جاڭا سالىق كودەكسىن قابىلداۋ مەرزىمىن كەلەسى جىلعا اۋىستىرۋعا بولادى - پرەزيدەنت
استانا. KAZINFORM - سالىق سالاسىندا اكىمشىلەندىرۋ ىسىندە جازالاۋ تاسىلىنەن باس تارتقان ابزال. بۇل تۋرالى قازاقستان حالقىنا جولداۋىن جاريالاۋ كەزىندە مەملەكەت باسشىسى قاسىم-جومارت توقايەۆ ايتتى.
«سالىق جەڭىلدىكتەرىنىڭ تيىمدىلىگىن ارتتىرۋ وزەكتى ماسەلەگە اينالدى. كاسىپكەرلەر وزدەرى پايدالاناتىن سالىق جەڭىلدىكتەرى بويىنشا ەسەپ بەرۋگە ءتيىس. بيزنەستى دامىتۋعا ناقتى سەپتىگى تيەتىن جەڭىلدىكتەردى عانا قالدىرعان ابزال. مىسالى، ءوندىرىستى وركەندەتەمىز دەگەن ينۆەستورلارعا ارتىقشىلىق بەرۋگە بولادى. ياعني، قۇرىلىس سالۋعا، اكتيۆتەردى ساتىپ الۋعا، جاڭعىرتۋعا جانە قايتا قۇرۋعا ءبىر رەتتىك سالىق جەڭىلدىگىن بەرگەن ءجون. تەرەڭ وڭدەلگەن ءونىمدى ەكسپورتقا شىعاراتىن كاسىپكەرلەرگە جەڭىلدىكتەر بەرۋ ماڭىزدى. ولار وزگە بيزنەسكە قاراعاندا كوبىرەك قولداۋعا يە بولۋى كەرەك»، - دەدى قاسىم-جومارت توقايەۆ.
پرەزيدەنت ۇكىمەت پەن پارلامەنتكە جاڭا سالىق كودەكسىنىڭ جوباسىنا قاتىستى جان-جاقتى تالقىلاۋ جۇرگىزۋدى تاپسىردى.
«قيىن بولسا دا، دۇرىس شەشىم قابىلداۋ قاجەت. بۇل جەردە اسىعىستىققا جول بەرۋگە بولمايدى. جاڭا سالىق كودەكسىن ساپالى ازىرلەۋ ءۇشىن ونى قابىلداۋ مەرزىمىن كەلەسى جىلعا اۋىستىرۋعا بولادى دەپ سانايمىن. كولەڭكەلى ەكونوميكا ۇلەسىنىڭ جوعارى دەڭگەيدە قالۋى قارجى سالاسىنداعى احۋالدى ۋشىقتىرىپ تۇر. ونى ايتارلىقتاي تومەندەتۋ ءۇشىن مۇقيات ويلاستىرىلعان جان- جاقتى شارالار قابىلداعان ءجون. اتاپ ايتقاندا، شەكاراداعى كەدەن بەكەتتەرىنە قاتىستى بارلىق جۇمىستى تەز ارادا اياقتاۋ قاجەت. سونداي-اق سىرتقى ساۋدا وپەراتسيالارىنان تۇسەتىن كىرىستىڭ باسقا ەلدەرگە زاڭسىز ءوتىپ كەتۋىنە جول بەرمەۋ كەرەك»، - دەدى مەملەكەت باسشىسى.
جىلۋ ەلەكتر ورتالىقتارىن جانە قاراپايىم تۇتىنۋشىلاردى كومىر ورنىنا گاز جاعۋعا كوشىرۋ جۇمىسىن بايىپپەن جۇزەگە اسىرعان ءجون.
«مۇناي-گاز-حيميا سالاسىن ودان ءارى دامىتۋ - ماڭىزدى مىندەت. ءبىز پوليپروپيلەن جانە پوليەتيلەن شىعاراتىن ءىرى وندىرىستىك جوبالاردى جۇزەگە اسىرا باستادىق. بۋتاديەن، كارباميد، تەرەفتال قىشقىلىن وندىرۋگە ارنالعان باسقا دا بولاشاعى زور جوبالار قولعا الىنىپ جاتىر. «ورتا ازيا - ورتالىق» ماگيسترالدى گاز قۇبىرىنىڭ ەلىمىزگە تيەسىلى 800 شاقىرىمنان استام بولىگىن جاڭعىرتۋ جۇمىسى وتە قىسقا مەرزىمدە اياقتالدى. گاز تاسىمالداۋ باعدارلارىن ءارتاراپتاندىرۋ جانە ونىڭ قۋاتىن ارتتىرۋ قاجەت. تۇرعىنداردى جانە ەكونوميكانى گازبەن قامتاماسىز ەتۋ - ۇكىمەتتىڭ باستى مىندەتىنىڭ ءبىرى»، - دەدى پرەزيدەنت.
مەملەكەت باسشىسىنىڭ اتاپ وتۋىنشە، بىلتىر ءبىرقاتار گاز كەنىشى يگەرىلە باستادى. سونداي-اق جىلىنا جالپى كولەمى ءبىر ميلليارد تەكشە مەتر گاز وندىرەتىن جاڭا كەن ورىندارىن يگەرۋ جوسپارلانىپ وتىر.
«ازىرگە بۇل جوبالار تولىق ىسكە قوسىلعان جوق. سوندىقتان گازدى ىشكى نارىققا ءتيىمدى ءبولۋ قاجەت. جىلۋ ەلەكتر ورتالىقتارىن جانە قاراپايىم تۇتىنۋشىلاردى كومىر ورنىنا گاز جاعۋعا كوشىرۋ جۇمىسىن بايىپپەن جۇزەگە اسىرعان ءجون. ۇكىمەتكە جاڭاوزەندەگى، قاشاعانداعى جانە قاراشىعاناقتاعى گاز وڭدەۋ كاسىپورىندارىنىڭ قۇرىلىسىن تەزدەتۋدى تاپسىرامىن. بۇل - باستى مىندەت. وسى سالانى تابىستى دامىتۋ ءۇشىن ينۆەستيتسيانىڭ قايتارىمىن قامتاماسىز ەتەتىن پارمەندى ىنتالاندىرۋ شارالارىن قىسقا مەرزىمدە قابىلداۋ، سونىڭ ىشىندە اقىلعا سىيىمدى تاريفتەر مەن كوتەرمە باعالاردى بەلگىلەۋ كەرەك. گاز كەنىشتەرىنە گەولوگيالىق بارلاۋ جاساۋ ءۇشىن جاڭا ينۆەستيتسيا تارتۋ تۇرعىسىنان العاندا بۇل شارالار وتە ماڭىزدى. ايتپەسە، ەكونوميكانى قاجەتتى كولەمدە گازبەن قامتاماسىز ەتۋ مۇمكىن ەمەس»، - دەدى پرەزيدەنت.
اۆتور
رۋسلان عابباسوۆ
