جالاقىسى 2 ميلليون تەڭگەگە دەيىن: قازاقستاندا قانداي ماماندارعا سۇرانىس جوعارى
استانا. KAZINFORM - ەلىمىزدە جاساندى ينتەللەكت، دەرەكتەردى تالداۋ جانە كيبەرقاۋىپسىزدىك سالاسىنىڭ ماماندارىنا سۇرانىس ارتىپ جاتىر. ءتىپتى، كەيبىر IT ماماندارىنا ۇسىنىلاتىن جالاقى 2 ميلليون تەڭگەدەن اسادى. Kazinform ءتىلشىسى تولىعىراق تارقاتتى.
قانداي ماماندار باعالانادى؟
قازاقستاندىق كومپانيالار شەشىم قابىلداۋدا دەرەكتەردى ءجيى پايدالانادى. ويتكەنى ءدال وسى ساتۋ كولەمى، كليەنتتەردىڭ سۇرانىسى، قارجىلىق وپەراتسيالار مەن پايدالانۋشىلاردىڭ مىنەز-قۇلقى تۋرالى اقپاراتتى تالداۋ بيزنەستىڭ جۇمىسىن جوسپارلاۋعا جانە بولجاۋعا مۇمكىندىك بەرەدى.
ماسەلەن، Data Scientist, ياعني دەرەكتەردى تالداۋ مامانى ۇلكەن كولەمدەگى اقپاراتتى سارالاپ، ءتۇرلى پروتسەستەردى بولجاۋعا كومەكتەسەتىن ماتەماتيكالىق مودەلدەر ازىرلەيدى. بانكتەردە مۇنداي مودەلدەر نەسيە تاۋەكەلدەرىن باعالاۋعا، ساۋدادا سۇرانىستى بولجاۋعا، ال سيفرلىق سەرۆيستەردە پايدالانۋشىلاردىڭ مىنەز-قۇلقىن زەرتتەۋگە قولدانىلادى. بۇل جۇمىس ءۇشىن Python, SQL، ماتەماتيكا، ستاتيستيكا جانە ماشينالىق وقىتۋ بويىنشا ءبىلىم قاجەت.
HeadHunter پلاتفورماسىندا 2026 -جىلعى قازاندا جاريالانعان بوس جۇمىس ورىندارىندا Data Scientist ماماندارىنا ايىنا 300 مىڭنان 2 ميلليون تەڭگەگە دەيىن جالاقى ۇسىنىلعان. تومەنگى كورسەتكىش سالىققا دەيىنگى جالاقىنى قامتىسا، 1,5- 2 ميلليون تەڭگەلىك ۇسىنىستار كەمىندە ءۇش جىلدىق تاجىريبەسى بار ماماندارعا ارنالعان.
ال وسى تالداۋعا قاجەتتى دەرەكتەردى جيناۋ مەن وڭدەۋ جۇيەلەرىنە Data Engineer جاۋاپ بەرەدى. ول ءارتۇرلى دەرەككوزدەردەن اقپارات جينايتىن، ونى ساقتايتىن جانە تاسىمالدايتىن جۇيەلەردى ازىرلەپ، ولاردىڭ تۇراقتى جۇمىسىن باقىلايدى. بۇل باعىتتا Python, SQL، دەرەكتەر بازاسى، Apache Airflow جانە ۇلكەن كولەمدەگى اقپاراتتى وڭدەۋ تەحنولوگيالارىن مەڭگەرۋ ماڭىزدى.
2026 -جىلعى قازان ايىنىڭ سوڭىندا قازاقستانداعى Data Engineer ماماندارىنا ۇسىنىلعان جالاقى 550- 850 مىڭ تەڭگە ارالىعىندا بولدى. تاجىريبەلى ماماندارعا 900 مىڭنان 1,2 ميلليون تەڭگەگە دەيىن ۇسىنعان ۆاكانسيالار دا كەزدەستى. كەيبىر جۇمىس بەرۋشىلەر قولعا تيەتىن جالاقىنى كورسەتسە، ەندى ءبىرى سالىققا دەيىنگى سومانى نەمەسە جالاقىنىڭ سالىقتىق مارتەبەسىن ناقتىلاماعان.
جاساندى ينتەللەكت ماماندارى قانشا تابىس تابادى؟
جاساندى ينتەللەكتىنىڭ دامۋى IT نارىعىندا جاڭا ماماندىقتارعا سۇرانىستى ارتتىردى. اسىرەسە كومپانيالار نەيروندىق جەلىلەردى ءوز قىزمەتىنە ەنگىزىپ، كۇندەلىكتى پروتسەستەردى اۆتوماتتاندىرۋعا باسىمدىق بەرىپ وتىر. وسى باعىتتا AI Engineer جانە AI Automation Specialist ماماندارىنىڭ ءرولى ارتىپ كەلەدى.
