىپتى باتىلىڭىز جەتپەسە، قازىرگى زامان تەحنولوگياسىن، ياعني عالامتوردى پايدالانىڭىز. ونىڭ ىشىندە الەۋمەتتىك جەلىلەردىڭ اتقارار قىزمەتى زور. جەكە حابارلامالار ارقىلى ۇناعان ادامىڭىزعا حات جازىپ، تانىسۋعا تالپىنىپ كورۋىڭىزگە بولادى.

ءبىراق الەۋمەتتىك جەلىلەردە باسى بوس ەمەس قىزدار مەن جىگىتتەر كوپ ەكەنىن ۇمىتپاڭىز، سول سەبەپتى كەيدە دورەكى جاۋاپتار الساڭىز نەمەسە مۇلدە جاۋاپ الماساڭىز سالىڭىز سۋعا كەتپەسىن. ارنايى تانىسۋ سايتتارىنا تىركەلىپ، ادەمى سۋرەتتەرىڭىزدى ءىلىپ، انكەتانى شىنايى تولتىرىڭىز. بالكىم، ءسىز ىزدەگەن ادام ءدال وسى جەردەن تابىلىپ قالار؟

ءبىراق، جالعىزدىقتان قۇتىلامىن دەپ، كەز كەلگەن كۇلە قاراعان ادامنىڭ ارتىنان ەرىپ كەتە بەرمەڭىز. ءبىر قاراعاندا ءجۇزى جىلى كورىنگەن ادامنىڭ ىشىندە قانداي پيعىل مەن نيەت جاتقانىن ءالى بىلمەيسىز، سول

سەبەپتى اڭگىمەلەسۋشى ادامدى ءبىراز زەرتتەپ، ويىنىڭ تۇزۋلىگىنە كوز جەتكىزگەن سوڭ عانا جاقىن قارىم-قاتىناسقا كوشكەنىڭىز ءجون.

دايىنداعان: انار مۇستافينا

Massaget.kz