جاڭا سالىق كودەكسى: جوسپارلى سالىقتىق تەكسەرۋلەر الىنىپ تاستالماق
استانا. KAZINFORM - جاڭا سالىق كودەكسى 2025 -جىلدىڭ شىلدەسىنە دەيىن قابىلدانباق. بۇل تۋرالى ۇكىمەت وتىرىسىندا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ايتتى.
«مەملەكەت باسشىسى فيسكالدىق ساياسات بويىنشا، ونىڭ ىشىندە سالىق كودەكسىنىڭ جوباسى اياسىندا ءبىرقاتار مىندەتتەر قويدى، ولاردى شەشۋ قاجەت. سالىق كودەكسىنىڭ جوباسىندا بەرەشەك مولشەرىنە قاراي ماجبۇرلەپ ءوندىرىپ الۋ شارالارىن قولدانۋ ۇسىنىلادى. سونىمەن قاتار، جوسپارلى سالىقتىق تەكسەرۋلەر الىنىپ تاستالادى. شامامەن 5,0 ميلليون تەڭگە مولشەرىندە بەرەشەك بولعان كەزدە كەيىنگە قالدىرۋ/ءبولىپ- ءبولىپ تولەۋ كوزدەلگەن. سالىقتىق جەڭىلدىكتەردىڭ تيىمدىلىگىن ارتتىرۋ ءۇشىن جوبادا ءتيىمسىز سالىقتىق جەڭىلدىكتەردىڭ ءبىر بولىگى الىنىپ تاستالدى. بارلىق بەرىلگەن جەڭىلدىكتەردى سالىقتىق ەسەپتىلىكتە كورسەتۋ كوزدەلەتىن بولادى. قايتا ءبولىنۋدىڭ جوعارى دەڭگەيىندەگى ونىمدەرى ەكسپورتتاۋشىلار ءۇشىن كورپوراتيۆتىك تابىس سالىعىنىڭ 10 پايىز تومەندەتىلگەن مولشەرلەمەسى كوزدەلگەن. بۇدان باسقا، اۆتوموبيل وتكىزۋ پۋنكتتەرى بويىنشا وسى جىلدىڭ سوڭىنا دەيىن – 5، قالعان 4 پۋنكت كەلەسى جىلى پايدالانۋعا بەرىلەدى»، - دەدى مينيستر.
ونىڭ اتاپ وتۋىنشە، مەملەكەت باسشىسىنىڭ فيسكالدىق ساياسات جونىندەگى تاپسىرمالارىن ىسكە اسىرۋ ءۇشىن قوسىمشا مىناداي ماسەلەلەر پىسىقتالاتىن بولادى:
- جەكە تابىس سالىعىنىڭ سارالانعان مولشەرلەمەسىن بەلگىلەۋ؛
- بانك سەكتورى اكسيونەرلەرىنىڭ ديۆيدەندتەرىنە ءادىل قوسىمشا سالىق سالۋ؛
- سالىق جەڭىلدىكتەرىنىڭ تيىمدىلىگىن ارتتىرۋ؛
- كاسىپكەرلەر ءۇشىن قولايلى جاعدايلاردى ناشارلاتپاي سالىق رەجيمدەرىن وڭتايلاندىرۋ؛
- سالىقتىق اكىمشىلەندىرۋدى تولىق سيفرلاندىرۋ، ونىڭ جازالاۋ تاسىلىنەن باس تارتۋ؛
- سيفرلىق تەڭگەنى پايدالانا وتىرىپ، قوسىمشا قۇن سالىعىن اكىمشىلەندىرۋ تەتىگىن ەنگىزۋ.
«جاڭا سالىق كودەكسىن 2026 -جىلعى 1-قاڭتاردان باستاپ قولدانىسقا ەنگىزە وتىرىپ، 2025 -جىلعى شىلدەگە دەيىن قابىلداۋ ۇسىنىلادى. بۇل بەلسەندى بۇقارالىق- ءتۇسىندىرۋ جۇمىستارىن جۇرگىزۋگە، زاڭعا تاۋەلدى اكتىلەردى ازىرلەۋگە جانە مەملەكەتتىك كىرىستەر كوميتەتىنىڭ اقپاراتتىق جۇيەلەرىن دايىنداۋعا مۇمكىندىك بەرەدى»، - دەدى نۇرلان بايبازاروۆ.
اۆتور
مارلان جيەمباي