AI Engineer، ياعني جاساندى ينتەللەكت ينجەنەرى نەيروندىق جەلىلەر نەگىزىندە چات-بوتتار، ينتەللەكتۋالدى كومەكشىلەر، قۇجاتتاردى تالداۋ جانە اقپاراتتى وڭدەۋ جۇيەلەرى سياقتى شەشىمدەردى ازىرلەپ، قولدانىسقا ەنگىزەدى. بۇل ءۇشىن Python, ماشينالىق وقىتۋ، ۇلكەن تىلدىك مودەلدەر (LLM) بويىنشا ءبىلىم جانە API- مەن جۇمىس ىستەۋ داعدىلارى قاجەت. 2026 -جىلعى قازاندا قازاقستاندا جاريالانعان بوس جۇمىس ورىندارىندا مۇنداي ماماندارعا ايىنا 550- 900 مىڭ تەڭگە جالاقى ۇسىنىلدى. ال AI/ML Specialist ماماندارىنا سالىققا دەيىن 750 مىڭنان 1,3 ميلليون تەڭگەگە دەيىن ۇسىنعان جۇمىس بەرۋشىلەر بولدى.
كومپانيالاردىڭ بارلىعى بىردەي جەكە نەيروندىق جەلى ازىرلەمەيدى. كوپشىلىگى دايىن مودەلدەردى ءوز مىندەتتەرىنە بەيىمدەپ، جۇمىس پروتسەستەرىنە ەنگىزۋدى ءجون كورەدى. بۇل جۇمىستى AI Automation Specialist, ياعني جاساندى ينتەللەكت كومەگىمەن پروتسەستەردى اۆتوماتتاندىرۋ مامانى اتقارادى. ول نەيروندىق جەلىلەردى CRM جۇيەلەرىمەن، ەلەكتروندىق كەستەلەرمەن جانە باسقا باعدارلامالارمەن بايلانىستىرىپ، وتىنىمدەردى وڭدەۋ، قۇجاتتاردى ازىرلەۋ جانە كليەنتتەرگە جاۋاپ بەرۋ سياقتى مىندەتتەردى اۆتوماتتاندىرادى.
بۇل باعىتتا Python, API، n8n سياقتى اۆتوماتتاندىرۋ پلاتفورمالارىن مەڭگەرۋ جانە ج ي اگەنتتەرىنىڭ جۇمىس ىستەۋ قاعيداتتارىن ءتۇسىنۋ قاجەت. 2026 -جىلعى قازاندا استاناداعى جۇمىس بەرۋشىلەر مۇنداي ماماندارعا قولعا 500- 600 مىڭ تەڭگە جالاقى ۇسىنعان.
ج ي مودەلدەرىنىڭ تۇراقتى جۇمىسىن كىم قامتاماسىز ەتەدى؟
جاساندى ينتەللەكت شەشىمدەرىن ازىرلەپ، قولدانىسقا ەنگىزۋمەن جۇمىس اياقتالمايدى. ولاردىڭ تۇراقتى جۇمىسىن قامتاماسىز ەتۋ، مودەلدەردى جاڭارتۋ جانە ونىمدىلىگىن باقىلاۋ قاجەت. بۇل مىندەتتەردى MLOps Engineer جانە LLMOps Engineer سياقتى تار بەيىندى ماماندار اتقارادى. ولار ماشينالىق وقىتۋ جانە ۇلكەن تىلدىك مودەلدەردى وقىتۋ، تەستىلەۋ، ىسكە قوسۋ مەن باقىلاۋ پروتسەستەرىنە جاۋاپ بەرەدى. سونىمەن قاتار قاجەتتى ينفراقۇرىلىمدى جۇيەلەپ، مودەلدەردى باسقا سەرۆيستەرمەن بىرىكتىرەدى جانە دەرەكتەردىڭ قاۋىپسىزدىگىن قاداعالايدى.
بۇل باعىتتا جۇمىس ىستەۋ ءۇشىن Python, Docker، Kubernetes, CI/CD، ماشينالىق وقىتۋ جانە زاماناۋي تىلدىك مودەلدەر بويىنشا ءبىلىم قاجەت. بيىل قازاندا HeadHunter پلاتفورماسىندا MLOps/LLMOps Engineer مامانىنا ايىنا 1,5- 2 ميلليون تەڭگە جالاقى ۇسىنعان ۆاكانسيا جاريالاندى. بۇل سوما سالىقتار مەن مىندەتتى اۋدارىمدار ۇستالعانعا دەيىنگى جالاقىنى بىلدىرەدى. ۇمىتكەردەن كەمىندە ەكى جىلدىق پراكتيكالىق تاجىريبە تالاپ ەتىلگەن.
