«جاۋاپقا تارتىلىپ، قاتاڭ جازاسىن الادى»: توقايەۆ اسكەري قىزمەتشىلەرگە ەسكەرتۋ جاسادى

مەملەكەت باسشىسى جەكە قۇرامنىڭ قاۋىپسىزدىگىنە ايرىقشا نازار اۋداردى.

قاسىم-جومارت توقايەۆتىڭ پىكىرىنشە، ۇكىمەتتىك كوميسسيا وقۋ-جاتتىعۋدى ازىرلەۋ مەن وتكىزۋگە، اسكەردى قاجەتتى جابدىقتارمەن قامتاماسىز ەتۋگە جانە قاۋىپسىزدىك تالاپتاردىڭ ساقتالۋىنا جاۋاپتى بارلىق لاۋازىمدى تۇلعانىڭ ارەكەتىنە باعا بەرۋگە ءتيىس.

بۇدان بولەك، پرەزيدەنتتىڭ وكىمىنە سايكەس قورعانىس مينيسترلىگىندەگى ىستەردىڭ جاي-كۇيىنە كەشەندى تەكسەرۋ باستالدى.

تەكسەرۋ بارىسىندا اسكەري قىزمەتتى ۇيىمداستىرۋ، اسكەردى جابدىقتاۋ، سونداي-اق ونىڭ ماتەريالدىق جانە قارجىلىق تۇرعىدان قامتاماسىز ەتىلۋى جان-جاقتى زەردەلەنەدى.

قاۋىپسىزدىك كەڭەسى ءتوراعاسىنىڭ ورىنباسارى ايدا بالايەۆا باسقاراتىن كوميسسيا جۇيەلى سيپات العان زاڭ بۇزۋشىلىقتاردى انىقتاپ، كىمدەردىڭ جاۋاپقا تارتىلاتىنىن ايقىنداۋى قاجەت.

مەملەكەت باسشىسى اسكەري قىزمەتشىلەر لاۋازىمىنا، شەنىنە قاراماستان جاۋاپقا تارتىلاتىنىن، زاڭ بويىنشا قاتاڭ جازاسىن الاتىنىن ەسكەرتتى. اتالعان ماسەلە پرەزيدەنتتىڭ جەكە باقىلاۋىندا.

- بۇل وقيعا ارميادا ولقىلىقتار وتە كوپ ەكەنىن جانە كاسىبيلىك جەتىسپەيتىنىن انىق كورسەتتى. اسكەردى تۇبەگەيلى رەفورمالاۋدى ىسكە اسىراتىن ۋاقىت كەلدى. بۇل - كەزەك كۇتتىرمەيتىن ماسەلە. مەن وسىعان بايلانىستى كادرلىق شەشىمدەر قابىلدادىم. سىزدەرگە قازاقستان رەسپۋبليكاسىنىڭ جاڭا قورعانىس ءمينيسترى مىرزاحمەتوۆ ايدوس ساكەن ۇلىن تانىستىرعىم كەلەدى. ايدوس ساكەن ۇلى كۇردەلى كەزەڭدە قىزمەتكە كىرىسىپ جاتىر. جاۋاپكەرشىلىك — وتە جوعارى، الداعى مىندەتتەر — اسا كۇردەلى. باتىل شەشىمدەر قابىلدانۋعا ءتيىس، - دەدى مەملەكەت باسشىسى.

قاسىم-جومارت توقايەۆ قورعانىس ۆەدومستۆوسىنىڭ جۇمىسىن تۇبەگەيلى ترانسفورماتسيالاۋ ماسەلەسىنە توقتالدى.

- جاقىندا قاۋىپسىزدىك كەڭەسى اپپاراتىمەن وتكەن جيىندا اسكەري سالادا اتقارىلاتىن باسىم مىندەتتەردى ايقىندادىم. ءبىزدىڭ ارميا وتكەن عاسىردا قالىپ قويعان. سونىمەن قاتار قولباسشىلىق جۇيەسىن حالىقارالىق ۇزدىك تاجىريبەگە ساي قايتا قۇرۋ كەرەك. كەشەندى ءتاسىل قولدانۋ قاجەت. ال ول ءۇشىن باعىت-باعدارىمىز انىق بولعانى ءجون. بۇل دۇنيەتانىمى كەڭ، ساۋاتتى وفيتسەرلەردىڭ عانا قولىنان كەلەدى. رەفورمانىڭ ماقساتى -جاڭا ۇلگىدەگى اسكەر جاساقتاۋ،- دەدى مەملەكەت باسشىسى.

پرەزيدەنت ارميادا سيفرلىق ترانسفورماتسيا جۇرگىزۋدى، مۇمكىندىگىنشە ادامدى تەحنولوگيامەن الماستىرۋدى تاپسىردى.

- اسكەردى دامىتۋدىڭ جاڭاشا تاسىلدەرى قاجەت. تاپتاۋرىن شەشىمدەر، الدامشى امالدار، قاعاز جۇزىندە ءبارىن كەرەمەت ەتىپ كورسەتەتىن وتىرىك ەسەپتەر ەشكىمگە قاجەت ەمەس،- دەدى پرەزيدەنت.

ەسكە سالايىق، بۇعان دەيىن پرەزيدەنت داۋرەن قوسانوۆتى قورعانىس ءمينيسترى لاۋازىمىنان بوساتقانىن حابارلاعان ەدىك.

ونىڭ ورنىنا ايدوس مىرزاحمەتوۆ قورعانىس ءمينيسترى بولىپ تاعايىندالدى.

پرەزيدەنت جاڭا مينيسترگە اسكەري باسقارۋ جۇيەسىن جەتىلدىرۋدى تاپسىردى.