جابايى تابيعاتتا العاش رەت مايمىل ەمدىك ءشوپتىڭ كومەگىمەن ءوز-ءوزىن ەمدەپ جازدى

استانا. KAZINFORM - يندونەزيادا سۋماتراندىق ورانگۋتان دارىلىك وسىمدىكتىڭ كومەگىمەن بەتىندەگى ۇلكەن جارانى ەمدەي الدى، دەيدى عالىمدار. زەرتتەۋشىلەر تابيعاتتا جانۋارلاردىڭ ءوزىن-ءوزى ەمدەۋدىڭ بۇل ءادىسىن ءبىرىنشى رەت تىركەدى.

يندونەزياداعى گۋنۋنگ- لويزەر ۇلتتىق ساياباعىنىڭ زەرتتەۋشىلەرى 2022 -جىلدىڭ ماۋسىمىندا بەتىندە ۇلكەن جارا بار راكۋس اتتى ورانگۋتاندى بايقادى.

ولار ونى باسقا ەركەك ورانگۋتاندارمەن شايقاس كەزىندە جارالانعان دەپ سانايدى.

سودان كەيىن عالىمدار توبى راكۋستىڭ بەزگەك پەن قانت ديابەتىن ەمدەۋ ءۇشىن جەرگىلىكتى جەردە قولدانىلاتىن قابىنۋعا جانە باكتەرياعا قارسى Akar Kuning دەپ اتالاتىن وسىمدىكتىڭ ساباعى مەن جاپىراقتارىن شايناپ جاتقانىن بايقادى.

ول سۇيىقتىقتى جەتى مينۋت بويى بەتىنە قايتا- قايتا جاقتى.

سودان كەيىن راكۋس جاپىراقتاردى شايناپ، الىنعان قوسپانى جارانىڭ بەتىنە جاقتى.

ول وسى وسىمدىكپەن جارتى ساعات بويى قورەكتەنىپ وتىردى.

عالىمدار مايمىلداردىڭ ەمدىك ءشوپتىڭ بۇل ءتۇرىن شايناپ جۇرگەنىن بۇرىن دا بايقاعان، ءبىراق جانۋارلاردىڭ جاراعا مۇنداي كومپرەستى قولدانعانىن العاش رەت كوردى.

قوسپا مەن جاپىراقتار اسەر ەتكەندەي بولدى - زەرتتەۋشىلەر ينفەكسيا بەلگىلەرىن بايقاعان جوق، ال بەس كۇننەن كەيىن جارا تولىعىمەن جازىلدى.

ءبىر ايدان كەيىن راكۋس تولىق قالپىنا كەلدى.

عالىمدار راكۋس ەمدىك جاپىراقتاردى قولداناتىنىن بىلەدى دەگەن قورىتىندىعا كەلدى، ويتكەنى ورانگۋتاندار بۇل وسىمدىكتى سيرەك جەيدى.

تاعى ءبىر دالەل پروتسەدۋرانىڭ ۇزاقتىعى بولدى.

«ول قوسپانى بىرنەشە رەت جاقتى، كەيىن وسىمدىكتىڭ قالىڭ قوسپاسىن قولداندى. بۇكىل پروتسەسس ۇزاققا سوزىلدى، سوندىقتان ول بۇل قۇرالدى ادەيى قولدانعان دەپ ەسەپتەيمىز»، - دەپ ءتۇسىندىردى دوكتور لاۋمەر.

زەرتتەۋشىلەر سونىمەن قاتار راكۋستىڭ ادەتتەگىدەن الدەقايدا ۇزاعىراق - جارتى كۇننەن ارتىق دەمالعانىن بايقادى، بۇل ونىڭ جاراقاتىنان ايىعۋعا تىرىسقانىن تانىتىپ وتىر.

اۆتور

زارينا تۋعانبايەۆا