سيفرلىق ينفراقۇرىلىم كەڭەيگەن سايىن اقپاراتتىق جۇيەلەردى قورعاۋ ماسەلەسى دە وزەكتى بولا تۇسەدى. جەكە دەرەكتەردىڭ تارالۋى، كيبەرشابۋىلدار مەن باعدارلامالىق جاساقتاماداعى وسالدىقتاردىڭ الدىن الۋ كومپانيالار ءۇشىن ماڭىزدى مىندەتكە اينالدى. سوندىقتان ەڭبەك نارىعىندا كيبەرقاۋىپسىزدىك ماماندارىنا دا سۇرانىس بار.
كيبەرقاۋىپسىزدىك ماماندارى قانشا تابىس تابادى؟
اقپاراتتىق جۇيەلەردى قورعاۋ ءۇشىن كومپانيالارعا باعدارلامالىق جاساقتاما مەن جەلىلىك ينفراقۇرىلىمنىڭ قاۋىپسىزدىگىن قامتاماسىز ەتەتىن ماماندار قاجەت. سولاردىڭ ءبىرى - AppSec Engineer، ياعني قوسىمشالار قاۋىپسىزدىگى جونىندەگى ينجەنەر. ول باعدارلامالىق جاساقتامانى وسال تۇستارعا تەكسەرىپ، كودتى تالدايدى جانە ءونىم ىسكە قوسىلعانعا دەيىن انىقتالعان كەمشىلىكتەردى جويۋعا كومەكتەسەدى. بۇل جۇمىس ءۇشىن باعدارلامالاۋ، جەلىلىك تەحنولوگيالار، قاۋىپسىزدىكتى تەستىلەۋ جانە قاۋىپسىز ازىرلەۋ قاعيداتتارىن مەڭگەرۋ قاجەت.
ال Network Security Engineer، ياعني جەلىلىك قاۋىپسىزدىك ينجەنەرى كورپوراتيۆتىك جەلىلەردى قورعاۋعا جاۋاپ بەرەدى. ول قولجەتىمدىلىكتى باقىلاۋ جۇيەلەرىن باپتاپ، كۇدىكتى ارەكەتتەردى انىقتايدى جانە كيبەرشابۋىلداردىڭ الدىن الادى. بۇل باعىتتا جەلىلىك حاتتامالاردى، وپەراتسيالىق جۇيەلەردى، جەلىارالىق ەكراندار مەن قاۋىپ-قاتەرلەردى باقىلاۋ قۇرالدارىن ءبىلۋ ماڭىزدى. دەگەنمەن 2026 -جىلى جاريالانعان اشىق ۆاكانسيالاردا وسى ماماندىقتار بويىنشا جالاقى مولشەرى ۇنەمى كورسەتىلمەيدى. سوندىقتان ناقتى ورتاق كورسەتكىشتى انىقتاۋ قيىن.
IT ينفراقۇرىلىمىنىڭ قاۋىپسىزدىگىمەن قاتار، ونىڭ ۇزدىكسىز جۇمىس ىستەۋىن دە قامتاماسىز ەتۋ قاجەت. بۇل مىندەتتى DevOps ينجەنەرى اتقارادى. ول سەرۆەرلەردى باپتايدى، ينفراقۇرىلىمدى باسقارادى، ازىرلەۋ پروتسەستەرىن اۆتوماتتاندىرادى جانە باعدارلامالىق جاڭارتۋلاردىڭ ىركىلىسسىز ەنگىزىلۋىنە جاۋاپ بەرەدى. ول ءۇشىن Linux, Docker، Kubernetes, CI/CD جانە بۇلتتى تەحنولوگيالاردى مەڭگەرۋ قاجەت.
ەلىمىزدەگى وزەكتى ۆاكانسيالاردا DevOps ينجەنەرلەرىنە قولعا 800 مىڭنان 1 ميلليون تەڭگەگە دەيىن جالاقى ۇسىنىلادى. ال كەيبىر جۇمىس بەرۋشىلەر 500 مىڭنان 2 ميلليون تەڭگەگە دەيىن تولەۋگە دايىن. ايىرماشىلىق ماماننىڭ تاجىريبەسىنە، ينفراقۇرىلىمنىڭ كۇردەلىلىگىنە جانە جاۋاپكەرشىلىك دەڭگەيىنە بايلانىستى.
سيفرلىق ءونىمنىڭ تەحنيكالىق تۇرعىدان تۇراقتى جۇمىس ىستەۋىمەن قاتار، ونىڭ پايدالانۋشى سۇرانىسىنا ساي بولۋى دا ماڭىزدى. ءونىمنىڭ باعىتىن ايقىنداپ، قانداي فۋنكسيالاردى دامىتۋ كەرەگىن انىقتايتىن مامان - Product Manager، ياعني سيفرلىق ءونىم مەنەدجەرى.
