جاڭاقورعاندا ءبىلىم ءبولىمىنىڭ باستىعى سىبايلاستارىمەن بىرگە 1 ميلليارد تەڭگە جىمقىرعان

قىزىلوردا. قازاقپارت - اقپاندا جاڭاقورعان اۋداندىق سوتى جاڭاقورعان اۋدانىنىڭ ءبىلىم ءبولىمى باسشىسى ب. يبراگيموۆقا، باس بۋحالتەرى ك. ايازبايەۆاعا جانە 24 مەكتەپتىڭ بۋحالتەرىنە ۇكىم شىعاردى.

ولار جالپى سوماسى 1 ميلليار تەڭگەدەن اسا ءىرى مولشەردە بيۋدجەت قاراجاتىن جىمقىرعانى ءۇشىن كىنالى دەپ تانىلدى.

سوت ۇكىمىمەن مەكەمەنىڭ باسشىسىنا جانە باس بۋحالتەرىنە 8 جىل باس بوستاندىعىنان ايىرۋ، مەكتەپ بۋحالتەرلەرىنىڭ بىرىنە - جاس بالانىڭ اسىراۋىندا بولۋىنا بايلانىستى 5 جىل مەرزىمگە جازاسىن كەيىنگە قالدىرا وتىرىپ، 7 جىل باس بوستاندىعىنان ايىرۋ جازاسى تاعايىندالدى.

سونىمەن قاتار سوتتالعاندار مەملەكەتتىك قىزمەتتە جانە وزگە دە ۇيىمداردا قىزمەت اتقارۋ قۇقىعىنان ءومىر بويى ايىرىلادى.

ۇكىم زاڭدى كۇشىنە ەنگەن جوق.

سىبايلاس جەمقورلىققا قارسى قىزمەت ءبىلىم بەرۋ سالاسىنداعى جەمقورلىق تاۋەكەلدەرىنە سىرتقى تالداۋ جۇرگىزۋ بارىسىندا ەڭبەكاقى تولەۋ قورىنان قاراجات جىمقىرۋمەن بايلانىستى تۇراقتى قىلمىستىق سحەمالاردى اشتى:

1) قىزمەتكەرلەرگە جالاقى ونىڭ لاۋازىمىنان قاراعاندا الدەقايدا كوپ اۋدارىلعان؛

2) جالاقى ءبىلىم مەكەمەلەرىندە رەسمي تۇردە تىركەلمەگەن ادامدارعا بەرىلگەن؛

3) قىزمەتكەردىڭ كارت- شوتتارىنا جالاقى ەسەپتەلىپ، ال تولەم قۇجاتتارىندا باسقا تۇلعانىڭ دەرەكتەرى كورسەتىلگەن؛

4) ءبىر ادامعا اقشا اۋدارىمدارىن بىرنەشە رەت قايتالاعان؛

5) «ءولى جاندارعا» - تۋىستارى مەن جاقىندارىنا اقشا اۋدارعان.

بۋحالتەرلەر مەكتەپتىڭ بۋحالتەرلىك ەسەپ جۇيەلەرى، ۇلتتىق ءبىلىم بەرۋ بازاسى جانە «قازىناشىلىق-كليەنت» جۇيەسى اراسىنداعى ينتەگراتسيانىڭ جوقتىعىن پايدالانعان.

ولار تولەم قۇجاتتارىنا قولمەن تۇزەتۋ ەنگىزىپ، بيۋدجەت اقشاسىن جىمقىرعان.

جىل سايىنعى بيۋدجەتتىك وتىنىمدەردى قالىپتاستىرۋ كەزىندە جىمقىرىلاتىن قاراجات بەلگىلەنگەن.

ايتا كەتۋ كەرەك، جىمقىرۋ بويىنشا بۇرىن اشىلعان سحەمالار شەڭبەرىندە سوتقا دەيىنگى تەرگەۋلەردى بۇگىندە باسقا قۇقىق قورعاۋ ورگاندارى جۇرگىزۋدە.

اۆتور

جانات قاپالبايەۆا