ول پايدالانۋشىلاردىڭ قاجەتتىلىكتەرىن زەرتتەيدى، قوسىمشا نەمەسە ونلاين- سەرۆيستى دامىتۋدىڭ باسىم باعىتتارىن بەلگىلەيدى، وزگەرىستەردىڭ ناتيجەسىن باعالايدى. سونداي-اق ازىرلەۋشىلەرمەن، ديزاينەرلەرمەن جانە ساراپشىلارمەن بىرلەسە جۇمىس ىستەيدى. ەلىمىزدە Senior Product Manager ماماندارىنا قولعا 1,75- 2,2 ميلليون تەڭگە جالاقى ۇسىنىلعان. مۇنداي ۇسىنىستار نەگىزىنەن التى جىلدان استام تاجىريبەسى بار ماماندارعا ارنالعان.
ەڭ تومەنگى جالاقى قانداي؟
سيفرلىق ءونىمنىڭ ساپاسى ونىڭ تەحنيكالىق مۇمكىندىكتەرىمەن عانا ەمەس، پايدالانۋعا قانشالىقتى ىڭعايلى ەكەنىمەن دە ولشەنەدى. بۇل باعىتتا UX/UI ديزاينەر جۇمىس ىستەيدى. ول سايت پەن قوسىمشالاردىڭ ينتەرفەيسىن جوبالاپ، ەلەمەنتتەردىڭ ورنالاسۋىن، ناۆيگاتسياسىن جانە ۆيزۋالدى بەزەندىرىلۋىن ازىرلەيدى. نەگىزگى ماقساتى - سەرۆيستى پايدالانۋشىعا تۇسىنىكتى ءارى قولايلى ەتۋ. جۇمىستا Figma, پروتوتيپتەۋ جانە پايدالانۋشى تاجىريبەسىن زەرتتەۋ ادىستەرى قولدانىلادى.
استاناداعى وزەكتى ۆاكانسيالاردا ءبىر جىلدان ءۇش جىلعا دەيىن تاجىريبەسى بار UX/UI ديزاينەرلەرىنە قولعا 300- 400 مىڭ تەڭگە جالاقى ۇسىنىلادى. ونىڭ مولشەرى ماماننىڭ پورتفوليوسىنا، جوبالاردىڭ كۇردەلىلىگىنە جانە كاسىبي دايارلىق دەڭگەيىنە بايلانىستى.
IT ماماندارىنا سۇرانىس وڭىرلەر بويىنشا دا اركەلكى. ماسەلەن، HeadHunter قازاقستان پلاتفورماسىنىڭ 2026 -جىلعى III توقسان قورىتىندىسى بويىنشا جاريالانعان ۆاكانسيالاردىڭ 38,7 پايىزى الماتىعا، 21,9 پايىزى استاناعا تيەسىلى. وسىلايشا، IT سالاسىنداعى جۇمىس ۇسىنىستارىنىڭ باسىم بولىگى وسى ەكى قالادا شوعىرلانعان.
جالپى، IT ماماندىعىن تاڭداعاندا تەك جالاقىعا ەمەس، جۇمىس بەرۋشىلەردىڭ كاسىبي تالاپتارىنا دا نازار اۋدارۋ قاجەت. جاساندى ينتەللەكت سالاسىندا باعدارلامالاۋ مەن ماشينالىق وقىتۋ، دەرەكتەردى تالداۋدا ارنايى قۇرالداردى مەڭگەرۋ، كيبەرقاۋىپسىزدىكتە اقپاراتتىق جۇيەلەردى قورعاۋ داعدىلارى ماڭىزدى. ال سيفرلىق ونىمدەردى باسقارۋ مەن جوبالاۋدا اناليتيكالىق ويلاۋ جانە پايدالانۋشى قاجەتتىلىگىن ءتۇسىنۋ قابىلەتى قاجەت.
سونىمەن بىرگە ۆاكانسيالاردا كورسەتىلگەن جوعارى جالاقىعا جاڭادان باستاعان مامان بىردەن قول جەتكىزە المايدى. ناقتى تابىس جۇمىس تاجىريبەسىنە، بىلىكتىلىك دەڭگەيىنە، وڭىرگە جانە اتقاراتىن مىندەتتەردىڭ كۇردەلىلىگىنە قاراي وزگەرەدى. سوندىقتان IT سالاسىنداعى مانساپتىق مۇمكىندىكتەردى باعالاعاندا جالاقىمەن قاتار، قاجەتتى داعدىلار مەن تاجىريبە تالاپتارىن دا ەسكەرگەن ءجون.
بۇعان دەيىن قازاقستاندا جاستارعا قانداي مۇمكىندىكتەر جاسالعانىن جازعان ەدىك.
اۆتورلار
ءمولدىر ماحمۇت
